កាលពីខែវិច្ឆិកាឆ្នាំ 2021 កន្លងទៅនេះ នៅក្នុងបញ្ជីរបស់ Geekbench គឺមានការទម្លាយថា ក្រុមហ៊ុន vivo នឹងមានស្មាតហ្វូនថ្មីមួយដែលមានឈ្មោះហៅថា vivo Y21e។ នៅពេលនេះមានការបែកធ្លាយថ្មីមួយបានបង្ហាញអំពីការឌីស្សាញរបស់ស្មាតហ្វូននេះ និងលក្ខណៈសម្បត្តិជាច្រើនរបស់វាផងដែរ។ យោងតាមរបាយការណ៍ចេញពីគេហទំព័រ 91mobiles តាមរយៈអ្នកទម្លាយព័ត៌មានឈ្មោះ Ishan Agarwal គឺបានបង្ហាញនូវរូបរាង និងលក្ខណៈសម្បត្តិរបស់ស្មាតហ្វូននេះ។
ស្មាតហ្វូន Y21e នឹងមានរន្ធ waterdrop notch ដែលមានញាត់នូវកាមេរ៉ាខាងមុខមួយគ្រាប់។ ស្មាតហ្វូននេះ គឺមានគែម Bezels ដែលពិតជាស្តើងមែនទែន ហើយសម្រាប់ប៊ូតុង Power ដែលស្ថិតនៅផ្នែកខាងស្តាំរបស់ស្មាតហ្វូននេះ ក៏មានការទ្រទ្រង់មកជាមួយនឹងប្រព័ន្ធស្កេនក្រយ៉ៅដៃផងដែរ។ ស្មាតហ្វូន Y21e មានកាមេរ៉ានៅខាងក្រោយចំនួន 2 គ្រាប់ និងមានភ្លើង LED Flash មួយគ្រាប់។ សម្រាប់ម៉ាកយីហោ vivo គឺស្ថិតនៅផ្នែកគែមខាងឆ្វេងនៃខាងក្រោយរបស់ស្មាតហ្វូននេះ។ ស្មាតហ្វូននេះនឹងមាន USB Type-C port, speaker grille និង microphone នៅផ្នែកខាងក្រោមរបស់ស្មាតហ្វូននេះជាមួយនឹង 3.5mm audio jack ។ ស្មាតហ្វូននេះមាន 2 ពណ៌គឺពណ៌ស និងពណ៌ខៀវ។
ស្មាតហ្វូន Y21e មានអេក្រង់ទំហំ 6.51-inch HD+ LCD និងមានវិមាត្រ 164.2×76×8mm និងទម្ងន់ 182g ។ ស្មាតហ្វូននេះ មានថាមពលថ្មទំហំ 5000mAh ជាមួយនឹងបច្ចេកវិទ្យា 18W fast charging ។ស្មាតហ្វូននេះប្រើប្រាស់នូវ Android 12 ជាមួយនឹង FuntouchOS ផងដែរ។ ស្មាតហ្វូននេះនឹងមានបន្ទះឈីប Qualcomm Snapdragon 680 SoC រ៉េមទំហំ 3GB និងម៉េមូរីទំហំ 64GB storage ៕
