Huawei បានសហការជាមួយក្រុមហ៊ុន Rovio ដើម្បីនាំយកហ្គេម Angry Birds 2 ដាក់នៅក្នុងឃ្លាំងកម្មវិធី AppGallery របស់ខ្លួន

អាចនិយាយបានថា ពេលនេះក្រុមហ៊ុន Huawei បានផ្តាច់ខ្លួនចេញពីការប្រើប្រាស់ប្រព័ន្ធប្រតិបត្តិការ Android របស់ក្រុមហ៊ុន Google ផ្លូវការណ៍ហើយ ហើយតទៅថ្ងៃមុខផលិតផលថ្មីៗទាំងអស់របស់ Huawei នឹងប្រើនូវប្រតិបត្តិការ HarmonyOS របស់ខ្លួនផ្ទាល់តែម្តង។ ហើយដើម្បីធ្វើអោយប្រតិបត្តិ eco-system ថ្មីរបស់ខ្លួនទទួលបានប្រជាប្រិយភាពដែលឈានទៅដល់ការប្រគូតប្រជែងយ៉ាងជិតស្និតជាមួយនឹង Google Android និង Apple iOS បាន ក្រុមហ៊ុនបច្ចេកវិទ្យាយក្សរបស់ចិនមួយនេះ បាននឹងកំពុងគៀរគរក្រុមហ៊ុន ឬក្រុមអ្នកផលិតកម្មវិធី និងហ្គេមដើម្បីអោយពួកផលិតសម្រាប់ដាក់ដំណើរការនៅលើប្រតិបត្តិការរបស់ខ្លួនដែលមានឃ្លាំងកម្មវិធី និងហ្គេមឈ្មោះថា AppGallery ជាមួយនឹងការផ្តល់នូវកំរៃយ៉ាងច្រើនបំផុត។

ហើយជាលទ្ធផលជាក់ស្តែងក្នុងពេលនេះ Huawei ទើបតែបានសហការជាមួយក្រុមហ៊ុនផលិតហ្គេម Rovio ដើម្បីនាំយកហ្គេមឈ្មោះថា Angry Birds 2 ដែលជាហ្គេមពេញនិមយបំផុតមួយមកដាក់នៅលើ AppGallery របស់ខ្លួន ខណៈពេលនេះ សម្រាប់ខ្សែភាពយន្ត Angry Birds 2 ក៏អាចស្វែងរកបាននៅលើ Huawei Movie ផងដែរ។ Huawei ក៏បានប្រកាសបន្ថែមទៀតថា ឆាប់ៗនេះ រូបភាពតាំងលើអេក្រង់ “Angry Birds 2 Themes” ក៏មានប្រើនៅលើមុខនាឡិកា Watch Fit និង Watch 3 ថែមទៀតផង។

នៅក្នុងវីដេអូប្រូមូសិន ក្រុមហ៊ុន Huawei បានផ្តល់នូវសាច់ប្រាក់ 50% ត្រឡប់ទៅកាន់អ្នកប្រើវិញនៅពេលដែលពួកគេបានធ្វើប្រតិបត្តិការទាញយកហ្គេមនេះជាលើកដំបូង និង 20% សម្រាប់ប្រតិបត្តិការផ្សេងៗទៀត។ ព្រមជាមួយគ្នានេះដែរ ក្រុមហ៊ុន Rovio ក៏បានបង្ហាញនៅក្នុងសេចក្តីប្រកាសព័ត៌មានរបស់ខ្លួនផងដែរថា ហ្គេម Angry Birds 2 ពេលនេះបានឈានមុខគេនៅក្នុងឃ្លាំង AppGallery។ សូមបញ្ជាក់ថា ក្នុងឆ្នាំនេះនៅលើ Huawei AppGallery បានដាក់បញ្ចូលនូវហ្គេមថ្មីៗច្រើនជាងឆ្នាំមុនរហូតដល់ទៅ500% ឯណោះ។ បន្ថែមពីនេះ Huawei ក៏បានរចនាអោយមានផ្ទាំងចែកដាច់ដោយឡែកសម្រាប់ហ្គេម ដែលអនុញ្ញាតឱ្យអ្នកប្រើប្រាស់ងាយស្រួលស្វែងរកនូវមាតិកាហ្គេមថ្មីៗបានយ៉ាងឆាប់រហ័ស និងងាយស្រួល ជាងមុន៕