ក្រុមហ៊ុន Apple បញ្ចេញកាលបរិច្ឆេទផ្លូវការណ៍ស្តីពីការប្រារព្ធព្រឹត្តិការណ៍ពិសេសប្រចាំឆ្នាំដើម្បីប្រកាសចេញផលិតផលថ្មីៗរបស់ខ្លួន គឺនៅថ្ងៃទី 14 ខែកញ្ញា ឆ្នាំ 2021 ខាងមុខនេះ នៅវេលាម៉ោង 10:00am PDT តាមរយះការ livestream ចេញពី Apple Park ក្នុងរដ្ឋកាលីហ្វ័រញ៉ា សហរដ្ឋអាមេរិក។ ហើយខាងក្រោមនេះគឺផលិតផលថ្មីៗដែលគេរំពឹងថានឹងបង្ហាញវត្តមានក្នុងព្រឹត្តិការណ៍នៅថ្ងៃនោះ៖
iPhone 13 Series
តួរអង្គសំខាន់ដែលនឹងបង្ហាញខ្លួនក្នុងព្រឹត្តិការណ៍ថ្ងៃទី 14 កញ្ញា ខាងមុខនេះ គឺទូរស័ព្ទ iOS ជំនាន់ថ្មី iPhone 13 Series។ ទូរស័ព្ទ iOS ជំនាន់ថ្មីនេះ គឺនឹងមាន 4 ម៉ូដែលដូចជំនាន់ 12 Series ដែរ ក្នុងនោះរួមមាន iPhone 13 mini, iPhone 13 / 13 Pro និង 13 Pro Max។ បើតាមប្រភពព័ត៌មានដែលបានបែកធ្លាយមួយរយះពេលកន្លងមកនេះបានបញ្ជាក់ថា Apple នៅតែរក្សាទម្រង់នៃការរចនា iPhone 13 Series ដូចជំនាន់ 12 Series ដដែល ប៉ុន្តែ អាចបង្រួមឆកអេក្រង់រួមតូចជាងមុនបន្តិចដែលមានបង្កប់កាមេរ៉ាជាមួយសែនស័រ Face ID 2.0 សម្រាប់ស្កែនដោះសោរសុវត្ថិភាព។
iPhone 13 Series នឹងបង្ហាញវត្តមានជាមួយបន្ទះឈីប A15 Bionic 5G, បង្កើនសមត្ថភាពប្រព័ន្ធកាមេរ៉ានៅលើសែនស័រ Ultra-wide ដែលនឹងមាន aperture ធំឡើងដល់ F/1.8 ជាមួយមុខងារថ្មី ProRes for Video, មានថ្មទំហំធំជាងមុន និងគាំទ្របច្ចេកវិទ្យាសាកភ្លើងល្បឿនលឿនកំលាំង 25W។ សម្រាប់ម៉ូដែល iPhone 13 Pro ទាំងពីរនឹងមានអេក្រង់កម្រិត 120Hz ProMotion LTPO-AMOLED។ ហើយអ្វីដែលមានការចាប់អារម្មណ៍បំផុតនោះគឺមានការលើកឡើងថា iPhone 13 Series នឹងបំពាក់មុខងារថ្មីហៅថា Low Earth Orbit (LEO) ដែលអាចធ្វើការខល ផ្ញើសារ និងប្រើអ៊ីនធ័រណិតបានទោះបីជាទូរស័ព្ទគ្មានសេវាក៏ដោយ។ iPhone 13 Series នឹងដំឡើងមកជាមួយប្រតិបត្តិការជំនាន់ថ្មី iOS15។
Apple Watch Series 7
តួរអង្គសំខាន់បន្ទាប់ពី iPhone 13 Series គឺ Apple Watch Series 7 នេះឯង។ សម្រាប់នាឡិកាដៃឆ្លាតវៃជំនាន់ថ្មីនេះត្រូវបានប្រភពនិយាយថា នឹងមានការផ្លាស់ប្តូរទម្រង់នៃការរចនាខុសពីជំនាន់ Series 6 បន្តិច មានអេក្រង់ទំហំធំជាងជាប្រភេទ Flat-edge Screen ជាមួយជម្រើសខ្នាត 41mm និង 45mm ព្រមទាំងមានកម្រាស់តួរស្តើងជាងមុនផងដែរ។ Apple Series 7 ក៏នឹងបំពាក់មកជាមួយបន្ទះឈីបថ្មី Apple S7 ខ្នាត 5nm មានរន្ធបញ្ចេញសំឡេងថ្មី រួមជាមួយមុខងារតាមដានសុខភាព និងកីឡាថ្មីៗផងដែរ។ ប៉ុន្តែ ប្រភពបានបញ្ជាក់ថា Apple អាចនឹងពន្យាពេលក្នុងការដាក់ឲ្យបញ្ជាទិញ Apple Watch Series 7 ដោយសារតែក្រុមហ៊ុនបានជូបប្រទះបញ្ហាប្រឈមមួយចំនួននៅក្នុងសង្វាក់ផលិតកម្មនាឡិកាឆ្លាតវៃជំនាន់ថ្មីនេះ។
ក្រៅពីផលិតផលដែលជាតួរអង្គរសំខាន់ទាំងពីរខាងលើនេះ Apple ក៏អាចនឹងដាក់បង្ហាញចេញនូវកាសស្តាប់ឥតខ្សែស៊េរីថ្មី AirPods 3 និង iPad ជំនាន់ថ្មីអាចជា iPad mini ផងដែរ រួមជាមួយនឹងផលិតផល ecosystem ជំនាន់ថ្មីៗដែលមានដូចជា iOS15, WatchOS 8, និង TvOS 15 ជាដើម។ ចំនែកម៉ាស៊ីនកុំព្យូទ័រ MacBook ជំនាន់ថ្មីជាមួយនឹង MacOS Monterey ជំនាន់ថ្មីអាចនឹងមិនបង្ហាញវត្តមានក្នុងថ្ងៃទី 14 កញ្ញា នោះទេ គឺអាចពន្យាពេលប្រកាសដល់ខែបន្ទាប់ (តុលា) ឆ្នាំ 2021៕
