ពាក្យចចាមអារ៉ាមបាននិយាយថា iPad Pro 12.9 អ៊ីងនឹងមានការផ្គត់ផ្គង់យឺតយ៉ាវដោយសារតែកង្វះខាតទៅលើអេក្រង់ Mini-LED

នៅមុនពេលធ្វើការប្រកាសចេញនូវថេប្លេតស៊េរីថ្មី iPad Pro នោះ មានពាក្យចចាមអារ៉ាមជាច្រើន បាននិយាយថា ថេប្លេត iPad Pro 12.9-inch គឺអាចនឹងជួបបញ្ហានៃកង្វះខាតទៅលើការផ្គតផ្គង់ដោយសារតែគ្មានសមាសភាគគ្រប់គ្រាន់។ ឥលូវនេះពាក្យចចាមអារ៉ាមនេះ គឺក្លាយជាការពិត។ ទោះបីជាការចែកចាយថេប្លេតនេះ គឺចាប់ផ្តើមនៅចុងខែនេះ ក៏ដោយនោះ អ្នកប្រើប្រាស់មួយចំនួនដែលបានធ្វើការ Pre-order ថេប្លេតនេះ រួចហើយត្រូវរង់ចាំថេប្លេតនេះ រហូតដល់ខែកក្កដាឯណោះ។ 

មានការបញ្ជាក់ថា ថេប្លេត iPad Pro 12.9-inch នេះ គឺមានទំហំ 128GB, 256 GB, 512GB និង 1TB drives នឹងធ្វើការចែកចាយទៅកាន់អតិថិជនជាច្រើននៅចន្លោះថ្ងៃទី 24 ខែមិថុនាដល់ថ្ងៃទី 8 ខែកក្កដាខាងមុខនេះ។ ប៉ុន្តែសម្រាប់ថេប្លេតដែលមានទំហំ 2TB ជាមួយនឹងតម្លៃ $2200 នោះ គឺចែកចាយចាប់ពីថ្ងៃទី 2 ទៅថ្ងៃទី 9 ខែមិថុនានេះ។ ក្រុមហ៊ុនក៏បានបង្ហាញពីបារម្ភទៅលើកង្វះខាតទៅលើអេក្រង់ Mini-LED សម្រាប់ថេប្លេត iPad Pro 12.9-inch នេះផងដែរ។ សម្រាប់ការទទួល Pre-order ទៅលើថេប្លេតនេះ គឺបានចាប់ផ្តើមនៅថ្ងៃនេះ។ អ្នកប្រើប្រាស់ជាច្រើនដែលបានធ្វើការ Pre-order នោះនឹងទទួលបាននូវថេប្លេតរបស់ពួកគេនៅចន្លោះថ្ងៃទី 21 ដល់ថ្ងៃទី 27 ខែឧសភាខាងមុខនេះ។

ប្រភពខាងលើនេះ ក៏មានការបញ្ជាក់ទៀតថា ថេប្លេត 11-inch version របស់ iPad Pro នេះគឺងាយស្រួលក្នុងការទិញជាង។ ការចែកចាយថេប្លេតនេះគឺនៅថ្ងៃទី 27 ខែឧសភានេះ។ គួរបញ្ជាក់ផងដែរថា ថេប្លេត iPad Pro ស៊េរីថ្មីនេះ គឺមានបន្ទះឈីប M1 ។ វាប្រើប្រាស់នូវរន្ធ Thunderbolt ដូចនេះ អ្នកអាចធ្វើការតភ្ជាប់ទៅកាន់ម៉ូនីទ័រខាងក្រៅបានយ៉ាងងាយស្រួល។ សម្រាប់ iPad Pro ថ្មីនេះគឺមានរ៉េមទំហំ 16GB ផងដែរ៕