អ្វីដែលអ្នកគាំទ្រទូរស័ព្ទ iPhone បានទន្ទឹងរងចាំគឺបានមកដល់ហើយ…ដោយ Apple បានប្រកាសចេញទូរស័ព្ទ iOS ជំនាន់ថ្មីរបស់ខ្លួនគឺ iPhone 13 Series ជាផ្លូវការណ៍កាលពីយប់មិញនេះ។ មិនខុសពីឆ្នាំមុននោះទេដោយ iPhone 13 Series គឺមានចំនួន 4 ម៉ូដែលមាន iPhone 13, 13 mini, 13 Pro និង 13 Pro Max។ ហើយក្នុងអត្ថបទនេះគេហទំព័រពិភពអេឡិចត្រូនិកសូមនិយាយពីចំនុចពិសេសៗដែលមាននៅលើបងធំ 13 Pro ទាំងពីរស៊េរីនេះប៉ុណ្ណោះ ចំនែកប្អូន 13 ពីរទៀតនឹងចេញតាមក្រោយ។
ទំហំអេក្រង់ដដែលតែបង្រួមឆកតូច និងល្បឿនលឿនជាងមុន
បើយើងពិនិត្យទៅលើការរចនារូបរាងខាងក្រៅរបស់ iPhone 13 Pro និង 13 Pro Max គឺមិនខុសពីជំនាន់ iPhone 12 Pro និង 12 Pro Max ដែលចេញឆ្នាំមុននោះទេ ប៉ុន្តែចំនុចដែល Apple បានធ្វើការកែប្រែបន្ថែមពីជំនាន់មុននោះគឺការពង្រួមឆកអេក្រង់ខាងលើ iPhone 13 Pro Series ឲ្យតូចជាងមុន និងលេងរចនាបថកញ្ចប់លែនជាមួយនឹងភ្នែកកាមេរ៉ាធំជាងមុនបន្តិច។ បើតាមការបញ្ជាក់ពី Apple ផ្នែកឆកអេក្រង់របស់ iPhone 13 Pro និង 13 Pro Max មានទំហំរួមតូចជាងមុនដោយសារតែកាមេរ៉ា Depth Sensor បានពង្រួមទំហំតូចជាងមុន 20% ហើយអេក្រង់របស់ iPhone 13 Pro ទាំងពីរនេះក៏មានពន្លឺប្រសើរជាងមុន 25% ផងដែរនៅពេលប្រើក្រោមពន្លឺថ្ងៃ។ iPhone 13 Pro និង 13 Pro Max គឺនៅតែរក្សាស៊ុមជុំវិញបែបទាលជាប្រភេទ Stainless Steel Frame និងបំពាក់នូវប្រព័ន្ធការពារទឹក និងធូលីកម្រិត IP68 ដូចមុនដដែល។
មកលើផ្នែកអេក្រង់វិញនៅតែរក្សាទំហំដូចជំនាន់មុនដដែលគឺទំហំ 6.7 អ៊ីញនៅលើម៉ូដែល iPhone 13 Pro Max និងទំហំ 6.1 អ៊ីញនៅលើម៉ូដែល iPhone 13 Pro។ បន្ទះអេក្រង់របស់បងធំ iPhone 13 ទាំងពីរនេះគឺជាប្រភេទ Super Retina HDR Display ប្រើនូវបច្ចេកវិទ្យាអេក្រង់ OLED ដែលគាំទ្រកម្រិតល្បឿន ProMotion refresh rate 120Hz ពេញប៊ឹបតែម្តង។ ទោះជាយ៉ាងណា Apple ក៏ផ្តល់នូវជម្រើសឲ្យយើងកំនត់កម្រិតល្បឿន refresh rate នៅលើអេក្រង់របស់ iPhone 13 Pro Series ផងដែរគឺពី 10Hz ដល់ 120Hz តម្រូវតាមការប្រើប្រាស់ជាក់ស្តែងដើម្បីជួយសន្សំសំចៃការប្រើប្រាស់ថាមពលថ្ម។ ជាមួយគ្នានេះដែរអេក្រង់របស់បងធំ 13 Pro ទាំងពីរក៏គាំទ្រនូវមុខងារ True-tone, Dolby Vision ជាមួយកម្រិតពន្លឺ 1000nits និងឡើងខ្ពស់អស់ដល់ 1200nits ដោយស្វ័យប្រវត្តិនៅពេលប្រើក្រោមពន្លឺថ្ងៃខ្លាំង ហើយនិងស្រោបការពារដោយកញ្ចក់ Ceramic Shield ផងដែរ។
ប្រព័ន្ធកាមេរ៉ាថ្មីធ្វើការកាន់តែប្រសើរជាងមុន
សម្រាប់ទម្រង់កាមេរ៉ានៅលើ iPhone 13 Pro និង 13 Pro Max គឺរក្សារចនាបថដូចនៅលើជំនាន់ iPhone 12 Pro និង 12 Pro Max ដែរ ប៉ុន្តែ កញ្ចប់លេន និងភ្នែកកាមេរ៉ាមានទំហំធំជាងមុនបន្តិច។ ភ្នែកកាមេរ៉ាទាំង 3 គ្រាប់ គឺប្រើប្រាស់សែនស័រទំហំ 12MP ដូចៗគ្នា។ ដោយនៅលើលែនគោល និងលែន Ultra-wide គឺបានបង្កើនទំហំ aperture ធំជាងមុនគឺ f/1.5 (7-layer) និង f/1.8 (6-layer)។ បើតាមការអះអាងពី Apple នៅលើលែនគោលរបស់ iPhone 13 Pro Series គឺធ្វើការស្រូបពន្លឺបានប្រសើរជាងលែនគោលនៅលើ iPhone 12 Pro Series ប្រមាណជា 2.2 ដងនៅទីតាំងពន្លឺទាប។ រីឯលែន Ultraឥwide គឺធ្វើការស្រូបពន្លឺបានប្រសើរជាងមុនដល់ទៅ 92% នៅពេលថតនៅទីតាំងពន្លឺទាបហើយក៏គាំទ្រនូវមុខងារ Autofocus ថែមទៀតផង។
មិនទាន់អស់ទេសម្រាប់លែន Ultra-wide របស់ iPhone 13 Pro Series ក៏ដើរតួរជាលែន Macro ផងដែរនៅពេលដែលយើងចង់ផ្តិតយករូបភាពវត្ថុតូចៗនៅជិតបំផុត។ ហើយសម្រាប់លែន Telephoto ខ្នាត 77mm វិញ គឺមាន Aperture f/2.8 អាចពង្រីកប្លង់ថតបែប Optical-zoom បាន 3x។ រីឯសែនស័រ LiDAR ក៏មានសមត្ថភាពខ្លាំងជាងមុនថែមទៀតផង។ សម្រាប់លែនកាមេរ៉ាទាំង 3 គ្រាប់នៅលើ iPhone 13 Pro និង 13 Pro គឺគាំទ្រមុខងារ Night Mode ផងដែរ។ សម្រាប់សមត្ថភាពផលិតវីដេអូវិញទូរស័ព្ទ iOS ជំនាន់ថ្មីទាំងពីរនេះអាចធ្វើបានកម្រិត 4K@30fps/60fps គាំទ្រមុខងារ Dolby Vision HDR, ProRes video និងប្រព័ន្ធទប់លំនឹង Sensor shift Stabilization រួមជាមួយមុខងារកំនត់ការថតជាថ្មីជាច្រើនទៀតដូចជា Cinematic Mode, TrueDepth Camera និង Photographic Style ជាដើម។
ប្រើបន្ទះឈីបថ្មីសមត្ថភាពកាន់តែខ្លាំងជាងមុន
ឥលូវយើងនិយាយពីបន្ទះឈីបថ្មី A15 Bionic នៅលើ iPhone 13 Pro និង 13 Pro Max វិញម្តង។ សម្រាប់បន្ទះឈីបជំនាន់ថ្មី A15 Bionic នេះគឺផលិតឡើងតាមស្តង់ដារ 5nm ដូចជំនាន់ A14 Bionic ដែរ ប៉ុន្តែ Apple បានបញ្ជាក់ថា A15 Bionic គឺមានកម្រិត transistors ខ្ពស់ដល់ទៅ 15 ពាន់លាន transistors ឯណោះ បើធៀបនឹង A14 Bionic គឺមានត្រឹម 11.8 ពាន់លាន transistors ប៉ុណ្ណោះ។ ជាមួយ transistors ខ្ពស់នេះ Apple បានរចនាជាមួយអង្គ CPU 2+4 Core ដែល CPU 2-core មានកំលាំងខ្លាំង និងធ្វើការបានខ្លាំងជាងមុនដល់ទៅ 50% បើធៀបនឹង CPU នៅលើឈីប A14 Bionic។ ចំពោះផ្នែក GPU វិញគឺបានបង្កើនឡើងដល់ 5-Core និងប្រើនូវប្រព័ន្ធ Neural Engine ដែលមានល្បឿន TOPS ឡើងដល់ 15.8ធៀបនឹងឈីប A14 Bionic ដែលមាន GPU កម្រិត 4-Core មានល្បឿន TOPS ត្រឹម 11 ប៉ុណ្ណោះ។ សម្រាប់ទំហំថ្មនៅលើ iPhone 13 Pro និង 13 Pro Max មិនត្រូវបាន Apple បញ្ជាក់ឲ្យដឹងនោះទេ គ្រាន់តែប្រាប់ឲ្យដឹងថាថ្មរបស់ iPhone 13 Pro គឺមានសមត្ថភាពកាន់ថាមពលប្រើប្រាស់បានយូរជាងមុន 1.5 ម៉ោង និងថ្មរបស់ iPhone 13 Pro Max កាន់ថាមពលប្រើបានយូរជាងមុន 2.5 ម៉ោង។ ហើយសម្រាប់ល្បឿនសាកថ្មវិញ គឺនៅត្រឹម 20W សម្រាប់ការសាកតាមខ្សែ Lightning និង 15W សម្រាប់ការសាកតាមបន្ទះ MagSafe។
ទំហំផ្ទុក ជម្រើសពណ៌ តម្លៃ និងថ្ងៃចេញលក់
ចំពោះទំហំផ្ទុកនៅលើ iPhone 13 Pro និង 13 Pro Max គឺមានជម្រើសម៉េមូរីផ្ទុកក្នុងម៉ាស៊ីនចាប់ពីទំហំ 128GB/256GB/512GB និងធំបំផុតដល់ 1TB។ iPhone 13 Pro Series មានជម្រើស 4 ពណ៌ គឺប្រផេះ ហៅថា Graphite, ពណ៌មាស Gold, ពណ៌ទឹកប្រាក់ Silver និងពណ៌ខៀវថ្មីហៅថា Sierra Blue។ Apple នឹងបើកឲ្យអតិថិជនធ្វើការបញ្ជាទិញទូរស័ព្ទ iOS ជំនាន់ថ្មីនេះបានចាប់ពីថ្ងៃសុក្រទី 17 កញ្ញា ឆ្នាំ 2021 ហើយសម្រាប់ការចេញលក់ផ្លូវការណ៍លើកដំបូងនឹងត្រូវធ្វើឡើងនៅថ្ងៃទី 24 កញ្ញា ឆ្នាំ 2021។ សម្រាប់តម្លៃវិញម៉ូដែល iPhone 13 Pro គឺខ្ទង់ចាប់ពី $999 និងម៉ូដែល iPhone 13 Pro Max គឺខ្ទង់ចាប់ពី $1,099 ឡើងទៅ៕
