ឆាប់ៗនេះ ក្រុមហ៊ុន Xiaomi នឹងមានស្មាតហ្វូនថ្មីមួយទៀត ដែលបំពាកនូវកាមេរ៉ាស្ថិតក្រោមអេក្រង់ហើយថែមទាំងអាចបង្វិលបានថែមទៀតផង

បន្ទាប់ពីបានក្លាយជាក្រុមហ៊ុនស្មាតហ្វូនលំដាប់ទី 3 របស់ពិភពលោកមក ពេលនេះ ក្រុមហ៊ុន Xiaomi បានទទួលជោគជ័យខ្លាំង ហើយនិងបានក្លាយជាអ្នកនាំមុខគេរបស់ចិនទៅលើប៉ាតង់សម្រាប់ស្មាតហ្វូនមួយដែលមានកាមេរ៉ាបង្វិលបានក្រោមអេក្រង់ដែលអាចប្រើប្រាស់ជាកាមេរ៉ាខាងក្រោយផង និងកាមេរ៉ា Selfie ផងដែរ។ បច្ចេកវិទ្យាបង្វិលបាននេះ អាចប្រើប្រាស់នៅលើស្មាតហ្វូនក្នុងការបង្វិលបានដល់ទៅ 180 ដឺក្រេ និងប្រើប្រាស់ជាគោលដៅកាមេរ៉ា Selfie និងកាមេរ៉ាខាងក្រោយផងដែរ។

មកទល់នឹងពេលនេះ ក្រុមហ៊ុន Xiaomi បាននឹងកំពុងតែមានការប្រឹងប្រែងយ៉ាងខ្លាំងទៅលើស្មាតហ្វូនថ្នាក់កណ្តាល និងស្មាតហ្វូនប្រភេទ High-End របស់ខ្លួន។ ក្រុមហ៊ុននេះ ក៏បានបន្តក្នុងការជម្រុញទៅលើការស្រាវជ្រាវ និងការអភិវឌ្ឍទៅលើបច្ចេកវិទ្យាជាច្រើនរបស់ស្មាតហ្វូន។ ថ្មីៗនេះ ក្រុមហ៊ុននេះ ក៏បង្ហាញនូវស្មាតហ្វូន Concept មួយដែលមានអេក្រង់កោង និងកាមេរ៉ាខាងក្រោមអេក្រង់ផងដែរ។ ក្រុមហ៊ុន Xiaomi មិនត្រឹមតែធ្វើការទៅលើការច្នៃប្រឌិតទៅលើអេក្រង់កោងនោះទេ ប៉ុន្តែបច្ចេកវិទ្យាកាមេរ៉ាខាងក្រោមអេក្រង់ផងដែរ។ 

បន្ថែមនពីនេះ ក្រុមហ៊ុន Xiaomi ក៏បានធ្វើការអភិវឌ្ឍទៅលើកាមេរ៉ាដែលអាចបង្វិលបានក្រោមអេក្រង់ផងដែរនេះ បើតាមការបញ្ជាក់នៅក្នុងប៉ាតង់របស់អង្គការកម្មសិទ្ធិបញ្ញាពិភពលោក (WIPO)។ យោងតាមឯកសារនៅក្នុងទិន្នន័យរបស់ WIPO ដែលគេប្រទះឃើញនៅលើ LetsGoDigital បានបង្ហាញថា កម្មវិធីប៉ាតង់នេះ គឺដាក់ស្នើនៅក្នុងខែកុម្ភៈឆ្នាំ 2020 នេះដែលមានកាមេរ៉ាខាងក្រោមអេក្រង់។ បន្ថែមពីនេះ ក៏មានការបង្ហាញទៀតថា ក្រុមហ៊ុន Xiaomi ក៏នឹងបង្ហាញនូវស្មាតហ្វូននេះនៅឆ្នាំនេះដែរ។ កាមេរ៉ា ដែលអាចបង្វិលបាននេះ គឺស្ថិតនៅផ្នែកខាងក្រោយរបស់ស្មាតហ្វូននេះ ដែលគេដឹងថា នឹងមានសមត្ថភាពអាចថតបានច្បាស់ថែមទៀតផង៕