ស្មាតហ្វូនជំនាន់ថ្មីម៉ូដែល realme GT Neo 2 Series នឹងមកដល់ផ្លូវការណ៍នៅថ្ងៃទី 22 ខែកញ្ញាខាងមុខនេះ។ ហើយក្នុងថ្ងៃនេះដែរអគ្គនាយករងរបស់ realme លោក Xu Qi Chase បានធ្វើការចែករំលែកចេញនូវរូបភាព GT Neo 2 ដែលមានពណ៌លឿងខ្ចីលាយជាមួយឆ្នូតបញ្ឈរពណ៌ខ្មៅហៅថា Black Mint Color។ សម្រាប់ពណ៌ថ្មីនេះគឺមើលទៅពិតជាមានភាពស្រស់ស្រាយមែនទែនតែម្តង ហើយក៏បង្កើនពីសម្រស់ស្រស់ស្អាតទូរស័ព្ទឲ្យមានភាពទាក់ទាញខ្លាំងផងដែរ។
លោក Xu Qi Chase ក៏បានបង្ហើបឲ្យដឹងផងដែរថាសម្រាបផ្ទៃខ្នងខាងក្រោយដែលរំលេចដោយពណ៌ Black Mint ថ្មីនេះគឺត្រូវបានស្រោបឡើងដោយកញ្ចក់ប្រភេទ AG Glass ប៉ុន្តែលោកមិនបានបង្ហើបពីគុណសម្បត្តិរបស់ស្មាតហ្វូនជំនាន់ថ្មីនេះទេ។ យ៉ាងណាមិញបើតាមការបង្ហាញនៅលើបញ្ចីវិញ្ញាបនប័ត្ររបស់ស្ថាប័ន TENAA បានប្រាប់ឲ្យដឹងថា realme GT Neo 2 គឺមានអេក្រង់ទំហំ 6.62 អ៊ីញជាប្រភេទ AMOLED Display មានកម្រិតបង្ហាញ FHD+។
ហើយបើតាមប្រភពព័ត៌មានចចាមអារាមអេក្រង់របស់ GT Neo 2 គឺនឹងមានល្បឿន refresh rate 120Hz។ ហើយអេក្រង់របស់ស្មាតហ្វូននេះគាំទ្របច្ចេកវិទ្យាស្កែនដោះសោរក្រោមអេក្រង់ និងមានលែនទំលុះមួយគ្រាប់ស្ថិតនៅជិតកែងខាងឆ្វេងដែលជាសែនស័រសែលហ្វីទំហំ 16MP។ ជាមួយគ្នាដែរសម្រាប់ប្រព័ន្ធកាមេរ៉ាខាងក្រោយគឺមានចំនួន 3 គ្រាប់ទំហំ 64MP Main + 8MP Ultra-wide និង 2MP Macro។
ដោយឡែកនៅលើបញ្ចីរបស់ Geekbench វិញបានបង្ហាញថា realme GT Neo 2 ប្រើបន្ទះឈីប Snapdragon 870 SoC ប្រតិបត្តិការដោយ Android 11 ជាមួយ realme UI2.0, មានរ៉េមទំហំ 6GB/8GB ដល់ 12GB និងមានម៉េមូរីក្នុងម៉ាស៊ីនទំហំចាប់ពី 128GB/256GB ដល់ 512GB ផងដែរ។ សម្រាប់ថ្មវិញស្មាតហ្វូនជំនាន់ថ្មីនេះអាចមានទំហំ 5,000mAh និងគាំទ្របច្ចេកវិទ្យាសាកភ្លើងល្បឿនលឿនកំលាំង 65W នេះបើតាមការបញ្ជាក់នៅលើវិញ្ញាបនប័ត្រ 3C របស់ប្រទេសចិន៕
