OPPO Find N គឺជាសមត្ថិផលស្មាតហ្វូនអេក្រង់បត់ជំនាន់ដំបូងរបស់ OPPO ដែលត្រូវបានក្រុមហ៊ុនធ្វើការប្រកាសចេញកាលពីពាក់កណ្តាលខែធ្នូ ឆ្នាំ 2021 កន្លងទៅ ដែលមកដល់វេលានេះ គឺមិនទាន់បាន 1 ខែនោះទេសម្រាប់វត្តមានស្មាតហ្វូនអេក្រង់បត់មួយនេះ។ យ៉ាងណាមិញក្រោយពីការប្រកាសចេញ OPPO បានធ្វើការប្រកាសចេញលក់លើកដំបូងក្នុងរយះពេលខ្លីបំផុតនៅទីផ្សារប្រទេសចិន។
ហើយបើតាមរបាយការណ៍របស់ OPPO បានឲ្យដឹងថា តម្រូវការរបស់អថិជនសម្រាប់ទូរស័ព្ទអេក្រង់បត់ OPPO Find N គឺកើនឡើងខ្ពស់បំផុត រហូតដល់ក្រុមហ៊ុនមិនអាចទទួលការបញ្ជាទិញបន្ថែមទៀតសម្រាប់ទូរស័ព្ទអេក្រង់បត់មួយនេះ។ ហើយនៅខណៈពេលនេះដែរ OPPO Find N កំពុងប្រឈមមុខនឹងបញ្ហាផ្គត់ផ្គង់ដោយសារតែមានអតិថិជនបានធ្វើការចុះឈ្មោះបញ្ជាទិញមានរហូតដល់ទៅ 1 នាក់ឯណោះ។
លោក Liu Bobbee ដែលជាប្រធានក្រុមហ៊ុន OPPO ក្នុងប្រទេសចិន បានឲ្យដឹងថា មូលហេតុចម្បងដែលធ្វើឲ្យតម្រូវការរបស់ Find N កើនឡើងខ្ពស់នោះ គឺដោយសារតែកត្តាតម្លៃរបស់ស្មាតហ្វូនអេក្រង់បត់នេះដែលធ្វើឲ្យមានការទាក់ទាញខ្លាំងមែនទែន ដោយនៅក្នុងប្រទេសចិនផ្ទាល់តម្លៃរបស់ Find N គឺចាប់ផ្តើមពីតម្លៃខ្ទង់ប្រហែលជាង $1,200 ដល់ $1,400 ទៅតាមទំហំម៉េមូរីផ្ទុកក្នុងម៉ាស៊ីន ដែលជាតម្លៃធូរថ្លៃច្រើនបើធៀបនឹងស្មាតហ្វូនអេក្រង់បត់ម៉ាកផ្សេង។ មួយវិញទៀត ការឌីស្សាញចេញជាមួយរូបរាងដ៏តូចច្រឡឹងបែប ឃ្យួត ឃ្យួត ក៏ជាកត្តាទាញការចាប់អារម្មណ៍ពីសំណាក់អតិថិជនខ្លាំងផងដែរ។
OPPO Find N មានអេក្រង់ខាងក្រៅទំហំ 5.49 អ៊ីញ AMOLED Display ស្រោបការពារដោយកញ្ចក់ Gorilla Glass Victus និងមានអេក្រង់បត់ខាងក្នុងទំហំ 7.1 អ៊ីញជាបន្ទះបង្ហាញ UTG LTPO-AMOLED 120Hz។ ស្មាតហ្វូនអេក្រង់បត់នេះបំពាក់ឈីប 5G Snapdragon 888 មានរ៉េមទំហំ 8GB ដល់ 12GB LPDDR5 ជាមួយជម្រើសម៉េមូរីទំហំ 256GB ដល់ 516GB UFS3.1។ Find N មានកាមេរ៉ាក្រោយទំហំ 50MP+13MP+16MP និងកាមេរ៉ាសែលហ្វីទំហំ 32MP ចំនួនពីរគ្រាប់ស្ថិតនៅលើអេក្រង់ក្រៅ-ក្នុងដែលជាលែនទំលុះអេក្រង់ដូចគ្នា។ សម្រាប់ថ្មវិញ Find N មានថ្មទំហំ 4,500mAh គាំទ្រកំលាំងសាកល្បឿនលឿនតាមរយះខ្សែចម្លង USB-C 33W ហើយអាចសាកដោយមិនប្រើខ្សែបានកំលាំង 15W និងសាកថ្មទៅឲ្យស្មាតហ្វូនផ្សេងបាន 10W ផងដែរ៕