ក្រុមហ៊ុនផលិតស្មាតហ្វូនដែលបុត្រសម័្ពន្ធរបស់ vivo គឺ iQOO បានប្រកាសចេញស្មាតហ្វូនស៊េរី Z3 5G របស់ខ្លួនកាលពីអំឡុងខែមិនាកន្លងទៅនៅប្រទេសចិន និងបានប្រកាសចេញលក់នៅលើទីផ្សារសកលនៅអំឡុងខែមិថុនាផងដែរ។ យ៉ាងណាមិញក្នុងរយះពេលជិត 6 ខែមកនេះក្រុមហ៊ុន iQOO ក៏ត្រៀមប្រកាសចេញអ្នកស្នងតំណែងរបស់ Z3 5G ផងដែរ ដែលត្រូវបានគេដឹងថាជាម៉ូដែល iQOO Z5 នេះឯង។ ហើយបើតាមប្រភពបានឲ្យដឹងថា iQOO Z5 នឹងមកដល់ផ្លូវការណ៍នៅថ្ងៃទី 23 ខែកញ្ញាខាងមុខនេះ។
បើតាមប្រភពព័ត៌មានក៏បានបង្ហើបចេញពីគុណសម្បត្តិខ្លះៗរបស់ iQOO Z5 ស្មាតហ្វូនជំនាន់ថ្មីនេះផងដែរក្នុងនោះមានដូចជាការប្រើបន្ទះឈីប Snapdragon 778G SoC ភ្ជាប់ជាមួយរ៉េម LPDDR5 និងប្រើម៉េមូរីផ្ទុកទិន្នន័យល្បឿនលឿន UFS3.1 ជាដើម។ ប្រភពដដែលក៏បានបញ្ជាក់បន្ថែមទៀតថា iQOO Z5 នឹងមានចំនួន 3 ម៉ូដែលគឺ iQOO Z5, Z5 Pro និង Z5x។ សម្រាប់ម៉ូដែល iQOO Z5 Pro 5G នឹងមានរ៉េមទំហំ 8GB ហើយស្មាតហ្វូនជំនាន់ថ្មីទាំងអស់របស់ iQOO នឹងត្រូវបានដំឡើងមកជាមួយនូវប្រតិបត្តិការ Android 11 ចេញពីប្រអប់៕