នៅក្នុងមួយរយៈពេលនេះ ក្រុមហ៊ុនផលិតស្មាតហ្វូនជាច្រើនបានជម្រុញព្រំដែននៃការឌីស្សាញរបស់ខ្លួនកាន់តែអស្ចារ្យ និងទាន់សម័យបំផុត។ ខណៈពេលដែលប៉ុន្មានឆ្នាំនេះ ស្មាតហ្វូនដែលអាចបត់បាន គឺបានក្លាយជានិន្នាការថ្មីនៅលើទីផ្សារនោះ បច្ចេកវិទ្យានេះ ក៏មានការបង្កើនទៅលើភាពច្នៃប្រឌិតផងដែរ។ ពេលនេះ ក្រុមហ៊ុន Samsung ក៏ប៉ាតង់ទៅលើស្មាតហ្វូនថ្មីដែលមានអេក្រង់ភ្លឺថ្លាផងដែរ។

ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងបានស្នើសុំនូវប៉ាតង់មួយជាមួយនឹងស្ថាប័ន e USPTO (United States Patent and Trademark Office) និង WIPO (World Intellectual Property Office) នេះ បើតាមការបញ្ជាក់នៅក្នុងរបាយការណ៍របស់ LetsGoDigital។

រូបភាពថ្មីនេះ គឺបានចេញផ្សាយនៅថ្ងៃទី 27 ខែសីហា ឆ្នាំ 2020 នេះ ហើយបច្ចេកវិទ្យានេះ គឺបង្ហាញពីស្មាតហ្វូនដែលមានអេក្រង់ថ្លាតែម្តង។ បច្ចេកវិទ្យានេះ អាចប្រើប្រាស់នៅលើឧបករណ៍ជាច្រើនដែលមានទូរទស្សន៍ ម៉ូនីទ័រ កុំព្យូទ័រ និង Consoles លេងហ្គេមជាច្រើនទៀត។

ក្រុមហ៊ុន Samsung បានបញ្ជាក់ថា ប៉ាតង់នេះ គឺផ្អែកទៅលើលក្ខណៈបច្ចេកទេសជាច្រើន។ ស្មាតហ្វូននេះត្រូវបានឃើញនៅក្នុងប៉ាតង់មួយដែលមានការបង្ហាញថាស្មាតហ្វូននេះ មានគែម Bezels ស្តើង និងអេក្រង់ថ្លាភ្លឺច្បាស់ផងដែរ។ ស្មាតហ្វូននេះមានអេក្រង់ OLED ដែលមានភាពភ្លឺថ្លាតែម្តង។ សម្រាប់ឈ្មោះ របស់ស្មាតហ្វូន Samsung Galaxy នេះនៅមិនទាន់ដឹងនៅឡើយទេ៕