ថ្មីៗនេះ ក្រុមហ៊ុន vivo ទើបតែបង្ហាញនូវផលិតផលថ្មីមួយរបស់ខ្លួននៅក្នុងសន្និសីទអនឡាញរបស់ខ្លួនមួយ។ នៅក្នុងសន្និសីទនេះ ក្រុមហ៊ុននេះបានប្រកាសចេញនូវស្មាតហ្វូន vivo S10 series ដែលមានការបង្ហាញខ្លួនជាមួយនឹងខ្នងខាងក្រោយថ្មីប្រភេទ Photochromic ដែលក្រុមហ៊ុនផលិតស្មាតហ្វូនរបស់ប្រទេសចិននេះបាននិយាយថា គឺបានចំណាយពេលវេលារហូតដល់ទៅ 3 ឆ្នាំឯណោះ ដើម្បីធ្វើការអភិវឌ្ឍអោយចេញបាននូវសមិទ្ធិផលមួយនេះ។
នៅក្នុងការប្រកាសជាផ្លូវការនោះ ស្មាតហ្វូន S10 series នេះ គឺបានប្រើប្រាស់នូវបច្ចេកវិទ្យា Photochromic Technology ដែលអនុញ្ញាតអោយផ្នែកខាងក្រោយរបស់ស្មាតហ្វូននេះ អាចប្តូរពណ៌ពីពណ៌ខៀវទៅពណ៌ទឹកក្រូចបាន នៅពេលដែលស្ថិតនៅក្រោមពន្លឺថ្ងៃ។ អ្នកគ្រប់គ្រងផលិតផលរបស់ក្រុមហ៊ុនផលិតស្មាតហ្វូនរបស់ចិនលោក Han Boxiao បានទម្លាយថា ដំណើរការនេះ គឺចំណាយពេលអភិវឌ្ឍចាប់តាំងពីការប្រកាសបង្ហាញនូវស្មាតហ្វូន X27 series មកម្ល៉េះ។
ក្រុមហ៊ុននេះ បានធ្វើការនៅលើបច្ចេកវិទ្យានេះ អស់រយៈពេល 3 ឆ្នាំហើយ។ ដូចនេះ បច្ចេកវិទ្យានេះ នឹងប្រើប្រាស់នៅលើស្មាតហ្វូនជាច្រើនម៉ូឌែលទៀតនាពេលខាងមុខផងដែរ។ មានការលើកឡើងថា នៅពេលខាងមុខននេះ ក្រុមហ៊ុនជាច្រើនទៀត អាចនឹងប្រើប្រាស់នូវបច្ចេកវិទ្យានេះនៅលើស្មាតហ្វូនជាច្រើនរបស់ខ្លួនផងដែរ។ បើនិយាយអំពីស្មាតហ្វូន vivo S10 series នេះ ស្មាតហ្វូននេះ មានបន្ទះឈីប MediaTek Dimensity 1100 SoC និងកាមេរ៉ាភ្លោះខាងមុខទំហំ 44 Megapixel ថាមពលថ្មទំហំ 4,050mAh និងបច្ចេកវិទ្យាសាកថ្មលឿន 44W fast charging ផងដែរ៕