កាលពីខែមុននេះ ក្រុមហ៊ុន Honor បានប្រកាសចេញនូវស្មាតហ្វូន Honor X20 5G ដែលមានបំពាក់មកជាមួយនូវអេក្រង់កម្រិត 120Hz refresh rate ហើយនិងមានកាមេរ៉ាក្រោយចំនួន 3 គ្រាប់ ព្រមជាមួយនិងបន្ទះឈីប Dimensity 900 SoC។ នៅពេលនេះ មានព័ត៌មានថ្មីថា ក្រុមហ៊ុន Honor បានត្រៀមខ្លួនក្នុងការប្រកាសចេញនូវស្មាតហ្វូនថ្មីមួយទៀតរបស់ខ្លួន ដែលមានឈ្មោះហៅថា Honor X20 Max។ នៅថ្ងៃនេះ អ្នកទម្លាយព័ត៌មាននេះក៏បានទម្លាយនូវលក្ខណៈសម្បត្តិជាច្រើនរបស់ស្មាតហ្វូននេះផងដែរ។
តាមការបញ្ជាក់របស់អ្នកទម្លាយរូបនេះ គឺបាននិយាយថា ស្មាតហ្វូន Honor X20 Max នេះ មានលេខម៉ូឌែល KKG-AN70 និងកូដឈ្មោះ “King Kong” ដែលដូចទៅនឹងស្មាតហ្វូន Honor X10 Max ជំនាន់មុនរបស់ខ្លួនអញ្ចឹងដែរ។ ស្មាតហ្វូនថ្មីនេះ ត្រូវបានក្រុមហ៊ុនបំពាក់នូវឧបាល័រចំនួនពីរគ្រាប់ Dual Speakers ថែមទៀតផង។ ស្មាតហ្វូន Honor X20 Max នេះជាប្រភេទស្មាតហ្វូន 5G ដែលមានអេក្រង់ទំហំធំរហូតដល់ទៅ 7.2 អ៊ីង ខណៈដែលស្មាតហ្វូនជំនាន់មុនរបស់វា គឺមានអេក្រង់ទំហំ 7 អ៊ីង ជាមួយនឹងកម្រិតភាពច្បាស់ FHD+។
ស្មាតហ្វូនជំនាន់ថ្មីនេះ ត្រូវបានគេបង្ហាញថា គឺនឹងមានបន្ទះឈីប MediaTek Dimenstiy 1100 SoC ថាមពលថ្មទំហំ 6,000mAh និងបច្ចេកវិទ្យាសាកថ្មលឿន 66W fast charging technology ផងដែរ។ ក្រៅពីនេះ ស្មាតហ្វូននេះនឹងមានការពង្រឹងទៅលើកាមេរ៉ារបស់វាផងដែរ។ ស្មាតហ្វូនជំនាន់មុន X10 Max នេះ មានកាមេរ៉ាភ្លោះទំហំ 48MP + 2MP ប៉ុណ្ណោះ។ ជាមួយនឹងការបង្ហាញវត្តមានរបស់ស្មាតហ្វូន X20 ថ្មីនេះ គឺមានកាមេរ៉ា 3 គ្រាប់ ដែលមានទំហំ 64MP, 2MP Depth Sensor និងកាមេរ៉ា 2MP Macro ផងដែរ។ ស្មាតហ្វូន X20 Max អាចនឹងមានបច្ចេកវិទ្យា RAM expansion technology ផងដែរ៕