នាឡិកាដៃឆ្លាតវៃជំនាន់ថ្មីរបស់ Samsung គឺ Galaxy Watch 4 និង Watch Active 4 Series ត្រូវបានប្រភពព័ត៌មានចចាមអារាមលើកឡើងថានឹងបង្ហាញវត្តមានជាមួយនឹងការដំឡើងនូវប្រតិបត្តិការ Wear OS ជំនួសអោយ TizenOS។ ហើយក្នុងថ្ងៃនេះយើងទទួលបានព័ត៌មានថ្មីមួយដែលនិយាយទាក់ទងនឹងការកែប្រែលើទំហំរបស់នាឡិកាឆ្លាតវៃជំនាន់ថ្មីនេះបន្ថែមទៀត។
យោងទៅលើប្រភពចេញពីគណនីធ្វីស្ទ័ររបស់លោក Nils Ahrensmeier បានបញ្ជាក់ថា Samsung គម្រោងក្នុងការផ្លាស់ប្តូរទំហំខ្លួនសម្រាប់នាឡិកាដៃឆ្លាតវៃជំនាន់ថ្មីរបស់ខ្លួនអោយធំជាងជំនាន់មុនបន្តិច។ ប្រភពដដែលនេះបានបញ្ជាក់ថា Galaxy Watch 4 Series នឹងមានទំហំខ្លួនធំជាងមុនជាមួយទំហំ 42mm និង 46mm ដែលទំហំនេះគឺធំជាងជំនាន់មុនដែលមានទំហំ 41mm និង 45mm។
ហើយជាមួយនឹងការពង្រីកទំហំខ្លួនសម្រាប់នាឡិកាដៃឆ្លាតវៃជំនាន់ថ្មីនេះ Samsung ក៏អាចបង្កើនទំហំធំជាងមុនបន្តិចផងដែរគឺឡើងដល់ 350mAh សម្រាប់ម៉ូដែល 46mm ខណៈម៉ូដែល 45mm ជំនាន់មុនមានថ្មទំហំ 340mAh ចំនែកម៉ូដែល 42mm អាចនឹងមានថ្មទំហំ 240mAh។ យ៉ាងណាមិញសម្រាប់ម៉ូដែល Galaxy Watch Active 4 Series វិញអាចនឹងមានចេញលក់ជាមួយម៉ូដែលទំហំ 40mm និង 42mm ដែលខុសពីជំនាន់ Watch Active 2 Series ដែលមានម៉ូដែលទំហំ 40mm និង 44mm។
ប្រសិនបើដូច្នោះមែន មានន័យថា Samsung បានពង្រីកទំហំម៉ូដែល Watch 4 Series ប៉ុន្តែ ទម្លាក់ទំហំម៉ូដែល Watch Active 4 មួយម៉ូដែលវិញ។ នាឡិកាដៃឆ្លាតវៃជំនាន់ថ្មី Galaxy Watch 4 និង Watch Active 4 Series នឹងត្រូវប្រកាសចេញផ្លូវការណ៍នៅក្នុងព្រឹត្តិការណ៍ Unpacked Event ដែលត្រៀមប្រារព្ធធ្វើឡើងនៅខែកក្តដាខាងមុខ ជាមួយនឹងទូរស័ព្ទអេក្រង់បត់ជំនាន់ថ្មី Galaxy Z Fold 3 និង Z Flip 3៕
