រូបភាពជាច្រើនសន្លឹករបស់ថេប្លេត Galaxy Tab S7 និង Galaxy Tab S7+ ត្រូវបានបែកធ្លាយកាន់តែច្បាស់មុនការប្រកាសជាផ្លូវការ

Galaxy Tab S7 និង  Galaxy Tab S7+ ត្រូវបានគេមើលឃើញថា នឹងក្លាយជាថេប្លេតជំនាន់បន្ទាប់ក្រុមហ៊ុន Samsung នេះ ហើយថេប្លេតនេះ នឹងបង្ហាញខ្លួនជាផ្លូវការនៅក្នុងរយៈពេលប៉ុន្មានថ្ងៃនេះហើយ។ មួយរយៈនេះ ការឌីស្សាញនិងលក្ខណៈពិសេសរបស់ថេប្លេតនេះ គឺមានការបែកធ្លាយជាច្រើនផងដែរ ក្នុងនោះ ក៏មានការបង្ហាញនូវមុខងារពិសេសៗថែមទៀតផង។

យោងតាមការទម្លាយរបស់ Evan Blass (@evleaks) គឺមានការបង្ហាញនូវរូបភាពរបស់ថេប្លេត Galaxy Tab S7 និង Galaxy Tab S7+ នៅលើគណនី Twitter របស់ខ្លួនផងដែរ។ នៅក្នុងរូបភាពនេះ គឺមានការបង្ហាញអំពី keyboard dock, S Pen និងសមត្ថភាពក្នុងការ Stream ទៅលើ Xbox games តាមរយៈសេវាកម្ម Microsoft’s Project xCloud ផងដែរ។ វាក៏មានសមត្ថភាពក្នុងការបម្លែងនូវ handwriting ទៅជា text ផងដែរ។ យើងបានឃើញនូវការទម្លាយនេះ អស់រយៈពេលជាង 4 ខែមកហើយ ថេប្លេត Galaxy Tab S7 នេះមានអេក្រង់ទំហំ 11 អ៊ីង ខណៈពេលដែលថេប្លេត Galaxy Tab S7+ មានអេក្រង់ទំហំ 12.4 អ៊ីង។

អេក្រង់នៅលើថេប្លេតទាំងពីរនេះ គឺមានកម្រិតអេក្រង់ 120Hz Refresh Rate ផងដែរ។ សម្រាប់ថេប្លេត Galaxy Tab S7 គឺមានប្រព័ន្ធ Fingerprint Reader ខណៈពេលដែលថេប្លេត Galaxy Tab S7+ គឺមានប្រព័ន្ធស្កេនក្រយ៉ៅដៃនៅលើអេក្រង់ផងដែរ។ សម្រាប់ S Pen នេះគឺប្រើប្រាស់ដូចទៅនឹងប៊ិចធម្មតាដែរ។

ថេប្លេតទាំងពីរនេះ ត្រូវបានក្រុមហ៊ុនតំឡើងជាមួយនិងបន្ទះឈីប Snapdragon 865+, 6GB RAM, 128GB និង microSD card ថែមទៀតផង។ ក្រុមហ៊ុន Samsung ក៏ភ្ជាប់នូវថេប្លេតទាំងពីរនេះ នូវកាមេរ៉ាខាងមុខទំហំ 8MP selfie និងកាមេរ៉ាភ្លោះ 13MP+5MP ផងដែរ។ បន្ថែមពីនេះ ក៏មាន AKG-tuned quad-speaker ជាមួយនឹង stereo audio និង Dolby Atmos។ សម្រាប់ការតភ្ជាប់ទំនាក់ទំនងមានដូចជា A-GPS, dual-band Wi-Fi ax, Bluetooth 5.0 និង USB Type-C ហើយថេប្លេតនេះ ក៏មានភ្ជាប់ជាមួយនឹងមុខងារពិសេសៗជាច្រើនទៀតដូចជា Wireless DeX, Air Gestures, 4K video recording និង Project xCloud ផងដែរ៕