Samsung បានប្រកាសចេញនូវប្រអប់សំលាប់មេរោគ UV-C Portable Sterilizer លើកដំបូងរបស់ខ្លួនកាលពីដើមខែកក្តដានៅប្រទេសថៃ។ ឧបករណ៍សំលាប់មេរោគនេះបានមានវត្តមានឡើងស្របពេលដែលជំងឺកូវីដ 19 បានរាតត្បាតនៅទូទាំងពិភពលោក ហើយមានតម្រូវការចាំបាច់នូវឧបករណ៍ដើម្បីប្រឆាំងទប់ស្កាត់ជាមួយមេរោគប្រឈមនេះ ដែលអាចឆ្លងរីករាលដាលតាមរយះមធ្យោបាយផ្សេងៗដែលក្នុងរួមមានទាំងតាមរយះរបស់របរប្រើប្រាស់ប្រចាំថ្ងៃក៏ដូចជាទូរស័ព្ទស្មាតហ្វូនផងដែរ។ ហើយពេលនេះឧបករណ៍ ឬប្រអប់សំលាប់មេរោគ UV-C Portable Sterilizer នេះត្រូវបានក្រុមហ៊ុនពាំនាំយកទៅប្រកាសចេញលក់នៅទីផ្សារប្រទេសឥណ្ឌា។
ប្រអប់សំលាប់មេរោគ UV-C Portable Sterilizer នេះគឺបានរចនាឡើងយ៉ាងពិសេសដើម្បីសំលាប់មេរោគដែលតោងជាប់នៅលើស្មាតហ្វូនរបស់យើងតែម្តង ដែលតាមការបញ្ជាក់ពី Samsung គឺវាមានលទ្ធភាពខ្ពស់អាចសំលាប់មេរោគបានរហូតដល់ទៅ 99% ដោយប្រើពេលត្រឹមតែ 10 នាទីប៉ុណ្ណោះ ដែលក្នុងនោះរួមបញ្ចូលទាំងមេរោគឆ្លង E-coli, Staphylococcus aureus និង Candida albicans ជាដើម។ ក្រៅតែពីទូរស័ព្ទប្រអប់សំលាប់មេរោគនេះក៏អាចប្រើជាមួយនឹងឧករណ៍ប្រើប្រាស់ផ្សេងៗទៀតបានក្នុងនោះរួមមានកាសស្តាប់ EarBuds, នាឡិកាដៃ, ចង្កឹះសោរ, វ៉ែនតា និងម៉ាស។ ឧបករណ៍សំលាប់មេរោគដ៏ទំនើបនេះមានបង្កប់ដោយអំពូលភ្លើងយូវី (Dual UV Light) ទាំងនៅផ្ទៃប្រអប់ខាងលើ និងបាតក្រោមដើម្បីធ្វើអោយមានប្រសិទ្ធភាពខ្ពស់ក្នុងការសំលាប់មេរោគនៅពេលដែលយើងដាក់ទូរស័ព្ទ ឬឧបកណ៍ណាមួយក្នុងវា។
UV-C Portable Sterilizer បានរចនាឡើងមិនមែនតែសម្រាប់សំលាប់មេរោគស្មាតហ្វូន ឬឧបករណ៍ផ្សេងប៉ុណ្ណោះទេ វាក៏ជាឧបករណ៍ Wireless Charge ដែលអាចសាកថ្មទៅអោយស្មាតហ្វូន និងឧបករណ៍ទាំងអស់ដែលទ្រទ្រង់នូវបច្ចេកវិទ្យាសាកថ្មឥតខ្សែ ឬ Wireless Charge ដែលប្រើប្រាស់បច្ចេកវិទ្យា Qi Standard ថែមទៀតផង។ ឧបរកណ៍នេះមានការរចនាឡើងរាងជាប្រអប់ដែលមានទំហំតូច និងទំងន់ស្រាលល្មម ប៉ុន្តែផ្ទៃខាងក្នុងរបស់វាមានទំហំទូលាយគ្រប់គ្រាន់ដែលអាចអោយយើងដាក់ទូរស័ព្ទដែលមានទំហំធំដូចជា Samsung Galaxy S20 Ultra បានល្មម។ ប្រអប់សំលាប់មេរោគនេះមាន ប៊ូតុងតែមួយប៉ុណ្ណោះដើម្បីចុចដំណើរការក្នុងការសំលាប់មេរោគ និងបញ្ឈប់ដំណើរការរបស់វាត្រឹមរយះពេល 10 នាទី។ Samsung U-C Portable Sterilizer ត្រូវបានក្រុមហ៊ុនប្រកាសចេញលក់ក្នុងតម្លៃសមរម្យបំផុតគឺខ្ទង់ $48 ប៉ុណ្ណោះ ហើយវានឹងត្រូវចេញលក់ក្នុងខែសីហានេះនៅតាមហាងលក់ផ្ទាល់ និងហាងលក់អនឡាញរបស់ Samsung ក៏ដូចជាបណ្តាហាងចែកចាយក្នុងតំបន់ជាច្រើនទៀតក្នុងប្រទេសឥណ្ឌាផងដែរ៕