មួយរយះពេលកន្លងមកនេះយើងសង្ខេតឃើញថា ទីផ្សារម៉ាស៊ីនកុំព្យូទ័រយួរដៃ Chromebook ហាក់រាងស្ងប់ស្ងាត់បន្តិច ប៉ុន្តែ ស្រាប់តែពេលនេះក្រុមហ៊ុន Asus បានចេញមកពញាក់អារម្មអ្នកប្រើប្រាស់ជាថ្មីម្តងទៀតជាមួយនឹងការប្រកាសចេញម៉ាស៊ីនកុំព្យូទ័រយួរដៃ Chromebook ជំនាន់ថ្មីរបស់ខ្លួនស្ងាត់ៗ។ ដែលម៉ាស៊ីនកុំព្យូទ័រយួរដៃ Chromebook របស់ក្រុមហ៊ុនល្បីឈ្មោះរបស់តៃវ៉ាន់មួយនេះមានឈ្មោះផ្លូវការណ៍ថា Asus Chromebook Flip CX5400។
ម៉ាស៊ីនកុំព្យូទ័រយួរដៃ Chromebook ជំនាន់ថ្មីនេះ ត្រូវបានក្រុមហ៊ុន Asus ធ្វើការរចនាឡើងប្រកបដោយភាពប្រណិតជាមួយតួរខ្លួនស្រោបពេញដោយសារធាតុលោហៈមើលទៅមានភាពរឹងមាំ រួមទាំងមានកម្រាស់ស្តើង និងទំងន់ស្រាលត្រឹម 1.40 គីឡូក្រាមប៉ុណ្ណោះ។ Asus Chromebook Flip CX5400 ភ្ជាប់មកជាមួយអេក្រង់ Touch Screen ទំហំ 14 អ៊ីញ Nano-Edge Display ទ្រទ្រង់កម្រិតបង្ហាញ Full-HD និងគាំទ្រការចុចបញ្ជាជាមួយប៊ិច Garaged USI Stylus ដែលមានភ្ជាប់មកជាមួយម៉ាស៊ីនស្រាប់ទៀតផង ។ ហើយអ្វីដែលឡូយជាងនេះ គឺថា Chromebook ជំនាន់ថ្មីនេះបានបំពាក់មកជាមួយនឹងគន្លឹះត្រចៀក (Hings) ដែលអាចកាត់បត់ផ្នែកអេក្រង់ទៅក្រោយផ្អិបភ្ជាប់ជាមួយផ្ទៃបាទតួរម៉ាស៊ីនបានដល់ 360 ដឺក្រេទៀតផង។
Asus Chromebook Flip CX5400 ត្រូវបានក្រុមហ៊ុនដាក់អោយដំណើរការលើ CPU Intel-Core i7 ជំនាន់ទី 11 លេខ 1160G7 មានអង្គគណនាចំនួន 4-Core ដែលមាន 12M Cache មានល្បឿន 2.1GHz និងអាច Boost ឡើងដល់ 4.4GHz។ ម៉ាស៊ីនរបស់ Chromebook ជំនាន់ថ្មីនេះមានជំនួយពីរ៉េមទំហំ 16GB និងភ្ជាប់អង្គ GPU Intel® Iris Xe ហើយនិងមានថាសរឹងផ្ទុកទិន្នន័យល្បឿនលឿនប្រភេទ M.2 SSD NVMe PCIe3.0 ទំហំ 512GB។ កុំព្យូទ័រយួរដៃ Chromebook មួយនេះមានថ្មប្រភេទ 3-cell Li-Ion ទំហំ 48Whrs និងប្រតិបត្តិការដោយ Google Chrome OS។
ចំពោះលក្ខណៈពិសេសៗមួយចំនួនទៀតដែលមាននៅលើ Asus Chromebook Flip CX5400 ជំនាន់ថ្មីនេះ គឺមានដូចជា ដំឡើងនូវប្រព័ន្ធ Speaker Harman/Kardon, មានរន្ធ Thunderbolt 4 ចំនួនពីរ, រន្ធដាក់ microSD Card, ប្រើ Wi-Fi6, Bluetooth v5.0 និងមានកាមេរ៉ាវ៉ិបខេមកម្រិត HD-720px សម្រាប់ប្រើក្នុងការ livestream និងវីដេអូខលជាដើម។ ក្រុមហ៊ុន Asus បានប្រកាសចេញលក់ម៉ាស៊ីនកុំព្យូទ័រយួរដៃ Chromebook Flip CX5400 នៅលើ Store របស់ខ្លួនជាមួយតម្លៃខ្ទង់ $1,049.99៕