Apple ទើបតែបានប្រកាសចេញ iPad លំដាប់ថវិកាជំនាន់ថ្មីរបស់ខ្លួនចំនួនពីរម៉ូដែលគឺ iPad mini 6 (2021) និង iPad 10.2 (2021) ។ ហើយខាងក្រោមនេះគឺជាគុណសម្បត្តិរបស់ iPad ជំនាន់ថ្មីទាំងពីរម៉ូដែលនេះ៖
Apple iPad 10.2 (2021)
សម្រាប់ iPad ជំនាន់ថ្មីនេះគឺមានអេក្រង់ទំហំ 10.2 អ៊ីញប្រភេទ Retina IPS LCD មានគែម bezel លើក្រោមអេក្រង់រាងក្រាសបន្តិចហើតនៅខាងលើមានបង្កប់កាមេរ៉ាសែលហ្វីមួយគ្រាប់ និងខាងក្រោមបានកងប៊ូតុង Touch ID។ អេក្រង់របស់ iPad 10.2 (2021) គាំទ្រកម្រិតបង្ហាញចេញ 1620 x 2160px លើខ្នាត 4:3 ratio មានដង់ស៊ីតេភាពច្បាស់ 256ppi និងកម្រិតពន្លឺ 500nits។ បន្ថែមពីនេះអេក្រង់របស់ iPad 10.2 ជំនាន់ថ្មីនេះក៏គាំទ្រការចុចបញ្ជាជាមួយប៊ិច Apple Pencil ជំនាន់ថ្មីជាមួយមុខងារ TrueTone Display ថែមទៀតផង។
iPad 10.2 (2021) ដំណើរការលើបន្ទះឈីប A13 Bionic ដែលមានសមត្ថភាពប្រើការខ្លាំងជាង A12 Bionic លើជំនាន់ឆ្នាំ 2020 ប្រមាណ 20%។ iPad 10.2 ស៊េរីឆ្នាំ 2021 ក៏បានបង្កើនទំហំផ្ទុកចាប់ពី 64GB ឡើងដល់ 256GB ផងដែរ។ Apple បានដំឡើងប្រព័ន្ធកាមេរ៉ាសែលហ្វីនៅលើ iPad 10.2 (2021) ឡើងដល់ 12MP ជាប្រភេទកាមេរ៉ា Ultra-wide 120 ដឺក្រេ និងមានកាមេរ៉ាក្រោយទំហំ 8MP។ iPad 10.2 (2021) មានជម្រើសម៉ូដែលប្រើស៊ីមកាតគាំទ្រសេវា 4G LTE និងជម្រើសប្រើ Wi-Fi Only។ iPad 10.2 ជំនាន់ថ្មីនេះមានជម្រើសពណ៌ទឹកប្រាក់ និងពណ៌ប្រផេះ។
Apple iPad mini 6 (2021)
ចំពោះ iPad mini 6 ស៊េរីឆ្នាំ 2021 នេះវិញត្រូវបានរចនាឡើងបែប Flat Edges Design និងមានស៊ុមជុំវិញទាលស្មើរជ្រុងដូចគ្នាទៅនឹង iPhones និង iPad Pro ជំនាន់ថ្មីដែរ។ iPad mini 6 ឆ្នាំ 2021 នេះមានអេក្រង់ធំជាងមុនឡើងដល់ 8.3 អ៊ីញ ធៀបនឹង iPad mini ស៊េរីឆ្នាំ 2019 ដែលមានទំហំ 7.9 អ៊ីញ។ បន្ទះអេក្រង់របស់ iPad mini 6 ឆ្នាំ 2021 មានផ្ទៃលាតធំជាមួយគែមជុំវិញអេក្រង់រួមតូចស្តើងផងដែរ។ ជាមួយការរចនាគែមអេក្រង់តូចស្តើងនេះ Apple ក៏បានលើកយកសែនស័រ Touch ID មកដាក់នៅលើប៊ូតុងបិទបើកដែលស្ថិតនៅខាងលើជិតកែងខាងស្តាំវិញ។ បន្ទះអេក្រង់របស់ iPad mini 6 (2021) គាំទ្រកម្រិតបង្ហាញចេញ 1488 x 2266px លើខ្នាត 3:2 ratio ជាមួយកម្រិតពន្លឺ 500nits និងដង់ស៊ីតេភាពច្បាស់ 327ppi ហើយក៏គាំទ្រមុខងារ TrueTone Display រួមនឹងការប្រើជាមួយប៊ិច Apple Pencil 2 ផងដែរ។
Apple iPad mini 6 ស៊េរីឆ្នាំ 2021 បំពាក់មកជាមួយបន្ទះឈីប 5G ថ្មី A15 Bionic ដូច iPhone 13 Series ដែរ។ iPad mini 6 ជំនាន់ថ្មីនេះមានជម្រើសម៉ូដែលទំហំ 64GB ដល់ 256GB។ សម្រាប់ CPU នៅលើឈីប A15 Bionic គឺមានល្បឿនប្រតិបត្តិការខ្លាំងជាងមុន 40% និងមាន GPU លឿនជាងមុន 50% ធៀបនឹងឈីប A14 Bionic នៅលើ iPhone 12 Series។
iPad mini 6 ឆ្នាំ 2021 បំពាក់សែនស័រទំហំ 12MP ទាំងកាមេរ៉ាមុខ និងកាមេរ៉ាក្រោយ ដែលកាមេរ៉ាក្រោយមាន aperture f/1.8 និងមានអំពូលភ្លើង True-tone Flash មួយគ្រាប់ផងដែរ។ ជាមួយគ្នាដែរ iPad mini 6 (2021) បានប្រើនូវរន្ធដោតសាកថ្មប្រភេទ USB-C3.1 ជំនួសឲ្យរន្ធ Lightning ថែមទៀតផង។ សម្រាប់ប្រព័ន្ធ Speaker បំពងសំឡេងវិញក៏ឡើងដល់ 2 គ្រាប់ជាប្រភេទ Stereo Speaker។ iPad mini 6 (2021)មានជម្រើសពណ៌ស្វាយ ផ្កាឈូក ប្រផេះ និងពណ៌មាសស្រាលហៅថា Starlight។ iPad ជំនាន់ថ្មីស៊េរីឆ្នាំ 2021 ទាំងពីរខាងលើនេះប្រតិបត្តិការដោយ iPadOS15 ចេញពីប្រអប់ដូចគ្នា។
Apple បានប្រកាសដាក់ឲ្យធ្វើការបញ្ជាទិញបានមុនសម្រាប់ iPad ជំនាន់ថ្មីទាំងពីរស៊េរីខាងលើនេះចាប់ពីថ្ងៃនេះទៅ ហើយការនាំចេញនឹងធ្វើឡើងនៅថ្ងៃទី 24 ខែ កញ្ញា ខាងមុខនេះ។ iPad 10.2 (2021) មានតម្លៃខ្ទង់ $329 សម្រាប់ម៉ូដែល Wi-Fi Only និងខ្ទង់ $459 សម្រាប់ម៉ូដែលប្រើស៊ីមកាត។ ចំនែកឯ iPad mini 6 (2021) មានតម្លៃខ្ទង់ $449 សម្រាប់ម៉ូដែល Wi-Fi Only និងខ្ទង់ $649 សម្រាប់ម៉ូដែលប្រើស៊ីមកាត។ ហើយតម្លៃពួកវានឹងឡើងខ្ពស់ជាងនេះប្រសិនបើជ្រើសរើសម៉ូដែលទំហំ 256GB៕