realme គឺជាក្រុមហ៊ុនផលិតស្មាតហ្វូនថ្មីមួយ ដែលគេដឹងច្បាស់ថា គឺមានការប្រកួតប្រជែងខ្លាំងបំផុតនៅលើទីផ្សារសកលក្នុងរយៈពេលជាង 2 ឆ្នាំមកនេះ។ ក្រុមហ៊ុនរបស់ប្រទេសចិនមួយនេះ ក៏បានបង្កើនការផលិតស្មាតហ្វូនរបស់ខ្លួនជាច្រើនម៉ូដែលនៅលើទីផ្សារផងដែរ។ នៅក្នុងឆ្នាំនេះ ក្រុមហ៊ុននេះ បានបង្ហាញនូវវត្តមានរបស់ស្មាតហ្វូនថ្នាក់ប្រណិតរបស់ខ្លួនថ្មីមួយដែលឈ្មោះថា realme GT 2 series ថែមទៀតផង។ ជាមួយគ្នានេះ នៅប៉ុន្មានថ្ងៃចុងក្រោយនេះ ក៏មានការបែកធ្លាយនូវព័ត៌មានថ្មីរបស់ស្មាតហ្វូន realme 9 Series ផងដែរ ដែលនេះ គឺជាស្មាតហ្វូនជំនាន់ថ្មីរបស់ស្មាតហ្វូន realme GT Neo 2។
ទាក់ទងជាមួយនឹងស្មាតហ្វូនស៊េរីថ្មីរបស់ក្រុមហ៊ុន realme ដែរ នៅថ្ងៃនេះ មានការបង្ហាញចេញនូវព័ត៌មានដែលនិយាយអំពីស្មាតហ្វូន realme GT Neo 3 ហើយដែលនេះ គឺជាស្មាតហ្វូនដំបូងបំផុតដែលមានបន្ទះឈីប Dimensity 8000។ ស្មាតហ្វូន realme GT Neo 3 នេះ នឹងមានការប្រើប្រាស់នូវថាមពលថ្មទំហំ 5000mAh ជាមួយនឹងបច្ចេកវិទ្យាសាកកម្លាំង 65-watt charging ហើយនិងមានរ៉េមទំហំ 8GB និង 12GB LPDDR4x RAM ព្រមទាំងមានមេម៉ូរីទំហំ 128GB និង 256GB UFS 3.1 ។ ស្មាតហ្វូនជំនាន់ថ្មីនេះ នឹងមានការប្រើប្រាស់កញ្ចក់អេក្រង់ Samsung E4 AMOLED មានទំហំ 6.62 អ៊ីង និងមានល្បឿន 120Hz។
បើនិយាយពីការថតរូបរបស់ស្មាតហ្វូន realme GT Neo 3 ត្រូវបានក្រុមហ៊ុនបំពាក់នូវកាមេរ៉ាចំនួន 3 គ្រាប់ដែលមានទំហំ 50-megapixel Sony IMX766 module ដែលអមដោយគ្រាប់ទីពីរមានទំហំ 50MP Samsung JN1 wide-angle sensor និងគ្រាប់ទីបីមានទំហំ 2MP macro sensor ហើយស្មាតហ្វូននេះ ក៏ទ្រទ្រង់នូវ 5G ផងដែរ។ ក្រុមអ្នកវិភាគរបស់ក្រុមហ៊ុន Counterpoint Research បាននិយាយថា ទីផ្សារស្មាតហ្វូននៅក្នុងត្រីមាសទី 3 នៅក្នុងឆ្នាំនេះ គឺផ្តោតទៅលើស្មាតហ្វូន 5G ដែលមានកំនើនកើនឡើង 121%។ ក្រុមហ៊ុន realme ក៏មានការកើនឡើងទៅលើការលក់ដល់ទៅ 831%។ ស្មាតហ្វូននេះក៏មានការពេញនិយមខ្លាំងនៅក្នុងអ៊ឺរ៉ុប ចិន និងឥណ្ឌា៕
