កាលពីពេលមុននេះ មានការព្យាករណ៍ថា ក្រុមហ៊ុន Apple នឹងមិនតម្លើងទៅលើតម្លៃរបស់ស្មាតហ្វូន iPhone 13 នោះទេ ហើយតម្លៃរបស់ស្មាតហ្វូននេះ នឹងប្រហាក់ប្រហែលជាស្មើរតម្លៃទៅនឹងឆ្នាំមុនដែរ។ ប៉ុន្តែពេលនេះ នៅពេលដែលមានការកើនឡើងថ្លៃទៅលើសមាសភាគជាច្រើននៃស្មាតហ្វូននោះ តម្លៃរបស់ស្មាតហ្វូន ក៏មានការកើនឡើងផងដែរ។ អ្នកវិភាគជាច្រើនបានស្តីបន្ទោសថា មកពីក្រុមហ៊ុនTSMC តម្លើងថ្លៃទៅលើផលិតផលជាច្រើនរបស់ខ្លួន។
ថ្មីៗនេះ ក្រុមហ៊ុន Taiwan Semiconductor Manufacturing Co. (TSMC) របស់តៃវ៉ាន់នេះ ក៏បានជូនដំណឹងទៅកាន់អតិថិជនរបស់ខ្លួនអំពីការកើនឡើងទៅលើតម្លៃឈីបផងដែរ។ តម្លៃឈីបនឹងមានការកើនឡើងដល់ទៅ 20% ទៅលើគ្រប់ដំណើរការបច្ចេកវិទ្យាទាំងអស់។ កាលពីពេលមុននេះ មានការរាយការណ៍ថាតម្លៃនឹងកើនឡើងត្រឹមតែ 10% ប៉ុណ្ណោះទៅលើបន្ទះឈីបដែលប្រើប្រាស់នូវដំណើរការ 5nm និង 7nm ហើយវាមានការកើនឡើងតម្លៃ 20% ទៅលើដំណើរការ 16nm។ ដូចនេះ ក្រុមហ៊ុន Apple អាចនឹងបន្ថែមតម្លៃទៅលើសមាសភាគនៃការផលិតនេះទៅលើស្មាតហ្វូន iPhones ថ្មីនេះ។
iPhone 13 ត្រូវបានគេដឹងថា នឹងប្រើប្រាស់នូវបន្ទះឈីប Apple A15 Bionic ដែលប្រើប្រាស់នូវដំណើរការ 5nm។ មានការរំពឹងថា ស្មាតហ្វូនជំនាន់ថ្មីរបស់ Apple នេះ នឹងបង្ហាញខ្លួននៅថ្ងៃទី 14 ខែកញ្ញានេះ ហើយក្រុមហ៊ុននេះ ក៏នឹងចាប់ផ្តើមទទួលនូវការ Pre-order ទៅលើស្មាតហ្វូននេះនៅថ្ងៃទី 17 ខែកញ្ញានេះដែរ។ ការលក់ទៅលើស្មាតហ្វូន iPhone 13 នេះ ចាប់ផ្តើមពីថ្ងៃទី 24 ខែកញ្ញានេះ។ ស្មាតហ្វូនថ្មីនេះនឹងមាន notch តូចជាងមុន អេក្រង់កម្រិត 120-hertz និងថាមពលថ្មធំជាងមុនថែមទៀតផង៕