គំរូរចនាបថស្មាតហ្វូនអេក្រង់បត់ Google Pixel Fold បានបង្ហាញវត្តមានតាមរយះប្រតិបត្តិការ Android 12L Beta 2 ហើយ

ក្រុមហ៊ុន Google ត្រូវបានគេដឹងថា បាននឹងកំពុងធ្វើការលើសង្វាក់ផលិតទូរស័ព្ទអេក្រង់បត់ដំបូងរបស់ខ្លួន ទោះជាបែបនេះក្តី កាលពីអំឡុងឆ្នាំ 2021 មានប្រភពរបាយការណ៍ជាច្រើនចេញផ្សាយថា ក្រុមហ៊ុនបណ្តាញរុករកខ្នាតយក្ស (Giant Search Engine) របស់ពិភពលោកមួយនេះ បានលុបចោលគំរោងការផលិតទូរស័ព្ទបត់អេក្រង់របស់ខ្លួន ប៉ុន្តែ មិនមានការបញ្ជាក់ផ្លូវការណ៍ណាមួយចេញពី Google ឡើងរហូតមកទល់នឹងពេលបច្ចុប្បន្ននេះ។

ដោយឡែកស្រាប់តែពេលនេះ ក៏មានប្រភពចេញពីបណ្តាញ 9to5google.com បានធ្វើការបង្ហាញចេញពីគំរូដំបូងតាមរយះគំរូប្រតិបត្តិការ Android 12L Beta 2 ជាមួយនឹងរូបភាពចលនាបង្ហាញពីការស៊កបញ្ចូលទ្រនាប់ស៊ីមកាត ដោយគំរូបដែលបង្ហាញចេញមកនេះត្រូវបានគេជឿជាក់ថាជាទូរស័ព្ទអេក្រង់បត់ Google Pixel Fold។ រូបភាពគំរូព្រៀងដែលបានបង្ហាញចេញមកនេះ ឃើញថាជាស្មាតហ្វូនដែលមានការឌីស្សាញជាមួយអេក្រង់ធំទូលាយរំលេចដោយគន្លាក់នៅចំកណ្តាលលើគែមខាងលើ និងមានប៊ូតុងកំនត់សំឡេងនៅលើគែមខាងស្តាំ។

បើយើងពិនិត្យមើលទៅលើគំរូរចនារបស់ស្មាតហ្វូនមួយនេះ បង្ហាញច្បាស់ថា Google Pixel Fold គឺមានការឌីស្សាញប្រហាក់ប្រហែលគ្នានឹងទូរស័ព្ទបត់អេក្រង់ OPPO Find N ដោយសារតែមានកម្ពស់អេក្រង់ខ្លីដូចគ្នា មិនទ្រវែងដូចនឹង Samsung Galaxy Z Fold 3 និង Huawei Mate X2 ឡើយ។ បើតាមប្រភពព័ត៌មានបែកធ្លាយ និងរបាយការណ៍មួយចំនួនដែលបានចេញផ្សាយនាពេលកន្លងមកបានឲ្យនិយាយថា Google Pixel Fold នឹងដំឡើងប្រព័ន្ធកាមេរ៉ាមានសមត្ថភាពទាបជាង Google Pixel 6 Series ហើយនឹងប្រើនូវបន្ទះឈីប Google Tensor GS101 ដែលនឹងភ្ជាប់មកជាមួយរ៉េមទំហំ 12GB និងម៉េមូរីក្នុងម៉ាស៊ីនទំហំ 512GB។ 

ហើយស្មាតហ្វូនអេក្រង់បត់ជំនាន់ដំបូងរបស់ Google ក៏អាចនឹងប្រើបន្ទះអេក្រង់ UTG LTPO-AMOLED របស់ Samsung ផងដែរ ប៉ុន្តែ មិនដឹងថាមានទំហំប៉ុន្មាននោះទេ។ បើតាមការព្យាករណ៍មួយចំនួនបានគឺថា Google Pixel Fold អាចនឹងមានតម្លៃចន្លោះពីខ្ទង់ $1,500 ទៅ $1,800។ ទោះជាយ៉ាងណា គេមិនដឹងថា Google នឹងប្រកាសចេញស្មាតហ្វូនអេក្រង់បត់ជំនាន់ដំបូងរបស់ខ្លួននៅពេលណានោះទេ គ្រាន់តែដឹងថាពេលនេះ Google បាននឹងកំពុងធ្វើការអភិវឌ្ឍន៍ប្រតិបត្តិការ Android ថ្មី ឬ Android 12L ដើម្បីប្រើប្រាស់នៅលើឧបករណ៍ដែលមានអេក្រង់ធំ៕