ក្រុមហ៊ុន Xiaomi ពេលនេះបានវិវត្តន៍ខ្លួនពីក្រុមហ៊ុនផលិតស្មាតហ្វូនដែលមានតម្លៃលំដាប់ថវិកា និងវិវត្តន៍ខ្លួនទៅជាក្រុមហ៊ុនផលិតស្មាតហ្វូនប្រណិតនៅលើទីផ្សារ។ ស្មាតហ្វូនXiaomi Mi 11 បានក្លាយជាស្មាតហ្វូនដែលមានអេក្រង់ AMOLED ដ៏ល្អបំផុតរបស់ក្រុមហ៊ុននេះ ដែលមានកម្រិតភាពច្បាស់ 3200×1440 pixels ជាមួយនឹងអេក្រង់ទំហំ 6.81 អ៊ីង។ អេក្រង់របស់ស្មាតហ្វូននេះ គឺមានកម្រិត refresh rate 120Hz ដែលមានគែមកោង ដែលងាយស្រួលក្នុងការទស្សនាមែនទែន។ សម្រាប់ស្មាតហ្វូន Xiaomi Mi 12 អាចនឹងបង្ហាញខ្លួននៅចុងឆ្នាំនេះផងដែរ។
តាមការបញ្ជាក់របស់ប្រភពជាច្រើន បានអោយដឹងថា ស្មាតហ្វូន Xiaomi Mi 12 នឹងមាន OLED Matrix ជាមួយនឹងបច្ចេកវិទ្យា LTPO ថែមទៀតផង។ Samsung Galaxy Note 20 គឺជាស្មាតហ្វូនមួយ ដែលមានអេក្រង់ដែលមានកម្រិតអេក្រង់ refresh rate ចាប់ពី 1Hz ទៅ 120Hz។ តាមការបញ្ជាក់នៅក្នុងពាក្យចចាមអារ៉ាមជាច្រើន បានអោយដឹងថា អេក្រង់នេះ នឹងប្រើប្រាស់នៅលើស្មាតហ្វូន iPhone 13 Series ផងដែរ។ បើនិយាយអំពីស្មាតហ្វូន Xiaomi Mi 12 នេះ ក្រុមហ៊ុននេះ ក៏ធ្លាប់បាននិយាយអំពីបច្ចេកវិទ្យា 200W HyperCharge Fast Charging ផងដែរ។ ដូចនេះ ស្មាតហ្វូននេះ នឹងបំបែកនូវកំណត់ត្រាថ្មីជាស្មាតហ្វូនដែលមានបច្ចេកវិទ្យាសាកថ្មលឿនបំផុតនៅលើទីផ្សារ។
ក្រុមហ៊ុន Xiaomi បានបង្ហាញនូវនាឡិកា Mi Band 6 នៅក្នុងខែមីនានេះ ហើយស្មាតហ្វូននេះ បានដាក់លក់នៅលើទីផ្សារសកលនៅក្នុងខែមេសានេះ។ តាមការទម្លាយពីអ្នកតំណាងរបស់ក្រុមហ៊ុននេះ នាឡិកានេះ លក់បានច្រើនជាង 3 លានគ្រឿង។ ទិន្នន័យនេះ គឺបានទម្លាយចេញពីអនុប្រធានជាន់ខ្ពស់របស់ក្រុមហ៊ុន Xiaomi លោក Zeng Xuezhong នៅលើបណ្តាញសង្គម Weibo ៕
