ក្រោយពីការប្រកាសចេញកំពូលស្មាតហ្វូនជំនាន់ថ្មីត្រកូល Find X ដែលមាន Find X2 និង X2 Pro កាលពីខែមិនាឆ្នាំនេះ ក្រុមហ៊ុន OPPO បានបង្វែការផ្តោតយកចិត្តទុកដាក់ទៅលើស្មាតហ្វូនជំនាន់ថ្មីត្រកូល Reno Series របស់ខ្លួនវិញម្តង។ ហើយកាលពីថ្ងៃទី 05 ខែមិថុនាកន្លងទៅក្រុមហ៊ុនចិនមួយនេះ បានធ្វើការដាក់ចេញស្មាតហ្វូនម៉ាក Reno ជំនាន់ថ្មីនៅក្នុងទីផ្សារប្រទេសចិនផ្លូវការណ៍ដែលមានពីរម៉ូដែលគឺ Reno 4 5G និង Reno 4 Pro 5G ដែលស្មាតហ្វូនពីរនាក់បងប្អូននេះ បានដំឡើងមកជាមួយនឹងបន្ទះឈីប 7nm Snapdragon765G លេខ SDM765 របស់ក្រុមហ៊ុន Qualcomm ជាឈីបធុនកណ្តាលដែលទ្រទ្រង់នូវប្រព័ន្ធសេវា 5G។
ក្រោយថ្ងៃនៃការប្រកាសចេញរួចមកស្មាតហ្វូនជំនាន់ថ្មីទាំងពីរនេះត្រូវបានគេរំពឹងទុកថានឹងត្រូវបានក្រុមហ៊ុនធ្វើការនាំយកទៅប្រកាសដាក់លក់នៅលើទីផ្សារប្រទេសឥណ្ឌា និងទីផ្សារមួយចំនួនទៀតផងដែរ។ បើតាមប្រភពមួយចេញពីប្រទេសថៃកាលពីខែមុននេះបានបញ្ជាក់អោយដឹងថាស្មាតហ្វូនជំនាន់ថ្មី Reno 4 Series នឹងត្រូវចេញលក់នៅទីផ្សារក្នុងតំបន់អាស៊ី និងទីផ្សារសកលក្នុងពេលឆាប់ៗនេះ។ ដោយស្មាតហ្វូនជំនាន់ថ្មីនេះក៏ទទួលបានវិញ្ញាបនប័ត្រទទួលស្គាល់ជាសកលពីស្ថាប័ន TUV Rheinland របស់អាល្លឺម៉ង់រួចរាល់ហើយ បន្ទាប់ពីទទួលបានភ្លើងខៀវពីស្ថាប័ន SIG និង Wi-Fi Alliance។
យោងតាមស្ថាប័នទាំងនោះបានបញ្ជាក់ថាសម្រាប់ស្មាតហ្វូន OPPO Reno 4 ម៉ូដែលសម្រាប់ទីផ្សារសកលប្រើប្រាស់លេខកូដសំគាល់ “CPH2089” និង Reno 4 Pro ប្រើប្រាស់លេខកូដសំគាល់ “CPH2091”។ តាមរយះនៃការបញ្ជាក់ពីស្ថាប័នទាំងនេះវាគឺជាផ្នែកមួយនៃដំណើរការសំខាន់ដែលត្រូវត្រួតពិនិត្យធ្វើឡើងនៅមុនពេលស្មាតហ្វូនមួយត្រូវបានចេញដាក់លក់នៅក្រៅប្រទេសចិន។ ហើយនៅពេលដែលឧបករណ៍មួយនោះទទួលបានវិញ្ញាបនប័ត្រសំខាន់ៗទាំងនេះរួចហើយ គេអាចវាយតម្លៃបានថាស្មាតហ្វូននោះជិតដើរដល់ផ្លូវក្នុងការចេញលក់លើទីផ្សារសកលហើយ។ បើមើលតាមបញ្ចីរបស់ស្ថាប័ន Wi-Fi Alliance និង TUV Rheinland បានបង្ហាញថាស្មាតហ្វូន Reno 4 និង Reno 4 Pro 5G ប្រើប្រាស់នូវប្រព័ន្ធសេវា Dual-mode Wi-Fi កម្រិតល្បឿន 2.4GHz / 5GHz និងប្រើប្រាស់នូវបច្ចេកវិទ្យា Bluetooth v5.1។
ស្មាតហ្វូនទាំងពីរនេះដំណើរការដោយ Android 10 ស្រោបដោយស្បែកមុខកម្មវិធី ColorOS7.2។ OPPO Reno 4 មានអេក្រង់ទំហំ 6.43 អ៊ីងប្រភេទបន្ទះបង្ហាញ AMOLED Display មានរន្ធទំលុះអេក្រង់ជាប្រភេទ Pill-Shape ដាំដោយកាមេរ៉ាសែលហ្វីពីរគ្រាប់ស្ថិតនៅជិតកែងខាងលើផ្នែកខាងឆ្វេងអេក្រង់ រីឯម៉ូដែល Reno 4 Pro 5G មានអេក្រង់ទំហំ 6.55 អ៊ីងជាបន្ទះបង្ហាញ AMOLED Display ដូចគ្នាប៉ុន្តែវាមានរន្ធទំលុះអេក្រង់តែមួយគ្រាប់ប៉ុណ្ណោះ និងមានកម្រិត refresh rate 90Hz។
ស្មាតហ្វូនទាំងពីរនាក់បងប្អូនដែលប្រើបន្ទះឈីប Snapdragon 765G គឺភ្ជាប់នូវរ៉េមទំហំ 12GB និងអង្គផ្ទុកទិន្នន័យ 128GB ដល់ 256GB ដូចគ្នា។ សម្រាប់ប្រព័ន្ធកាមេរ៉ាថតរូប និងវីដេអូវិញម៉ូដែល Reno 4 មានកាមេរ៉ាសែលហ្វីចំនួនពីរគ្រាប់ទំហំ 32MP+2.0MP ជាមួយកាមេរ៉ាក្រោយចំនួនបីគ្រាប់ដែលមានលែនគោលទំហំ 48MP, លែន Ultra Wide ទំហំ 8.0MP និងលែន Depth Sensor ទំហំ 2.0MP។ ចំនែកឯម៉ូដែល Reno 4 Pro 5G វិញមានកាមេរ៉ាសែលហ្វីមួយគ្រាប់ទំហំ 32MP និងកាមេរ៉ាក្រោយបីគ្រាប់ដែលមានលែនគោលទំហំ 48MP ដូចគ្នា ប៉ុន្តែមានលែន Ultra Wide ធំជាងជាមួយទំហំ 12MP រួមនឹងលេន Telephoto ទំហំ 13MP ថែមទៀតផង។
ស្មាតហ្វូនទាំងពីរនេះមានថ្មទំហំ 4,000mAh និងទ្រទ្រង់បច្ចេកវិទ្យាសាកថាមពលថ្មចូលល្បឿនលឿនកំលាំង 65W ដោយប្រើបច្ចេកវិទ្យា SuperWOOC 2.0 ដូចគ្នា (សាកពី 0% ទៅពេញ 100% ប្រើពេលប្រមាណតែ 36 នាទីប៉ុណ្ណោះ)។ តែគួរអោយស្តាយដោយគេមិនទទួលបានព័ត៌មានផ្លូវការណាមួយពីក្រុមហ៊ុន OPPO ទាក់ទងនឹងនាំចេញស្មាតហ្វូនជំនាន់ថ្មីត្រកូល Reno ទៅដាក់លក់នៅទីផ្សារក្រៅពីប្រទេសចិននៅឡើយទេ។ ហើយគេសង្ឃឹមថា OPPO Reno 4 Series នឹងមានចេញដាក់លក់នៅលើទីផ្សារលោកខាងលិចផងដែរ៕
