ក្រុមហ៊ុនមេនៃស្លាកយីហោស្មាតហ្វូន Nokia បានប្រកាសថាស្មាតហ្វូន Nokia ស៊េរីថ្មីចំនួនពីរម៉ូដែលនឹងត្រូវប្រកាសចេញក្នុងខែកញ្ញានេះ។ លោក Juho Sarvikas ប្រធានផ្នែកផលិតផលជាន់ខ្ពស់របស់ HMD Global បានចេញសេចក្តីប្រកាសមួយនៅលើគណនីធ្វីស្ទ័ររបស់លោកដោយបានព័ណ៌នាថាក្រុមហ៊ុនរបស់លោកនឹងប្រកាសចេញស្មាតហ្វូន Nokia ស៊េរីថ្មីនៅថ្ងៃអង្គារទី 22 ក្នុងខែកញ្ញានេះ។
ព្រឹត្តិការណ៍ដាក់សម្ភោធន៍ផលិតផលស្មាតហ្វូនស៊េរីថ្មីនេះគឺប្រារព្ធធ្វើឡើងតាមរយះការ Live-streamed ដែលនឹងចាប់ផ្តើមនៅវេលាម៉ោង 4 ល្ងាច (ម៉ោងក្នុងតំបន់)។ ប៉ុន្តែទោះជាយ៉ាងនៅលើផ្ទាំង Poster ដែលលោក Juho Sarvikas បានបង្ហោះនោះគឺមិនបានបង្ហាញពីស្មាតហ្វូន Nokia ដែលត្រូវប្រកាសចេញក្នុងថ្ងៃនោះទេ ប៉ុន្តែបើតាមប្រភពព័ត៌មានបែកធ្លាយថ្មីៗក្នុងថ្ងៃនេះបាននិយាយថាស្មាតហ្វូន Nokia ស៊េរីថ្មីដែលនឹងត្រូវប្រកាសបង្ហាញចេញនៅថ្ងៃទៅ 22 ក្នុងខែកញ្ញានេះគឺជាម៉ូដែល Nokia 7.3 ហើយក៏មានសមាជិតស្មាតហ្វូន Nokia ស៊េរីថ្មីផ្សេងទៀតដែលត្រូវបានប្រកាសចេញក្នុងថ្ងៃជាមួយគ្នាដែរនោះគឺ Nokia 6.3។
កាលពីឆ្នាំទៅ HMD Global បានប្រកាសចេញស្មាតហ្វូនម៉ូដែល Nokia 6.2 និង Nokia 7.2 ដូច្នេះក្នុងឆ្នាំនេះ Nokia 6.3 និង Nokia 7.3 នឹងចូលខ្លួនមកជំនូសដំណែងរបស់ពូកវាវិញម្តង។ យ៉ាងណាមិញប្រភពព័ត៌មានបានបង្ហើបអោយដឹងទៀតថាស្មាតហ្វូនស៊េរីថ្មី Nokia 6.3 គឺទ្រទ្រង់ត្រឹមប្រព័ន្ធសេវា 4G LTE ប៉ុណ្ណោះខណៈម៉ូដែល Nokia 7.3 ត្រូវបានគេរំពឹងថានឹងទ្រទ្រង់ប្រព័ន្ធសេវា 5G។ ក្រៅពីទូរស័ព្ទ Nokia ស៊េរីថ្មីទៅ HMD Global អាចនឹងប្រកាសបង្ហាញនៅគ្រឿងបរិក្ខា Nokia ថ្មីៗជាច្រើនទៀតផងដែរ។ ដូចនេះរងចាំតាមដានទាំងអស់គ្នាថាតើ HMD Global មានផលិតផលថ្មីអ្វីខ្លះសម្រាប់យកដាក់មកបង្ហាញនៅថ្ងៃទី 22 ក្នុងខែកញ្ញាខាងមុខនេះ៕