ក្រុមហ៊ុន Samsung ត្រូវបានគេរំពឹងថា នឹងបង្ហាញចេញនូវស្មាតហ្វូន Flagship របស់ខ្លួនសម្រាប់ឆ្នាំ 2022 នេះហើយ នោះគឺស្មាតហ្វូន Galaxy S22 Series ដែលព្រឹត្តិការណ៍នេះ តែងតែធ្វើនៅក្នុងខែមករានៃឆ្នាំថ្មី។ ស្មាតហ្វូន S Series នេះគឺមានស្មាតហ្វូន Galaxy 22, Galaxy S22 Pro និង Galaxy S22 Ultra ដែលជាស្មាតហ្វូនជំនាន់ថ្មីរបស់ស្មាតហ្វូនត្រកូល Galaxy S21 Ultra នេះ។
ស្មាតហ្វូន Samsung Galaxy S22 Series នេះ ត្រូវបានគេរំពឹងថា ក៏នឹងមានការពង្រឹងទៅលើការឌីស្សាញរូបរាងរបស់វាផងដែរ។ ថ្មីៗនេះ យើងបានឃើញនូវរូបភាពជាច្រើនរបស់ស្មាតហ្វូន Galaxy S22 ដែលប្លែក ហើយនេះគឺជាការឌីស្សាញចេញពីអ្នកឌីស្សាញដ៏មានទេពកោសល្យ Technizo Concept។ នៅពេលនេះ អ្នកឌីស្សាញនេះ បានបង្ហាញនូវរូបភាពរបស់ស្មាតហ្វូន Galaxy S22 Ultra ដែលជាស្មាតហ្វូន Flagship របស់ក្រុមហ៊ុន Samsung នេះ។
ស្មាតហ្វូន Galaxy S22 Ultraនេះនឹងពង្រីកទៅលើសមត្ថភាពនៃការប្រើប្រាស់ទៅលើមុខងារ S Pen ហើយសម្រាប់មុខងារថ្មីនៅលើ Galaxy S22 Ultra នេះ គឺមានការប្រើប្រាស់ជាមួយនឹង Bluetooth ។ ស្មាតហ្វូន S22 Ultra នេះ នឹងមានអេក្រង់ទំហំ 6.81-inch, QHD+ ដែលដូចទៅនឹងស្មាតហ្វូន S21 Ultra ផងដែរ។ ស្មាតហ្វូន S22 Ultra នឹងមានអេក្រង់ LTPO (Low-Temperature Polycrystalline Oxide) ដែលមានកម្រិត Refresh Rate ខ្ពស់យ៉ាងមានប្រសិទ្ធិភាពក្នុងការប្រើប្រាស់ថែមទៀត។
មានការរំពឹងថា ស្មាតហ្វូន S22 Ultra នេះនឹងមានមុខងារជាច្រើនទៀតដែលល្អក្នុងការលេងហ្គេមដូចជា Adaptive Heat Fan សម្រាប់ជំនួយទៅលើការទ្រទ្រង់នូវបច្ចេកវិទ្យា ray-tracing ផងដែរ។ ស្មាតហ្វូននេះនឹងមានបន្ទះឈីប Exynos 2200 របស់ AMD និង Snapdragon របស់ក្រុមហ៊ុន Qualcomm ដែលពង្រឹងទៅលើសមត្ថភាព និងកម្លាំងម៉ាស៊ីនរបស់ស្មាតហ្វូននេះថែមទៀត។
ស្មាតហ្វូន S22 Ultra នឹងប្រើប្រាស់នូវប្រព័ន្ធប្រតិបត្តិការ Android 12 ដែលក្រុមហ៊ុន Google អាចនឹងដាក់អោយប្រើប្រាស់នៅក្នុងខែតុលា ឆ្នាំ 2021 នេះ៕