Intel ប្រកាសគម្រោងក្នុងការសាងសងរោងចក្រផលិតបន្ទះឈីបថ្មីខ្នាតយក្សក្នុងរដ្ឋអូហៃយ៉ូសហរដ្ឋអាមេរិក

ក្រុមហ៊ុន Intel នឹងសាងសង់រោងចក្រផលិតបន្ទះឈីបខ្នាតធំផុតមួយនៅក្នុងតំបន់ New Albany ក្នុងរដ្ឋ Ohio ដែលនៅពេលបញ្ចប់ការសាងសងរួចរាល់វានឹងក្លាយជាគម្រោងក្រុមហ៊ុនផលិតផ្នែក semiconductor ដ៏ធំបំផុតនៅក្នុងពិភពលោក។ ការចំនាយទុនវិនិយោគលើកដំបូង គឺមានតម្លៃជាង 20 ពាន់លានដុល្លារអាមេរិក ហើយការសាងសង់ត្រូវបានរំពឹងថា នឹងចាប់ផ្តើមនៅចុងឆ្នាំ 2022 នេះ ជាមួយនឹងផែនការបើកដំណើរការផ្លូវការណ៍នៅឆ្នាំ 2025។

រោងចក្រផលិតបន្ទះឈីបថ្មីខ្នាតយក្សនេះនឹងលាតសន្ធឹងនៅលើផ្ទៃដីជាង 400 ហិកតា ដែលគម្រោងដំបូងនឹងសាងសង់រោងចក្រផលិតបន្ទះឈីបចំនួន 2 ជាមួយនឹងគម្រោងពង្រីករហូតដល់ 8 បន្ថែមទៀតនាពេលអនាគត។ រោងចក្រថ្មីខ្នាតយក្សនេះនឹងជួយសម្រួលដល់ផ្នែកប្រតិបត្តិការ រួមនឹងប្រព័ន្ធអេកូឡូស៊ីក្រុមហ៊ុនដៃគូរបស់ Intel ឲ្យកាន់តែមានភាពល្អប្រសើរទ្វេរឡើង។

នៅក្នុងរោងចក្រថ្មីរបស់ Intel នេះត្រូវបានគេប៉ាន់ប្រមាណថា អាចនឹងផ្តល់នូវការងារដំបូងចំនួន 3,000 នាក់ និងការផ្នែកសំណង់សាងសង់រាប់ម៉ឺនបន្ថែមទៀតនៅក្នុងរយះពេលវែង ដែលអាចគាំទ្រសេដ្ឋកិច្ចនៅក្នុងតំបន់បានប្រសើរឡើង។  ជាមួយគ្នានេះដែរ Intel ក៏បានចំណាយទឹកប្រាក់ខ្ទង់ 100 លានដុល្លារអាមេរិកបន្ថែមទៀតដើម្បីជំនួយដល់ស្ថាប័នអប់រំក្នុងរដ្ឋអូហៃយ៉ូទៅលើផ្នែកបណ្តុះបណ្តាល និងអភិវឌ្ឍន៍ទេពកោសល្យក្នុងស្រុក ក៏ដូចជាការជម្រុញទៅលើកិច្ចការស្រាវជ្រាវនៅទូទាំងតំបន់ Midwest ថែមទៀតផង។

ស្របពេលជាមួយគ្នានេះ មានក្រុមហ៊ុនដៃគូប្រគូតប្រជែងក្នុងឧស្សាហកម្មបន្ទះឈីបធំៗជាមួយ Intel ចំនួនពីរផ្សេងទៀត គឺ TMSC និង Samsung ក៏គ្រោងនឹងធ្វើការសាងសង់រោងចក្រផលិតបន្ទះឈីបថ្មីរបស់ខ្លួននៅសហរដ្ឋអាមេរិកផងដែរ ដែលអាចស្ថិតនៅក្នុងរដ្ឋអារីសូណា និងតិចសាសន៍៕