ប៉ុន្មានថ្ងៃមុននេះ មានចុះផ្សាយព័ត៌មានជាច្រើនសម្រាប់ version ថ្មីរបស់ថេប្លេត Galaxy Tab S6 Lite ស្របពេលដែលថេប្លេតនេះ ក៏មានការបែកធ្លាយជាបន្តបន្ទាប់ស្ទើរតែគ្រប់យ៉ាងទៅហើយ។ នៅក្នុងការបែកធ្លាយចុងក្រោយនេះក៏មានការបង្ហាញនូវឈ្មោះផ្លូវការរបស់ផលិតផលនេះផងដែរ។ នៅពេលនេះ យើងនឹងមើលទៅលើព័ត៌មានលម្អិតរបស់ថេប្លេតនេះ។
ថេប្លេតថ្មីរបស់ក្រុមហ៊ុន Samsung នេះ គឺមានឈ្មោះហៅថា Galaxy Tab S6 Lite 2022 Edition ។ ថេប្លេតនេះ មានការឌីស្សាញដូចគ្នាទៅនឹងថេប្លេត Galaxy Tab S6 Lite ដែលបង្ហាញខ្លួននៅក្នុងឆ្នាំ 2020 អញ្ចឹងដែរ ហើយថេប្លេតថ្មីនេះ ក៏នឹងមានលក្ខណៈសម្បត្តិជាច្រើនដូចទៅនឹងម៉ូដែលជំនាន់មុនដូចគ្នា។ សម្រាប់ភាពខុសគ្នារបស់ថេប្លេតទាំង 2 នេះគឺទៅលើបន្ទះឈីប និងកម្មវិធី software ដែលប្រើលើថេប្លេតនីមួយៗ ប៉ុណ្ណោះ។ សម្រាប់ម៉ូដែល Edition 2022 នឹងប្រើប្រាស់នូវបន្ទះឈីប Qualcomm Snapdragon 720G SoC ជាជាងបន្ទះឈីប Exynos 9611។
ថេប្លេតថ្មីនេះប្រើប្រាស់នូវ One UI 4.x ផ្អែកនៅលើ Android 12 បើមើលទៅលើម៉ូឌែលពីមុនគឺប្រើប្រាស់នូវ One UI 2.x ផ្អែកនៅលើ Android 10 ។ ថេប្លេត Samsung Galaxy Tab S6 Lite 2022 Edition នេះនឹងមានអេក្រង់ 10.4-inch display (TFT LCD) ជាមួយនឹងកម្រិតភាពច្បាស់ 2400x1200pixels និងប៊ិច Stylus។ ថេប្លេតនេះ មានកាមេរ៉ាខាងក្រោយទំហំ 8MP និងកាមេរ៉ាខាងមុខទំហំ 5MP។
ថេប្លេតនេះ មានថាមពលថ្មទំហំ 7,040mAh និងបច្ចេកវិទ្យាសាកថ្មលឿន 15W charging។ ថេប្លេតនេះ មានប្រភេទ WiFi-only និង LTE ដែលមានរ៉េមទំហំ 4GB និងម៉េមូរីទំហំ 64GB។ វាមានតម្លៃ €379និង €439 រៀងគ្នា៕
