ក្រុមហ៊ុនម៉ាកយីហោ realme ដែលមានកំណើនលឿនបំផុតរបស់ពិភពលោកទៅលើស្មាតហ្វូនថ្នាក់កណ្តាល និងស្មាតហ្វូនលំដាប់ថវិកាពេលនេះ បាននឹងកំពុងតែបោះជំហានថ្មីមួយទៀតហើយទៅក្នុងការប្រកួតប្រជែងទីផ្សារស្មាតហ្វូនប្រភេទប្រណិត ឬហៅថាកំរិត Premium នោះ។ យោងតាមការចុះផ្សាយនៅក្នុងព័ត៌មានចុងក្រោយបំផុត គឺបាននិយាយថា ក្រុមហ៊ុនបុត្រសម្ព័ន្ធរបស់ក្រុមហ៊ុន OPPO មួយនេះ គ្រោងនឹងបញ្ចេញនូវស្មាតហ្វូនប្រណិតរបស់ខ្លួននៅឆ្នាំក្រោយនេះ។
បើតាមការបញ្ជាក់នៅក្នុង Digital Chat Station គឺបាននិយាយថា ប្រភពដែលអាចជឿជាក់បានមួយចេញពីប្រទេសចិន បានបញ្ជាក់ថា ក្រុមហ៊ុន Realme នឹងប្រកាសបង្ហាញនូវស្មាតហ្វូនដំបូងបំផុតរបស់ខ្លួនដែលមានអេក្រង់ 2K។ ស្មាតហ្វូននេះមានបច្ចេកវិទ្យាសាកថ្ម 100W+ fast charging ផងដែរ។ ចាប់តាំងពីក្រុមហ៊ុននេះបានប្រើប្រាស់នូវបច្ចេកវិទ្យាសាកថ្មលឿន 125W ហើយនោះ ស្មាតហ្វូន realme នាពេលខាងមុខនេះនឹងមានការទ្រទ្រង់នូវបច្ចេកវិទ្យាសាកថ្មនេះផងដែរ ដែលបច្ចេកវិទ្យានេះមានឈ្មោះហៅថា 125W UltraDART ខណៈពេលដែលបច្ចេកវិទ្យាសាកថ្មរបស់ OPPO Version គឺមានឈ្មោះហៅថា 125W flash charge ។
គួរបញ្ជាក់ផងដែរថា ថ្មីៗនេះ ក្រុមហ៊ុន Xiaomi គឺបានប្រើប្រាស់នូវបច្ចេកវិទ្យាសាកថ្មល្បឿនលឿនកម្លាំង 120W Fast Charging រួចហើយដែលប្រើប្រាស់នៅលើស្មាតហ្វូន Xiaomi 11T Series របស់ខ្លួននោះ។ យើងនឹងរង់ចាំព័ត៌មានជាច្រើនទៀតរបស់ស្មាតហ្វូនប្រណិតរបស់ realme នេះ ដែលនឹងទម្លាយនៅក្នុងពេលខាងមុខផងដែរ៕