គិតចាប់តាំងពីមុខងារ eSIM បានក្លាយជានិន្នាការថ្មីមួយដែលមានការពេញចនិយមសម្រាប់ក្រុមហ៊ុនធំៗជាច្រើននោះ បានធ្វើអោយស្មាតហ្វូនជាច្រើនកាន់តែទទួលបានការចាប់អារម្មណ៍កាន់តែខ្លាំងជាងមុននៅក្នុងការប្រើប្រាស់បណ្តាញទូរស័ព្ទចល័តបានច្រើនប្រព័ន្ធក្នុងទូរស័ព្ទតែមួយ។ កន្លងមក ក្រុមហ៊ុន Apple ក៏បានយកមកបំពាក់នៅលើ iPhone ផងដែរ បានធ្វើអោយអ្នកប្រើប្រាស់មានការពេញចិត្តជាខ្លាំងជាមួយ iPhone ដោយពួកគេគ្រប់គ្នាអាចប្រើប្រាស់ SimCard ពីរបាននៅលើស្មាតហ្វូននេះ ដោយមួយប្រើ Simcard ធម្មតា និងមួយទៀតប្រើប្រាសជាមួយនិង eSim។
ជាមួយនឹងការប្រកាសចេញនូវម៉ូដែលកាលពីយប់មិញនេះ អ្នកប្រើប្រាស់ គឺនឹងមានភាពងាយស្រួលច្រើងជាងមុនថែមទៀត តាមរយៈមុខងារថ្មី ដែលក្រុមហ៊ុនអាមេរិកាំងមួយនេះបាននាំមកសម្រាប់ពេលនេះ។ នៅក្នុងចំណោមទូរស័ព្ទស៊េរីថ្មី iPhone 13, iPhone 13 mini, iPhone 13 Pro និង iPhone 13 Pro Max គឺមិនត្រឹមតែមានការប្រើប្រាស់ SimCard និង eSim បានក្នុងពេលតែមួយនោះទេ គឺស្មាតហ្វូនទាំងអស់នេះ អាចប្រើប្រាស់នូវមុខងារថ្មី Dual eSIM functionality បានថែមទៀតផង មានន័យថា អ្នកប្រើប្រាស់អាចប្រើ eSIMs បាននៅលើទូរស័ព្ទទាំងនេះ ដោយមិនចាំបាច់សូកបញ្ចូល SimCard នោះទេ។
គួរបញ្ជាក់ផងដែរថា បើទោះបីជាវាអាចប្រើប្រាស់មុខងារថ្មីនេះ បានមែនប៉ុន្តែ នៅក្នុងឯកសាររបស់ក្រុមហ៊ុន Apple គឺមាននិយាយថា អ្នកប្រើប្រាស់មិនអាចបន្ថែម SimCard ជាមួយនិង Dual eSims សម្រាប់ប្រើប្រាស់សេវា 3 ប្រព័ណន្ធបាននោះទេ។ ដូច្នេះ កុំសង្ឃឹមជឿជាក់ថា iPhone អាចប្រើប្រាស់ SimCard បានបីអោយសោះ។ សម្រាប់ទូរស័ព្ទដ៏មានប្រជាប្រិយភាពមួយនេះ គឺត្រឹមតែអាចប្រើប្រាស់នូវ SimCard បានពីរដដែល គឺមិនអាចបានច្រើនជាងនេះឡើយ។