ក្រុមអ្នកវិភាគព្យាករណ៍ថា iPhone 15 Pro Series នឹងបំពាក់សែនស័រកាមេរ៉ា Periscope កម្រិត 5X-zoom

នាពេលកន្លងមកយើងទទួលបានប្រភពរបាយការណ៍មួយចំនួនដែលបាននិយាយថា ទូរស័ព្ទ iPhone 15 Pro ដែលនឹងមកដល់នៅឆ្នាំ 2023 នឹងមានបំពាក់មកជាមួយសែនស័រកាមេរ៉ា Periscope។ ហើយក្នុងថ្ងៃនេះដែរប្រភពព័ត៌មានចុងក្រោយចេញពីអ្នកវិភាគល្បីឈ្មោះមួយរូប គឺលោក Jeff Pu បាននិយាយថា ក្នុងខណៈពេលនេះក្រុមហ៊ុនបិតាបច្ចេកវិទ្យា Cupertino របស់អាមេរិកមួយនេះបាននឹងកំពុងដំណើរការតេស្តគំរូ និងសមាសភាគសែនស័រកាមេរ៉ា Periscope ឬ Telephoto ដែលមានកម្រិតពង្រីកដល់ទៅ 5x ដែលគំរូសែនស័រកាមេរ៉ាសម្រេចផ្លូវការណ៍ចុងក្រោយគ្រោងនឹងចាប់ផ្តើមដំណើរការផលិតក្នុងខែឧសភា ឆ្នាំ 2022 នេះ។

ប្រភពដដែលបានបញ្ជាក់ថា នៅពេលដែលសមាសភាគកាមេរ៉ាគំរូត្រូវទទួលបានការអនុម័តផ្លូវការណ៍ Apple អាចនឹងបំពាក់នៅលើ iPhone ម៉ូដែលកំពូលក្នុងឆ្នាំ 2023 គឺនៅលើ iPhone 15 Pro និង iPhone 15 Pro Max។ ជាមួយគ្នានេះដែរ ប្រភពក៏បានបញ្ជាក់ថា ក្រុមហ៊ុនដែលត្រូវផ្គត់ផ្គងលែនកាមេរ៉ាថ្មីទៅឲ្យ Apple អាចជាក្រុមហ៊ុន Lante Optics ដែលត្រូវបានគេព្យាករណ៍ក្រុមហ៊ុននេះអាចនឹងធ្វើការផលិតលែនកាមេរ៉ាថ្មីនេះ 100-Lens សម្រាប់ Apple។

សម្រាប់បច្ចេកវិទ្យា Periscope Lens គឺមិនមែនជាបច្ចេកវិទ្យាថ្មីសម្រាប់ក្រុមហ៊ុនផលិតស្មាតហ្វូន Android នោះទេ ព្រោះថាក្រុមហ៊ុនផលិតស្មាតហ្វូន Android បានប្រើបច្ចេកវិទ្យាកាមេរ៉ាមួយនេះអស់រយះពេលពីរបីឆ្នាំមកហើយ ប៉ុន្តែសម្រាប់ទូរស័ព្ទ iOS iPhone របស់ Apple គឺមិនទាន់មានប្រើនៅឡើយទេ។ ក្នុងឆ្នាំ 2022 នេះ Apple ត្រូវបានគេដឹងថា អាចនឹងបង្កើនទំហំសែនស័រកាមេរ៉ាក្រោយពីទំហំ 12MP ឡើងមកដល់ 48MP ដោយឡែកសម្រាប់សែនស័រ Periscope អាចនឹងត្រូវប្រើនៅលើ iPhone 15 Series ក្នុងឆ្នាំ 2023៕