Ice Universe ទម្លាយថា Samsung នឹងប្រើប្រាស់នូវបច្ចេកវិទ្យា Optical Zoom កម្រិតខ្ពស់នៅលើស្មាតហ្វូនស៊េរីថ្មី Galaxy S22 Ultra របស់ខ្លួន

ជារៀងរាល់ត្រីមាសទី 1 នៅក្នុងឆ្នាំនីមួយៗ ក្រុមហ៊ុន Samsung តែងតែបានធ្វើការអាប់ដេតទៅលើព័ត៌មានថ្មីៗស្តីពីផលិតផលរបស់ខ្លួន រួមទាំងការបង្ហាញវត្តមានរបស់ស្មាតហ្វូន Flagship Galaxy S Series ផងដែរ។ ហើយនៅឆ្នាំក្រោយនេះ ក៏មានដំណឹងថា ក្រុមហ៊ុននេះ ក៏បានត្រៀមខ្លួនក្នុងការបង្ហាញនូវស្មាតហ្វូន Galaxy S22 series ផងដែរ។ បន្ថែមពីនេះ ក្រុមហ៊ុននេះ ក៏ធ្វើការនៅលើផលិតផលជាច្រើនទៀតផងផង។ វាមានការបែកធ្លាយជាច្រើនទៀត ហើយពេលនេះ យើងក៏មានព័ត៌មានមួយចំនួនអំពីស្មាតហ្វូនថ្មីនេះផងដែរ។

ជាធម្មតា ជាមួយនឹងការមកដល់នូវស្មាតហ្វូនជំនាន់ថ្មីៗ គឺក្រុមវិស្វករជាច្រើន ផ្តោតការយកចិត្តទុកដាក់ជាខ្លាំងទៅលើការច្នៃប្រឌិតសម្រាប់ប្រព័ន្ធកាមេរ៉ា។ កន្លងមក ស្មាតហ្វូន Galaxy S21 Ultra គឺត្រួវបានក្រុមហ៊ុន Samsung បំពាក់នូវកាមេរ៉ាប្រភេទ Telephoto Lenses ចំនួន 2 គ្រាប់ ប៉ុន្តែនៅឆ្នាំនេះ ក្រុមហ៊ុននេះ បានប្រកាសថា ខ្លួនបានត្រៀមក្នុងការពង្រឹងទៅលើកាមេរ៉ាស្មាតហ្វូនជំនាន់ថ្មីដែលនឹងមានវត្តមាននៅឆ្នាំក្រោយនេះផងដែរ។  

តាមការទម្លាយរបស់ Ice Universe គឺបានអោយដឹងថា ស្មាតហ្វូន Galaxy S22 Ultra នឹងបន្តក្នុងការពង្រឹងទៅលើ Optical Zoom ដោយមកដល់ពេលនេះ មានក្រុមហ៊ុន Samsung Electro-Mechanics និង Samsung Semiconductor ក៏កំពុងតែធ្វើការអភិវឌ្ឍទៅលើបច្ចេកវិទ្យាថ្មីនេះផងដែរ។ សម្រាប់ Optical Zoom នេះ គឺនឹងមានកាមេរ៉ាកម្រិតខ្ពស់ ហើយមុខងារនេះ គឺអនុញ្ញាតអោយអ្នកប្រើប្រាស់នូវកម្រិត Zoom ផ្សេងគ្នាដោយមិនបាត់បង់នូវគុណភាពរូបភាពនោះទេ។ គួរបញ្ជាក់ថា ស្មាតហ្វូន Samsung Galaxy S21 Ultra គឺប្រើប្រាស់នូវបច្ចេកវិទ្យា 3x telephoto lens និង 10x periscope។ សម្រាប់ស្មាតហ្វូន Samsung Galaxy S22 វិញ គឺនឹងមានការពង្រឹងទៅលើ Zoom វិញម្តង៕