ថ្មីៗនេះ ក្រុមហ៊ុន Qualcomm បានប្រកាសចេញនូវបន្ទះឈីបស៊េរីថ្មីរបស់ខ្លួនថ្មីមួយទៀត ដែលស្ថិតនៅក្នុងស្រឡាយរបស់ 7-Series ដែលមានឈ្មោះថា Snapdragon 780G។ បន្ទះឈីបនេះ គឺមានលេខម៉ូដែល SM7350 ដែលគេដឹងថា គឺជាសិស្សប្អូនរបស់បន្ទះឈីប Snapdragon 888។ យ៉ាងណាមិញ នៅថ្ងៃនេះ ក្រុមហ៊ុន ដែលមានមូលដ្ឋាននៅទីក្រុង San Diego មួយនេះ ត្រូវបានគេដឹងថា គឺកមពុងតែធ្វើការនៅលើបន្ទះឈីបជំនាន់ថ្មីមួយទៀត ដែលមានលេខកូដ SM7325 និងមានឈ្មោះហៅថា Snapdragon 775G។

បន្ទះឈីបថ្មីនេះ គឺនឹងត្រូវប្រើប្រាស់ជាលើកដំបូងនៅលើស្មាតហ្វូន Honor 50 នេះបើយោងតាមការបបញ្ជាក់ពីព័ត៌មានថ្មីដែលទម្លាយចេញពីប្រទេសចិន ដែលកន្លងមកគឺតែងតែបានបញ្ចេញនូវព័ត៌មានទាក់ទងជាមួយនឹងស្មាតហ្វូន ក៏ដូចជាគ្រឿងអេឡិចត្រូនិកជាច្រើន។ ស្មាតហ្វូន Honor 50 គឺជាសិស្សប្អូនរបស់គេនៅក្នុងចំណោម Honor 50 Series ចំនួន 3 ម៉ូដែលស្របពេលដែលស្មាតហ្វូនសិស្សច្បង Honor 50 Pro and Honor 50 Pro+ ត្រូវបានគេជឿថា នឹងប្រើប្រាស់នូវបន្ទះឈីបFlagship Snapdragon 888។

ស្មាតហ្វូន Honor 50 Series ថ្មីនេះ គឺនៅមិនទាន់មានការបញ្ជាក់ពីប្រកាសចេញនោះទេ  ប៉ុន្តែមានការសង្ស័យថា ស្មាតហ្វូននេះ អាចនឹងបង្ហាញវត្តមាននៅក្នុងខែមិថុណា និងចេញលក់ជាផ្លូវការណ៍នៅក្នុងខែកក្កដាខាងមុខនេះ។ សូមជំរាបផងដែរថា ជាមួយនិងការចាប់ដៃគ្នារវាង Honor និង ក្រុមហ៊ុន Qualcomm ដែលជាក្រុមហ៊ុនរបស់សហរដ្ឋអាមេរិកនេះ  ត្រូវបានគេរំពឹងថា ស្មាតហ្វូនរបស់ក្រុមហ៊ុនចិនមួយនេះ នឹងអាចប្រើប្រាស់នូវសេវកម្មរបស់ Google បាន។ មានន័យថា ក្រុមហ៊ុនចិនដែលទើបតែនឹងប្រកាសឯករាជ្រមួយនេះ នឹងអាចនាំយកស្មាតហ្វូនរបស់ខ្លួនមកប្រកួតប្រជែងជាមួយនឹងដៃគូបាននៅក្នុងសង្រ្គាមទីផ្សារដែលមានភាពពុះកញ្រ្ជោលមួយនេះ បន្ទាប់ពីក្រុមហ៊ុន Huawei បានដាំក្បាលចុះក្រោយពេលដែលមានការរឹតបន្តឹងពីសំណាក់អាមេរិក ដោយសារតែជំនួញពាណិជកម្មរវាងចិនកាលពីប៉ុន្មានឆ្នាំមុន។