នៅថ្ងៃទី 5 ខែសីហាខាងមុខនេះ Samsung នឹងរៀបចំព្រឹត្តិការណ៍ Samsung Unpacked របស់ខ្លួនហើយ។ នៅក្នុងព្រឹត្តិការណ៍នេះ គឺនឹងមានការប្រកាសចេញនូវវត្តមានរបស់ស្មាតហ្វូន Galaxy Note20 series ប៉ុន្តែក្រុមហ៊ុន Samsung ត្រូវបានគេរំពឹងថា នឹងបង្ហាញនូវផលិតផលជាច្រើនទៀតផងដែរក្រៅពីស្មាតហ្វូននេះ។ របាយការណ៍ជាច្រើន កាលពីពេលមុននេះ បាននិយាយថា ស្មាតហ្វូន Galaxy Z Fold 2 ក៏នឹងបង្ហាញខ្លួននៅថ្ងៃនោះដែរ ប៉ុន្តែការបែកធ្លាយថ្មីៗនេះ បាននិយាយថា ករណីនេះមិនកើតឡើងនោះទេ។
តាមការបញ្ជាក់របស់ Max Weinbach (@MaxWinebach) បានអោយដឹងថា ស្មាតហ្វូន Galaxy Z Fold 2 នឹងបង្ហាញខ្លួននៅក្នុងព្រឹត្តិការណ៍ Galaxy Unpacked នៅថ្ងៃទី 5 ខែសីហាខាងមុខនេះទេ។ នៅក្នុងការបង្ហោះនេះ គាត់ទម្លាយថា ស្មាតហ្វូននេះមិនបានត្រៀមខ្លួនរួចជាស្រចសម្រាប់ការប្រកាសនេះទេ។ គាត់បន្ថែមថា ការបង្ហាញស្មាតហ្វូននេះ គឺចាប់ផ្តើមនៅក្នុងខែកញ្ញា ឬខែតុលាខាងមុខនេះ។ នៅក្នុងពេលនេះ ស្មាតហ្វូននេះ ស្ថិតនៅក្នុងការធ្វើតេស្ត។ ដូចនេះ យើងមិនរំពឹងថាការប្រកាសបង្ហាញស្មាតហ្វូននេះឆ្លងកាត់នូវការធ្វើតេស្តទាន់ពេលនោះទេ។
ស្មាតហ្វូន Galaxy Z Fold 2 នេះ គឺជាជំនាន់បន្ទាប់របស់ស្មាតហ្វូន Galaxy Fold ដែលបង្ហាញខ្លួនកាលពីឆ្នាំមុននេះ។ ស្មាតហ្វូននេះ គឺមានទម្រង់នៃការបត់ដូចគ្នាទៅនឹងម៉ូឌែលជំនាន់មុននេះដែរ ប៉ុន្តែវាក៏មានការផ្លាស់ប្តូរទៅលើរូបរាងរបស់វាផងដែរ។ ស្មាតហ្វូននេះ នឹងមានថាមពលថ្មទំហំ 4500mAhអេក្រង់ 120Hz refresh rate បន្ទះឈីប Snapdragon 865 Plus processor និងម៉េមូរីទំហំ 512GB ៕