រូបភាពរបស់ស្មាតហ្វូន OPPO Reno4 Pro 5G ពណ៌ក្រហម និងពណ៌ខៀវបង្ហាញខ្លួនជាផ្លូវការហើយ!

គិតត្រឹមថ្ងៃនេះ គឺនៅសល់រយៈពេល 2 ថ្ងៃទៀតប៉ុណ្ណោះ ដែលនឹងដល់ថ្ងៃនៃការប្រកាសចេញនូវស្មាតហ្វូន OPPO Reno4 Series ហើយ។ នៅក្នុងរូបភាពផ្លូវការរបស់ស្មាតហ្វូន  Reno4 Pro ក៏មានការបង្ហាញខ្លួននៅលើវេបសាយផ្លូវការនៅក្នុងប្រទេសចិនផងដែរ។ រូបភាពនេះ គឺមានការបង្ហាញថា ស្មាតហ្វូននេះ គឺមានពីរពណ៌យ៉ាងទាក់ទាញបំផុតនោះ គឺពណ៌ក្រហម Crystal Red និងពណ៌ខៀវ  Crystal Blue។

នៅក្នុងបញ្ជីនៃវេបសាយលក់រាយជាច្រើនមានការទម្លាយថា ស្មាតហ្វូនពណ៌ក្រហម Crystal Red និងពណ៌ខៀវ Crystal Blue របស់ Reno4 Pro 5G នេះ នឹងមានការបន្ថែមនូវពណ៌ខ្មៅ  Dream Mirror Black និងពណ៌ស Titanium White ផងដែរ។ នៅក្នុងទំព័រផ្លូវការរបស់ស្មាតហ្វូននេះគឺមិនទាន់មានការបញ្ជាក់អំពីលក្ខណៈសម្បត្តិរបស់វានៅឡើយទេ។ ស្មាតហ្វូន Reno4 និងPro នេះគឺមានការបែកធ្លាយលក្ខណៈសម្បត្តិផ្លូវការនៅលើ TENAA ផងដែរ។ ស្មាតហ្វូន OPPO Reno4 Pro 5G នេះមានអេក្រង់  6.5-inch S-AMOLED punch-hole ដែលមានកម្រិតភាពច្បាស់ដល់ទៅ  Full HD+។ អេក្រង់របស់ស្មាតហ្វូននេះគឺមានប្រព័ន្ធស្កេនក្រយ៉ៅដៃក្រោមអេក្រង់ផងដែរ ហើយវាមានការទ្រទ្រង់នូវបច្ចេកវិទ្យា 90Hz refresh rate។ 

ស្មាតហ្វូននេះមានបន្ទះឈីប Snapdragon 765G មានរ៉េមទំហំ 12GB និងមានម៉េមូរីទំហំ 256GB ព្រមទាំងមានថាមពលថ្មទំហំ 4000mAh ដែលទ្រទ្រង់នូវបច្ចេកវិទ្យា 65W fast charging។ ក្រុមហ៊ុន OPPO បានបញ្ជាក់ថា ស្មាតហ្វូននេះ គឺអាចប្រើប្រាស់បាន 4 ម៉ោង បន្ទាប់ពីការបញ្ចូលថាមពលថ្ម 5 នាទី។ ស្មាតហ្វូននេះ គឺមានកាមេរ៉ាខាងមុខទំហំ 32-megapixel។ ផ្នែកខាងក្រោយរបស់ស្មាតហ្វូននេះគឺមានទំហំ 48-megapixel, 13-megapixel telephoto lens និង 12-megapixel ultrawide sensor។ ស្មាតហ្វូននេះ ដំណើរការនូវ ColorOS 7 ដែលផ្អែកនៅលើប្រព័ន្ធប្រតិបត្តិការ Android 10 OS៕