តាមរូបភាពគំរូថ្មីរបស់ iPhone 14 Pro Max ទំនងប្រហែលជាមិនមានបំពាក់នូវ Notch និងគែមព័ទ្ធកាមេរ៉ាផុសនោះទេ

នៅសប្តាហ៍ក្រោយនេះ ថ្ងៃទី 14 ខែកញ្ញា ក្រុមហ៊ុន Apple នឹងរៀបចំនូវព្រឹត្តិការណ៍មួយដើម្បីប្រកាសបង្ហាញនូវវត្តមានរបស់ស្មាតហ្វូន iPhone 13 ។ វាមានព័ត៌មានជាច្រើនដែលបានទម្លាយថា ស្មាតហ្វូននេះនឹងមិនប្រើប្រាស់នូវលេខ 13 នោះទេ ប៉ុន្តែក្រុមហ៊ុន Apple បានបញ្ជាក់ថា ខ្លួននឹងប្រើប្រាស់នូវលេខ 13 នេះ សម្រាប់ស្មាតហ្វូនរបស់ខ្លួន។ នេះមានន័យថា នៅឆ្នាំក្រោយនេះ យើងនឹងទទួលបាននូវស្មាតហ្វូន iPhone 14 series ហើយនៅថ្ងៃនេះ យើងបានឃើញនូវរូបភាព iPhone 14 Pro Max ផងដែរ។ 

ដូចអ្វីដែលអ្នកអាចមើលឃើញនោះ ការឌីស្សាញរបស់ស្មាតហ្វូននេះគឺខុសប្លែកពីអ្វីដែលបានប្រើប្រាស់នៅលើស្មាតហ្វូន iPhone ជំនាន់មុនៗដោយសារតែពេលនេះស្មាតហ្វូននេះមិនមាន notch នោះទេ ប៉ុន្តែវាមានអេក្រង់ punch-hole selfie ។ ស្មាតហ្វូននេះនឹងមិនមានស៊ុមគែមកាមេរ៉ាផុសឡើងទៀតនោះទេ។ ស្មាតហ្វូននេះមើលទៅពិតជាស្រស់ស្អាត ហើយនឹងស្តើងផងដែរ។ ការដកចេញនូវ notch ចេញពីអេក្រង់នេះមិនមែនមានន័យថា បច្ចេកវិទ្យា Face ID ទៅបាត់នោះទេ។ ប្រភពនេះអះអាងថាសេនស័រជាច្រើនទៀតគឺលាក់នៅក្រោមអេក្រង់។ នៅផ្នែកខាងក្រោមរបស់ស្មាតហ្វូននេះកឺមាន Lighting និង USB-C។

រូបភាពបែកធ្លាយនេះ មិនមែនចេញពីក្រុមហ៊ុន Apple នោះទេ ប៉ុន្តែវាគ្រាន់តែផ្អែកនៅលើពាក្យចចាមអារ៉ាមដែលបែកធ្លាយ និងចេញជាគំនូសព្រាងប៉ុណ្ណោះ។ សម្រាប់ពណ៌របស់ស្មាតហ្វូននេះនៅមិនទាន់ដឹងនៅឡើយទេ។ ស្មាតហ្វូន iPhone 14 Pro Max នឹងមានអេក្រង់ទំហំ 6.7-inch និងកាមេរ៉ាគោលទំហំ 48 MP ជាមួយនឹងការទ្រទ្រង់នូវវីដេអូថតកម្រិត 8K ផងដែរ៕