Xiaomi 11T និង11T Pro បំពាក់នូវសែនស័រកាមេរ៉ាទំហំ 108MP និងមានអេក្រង់ទំហំ 6.67 អ៊ីង AMOLED 120Hz Display បានមកដល់ជាផ្លូវការណ៍ហើយ

នៅទីបំផុត Xiaomi បានប្រកាសចេញស្មាតហ្វូនជំនាន់ថ្មីពីរម៉ូដែលគឺ Xiaomi 11T និង 11T Pro ជាផ្លូវការណ៍ហើយ។ ស្មាតហ្វូនជំនាន់ថ្មីទាំងពីរម៉ូដែលបានបំពាក់នូវគុណសម្បត្តិកម្រិតខ្ពស់ទាំងកំលាំងម៉ាស៊ីន ប្រព័ន្ធកាមេរ៉ា និងបន្ទះអេក្រង់ជាដើម។

Xiaomi 11T Pro បំពាក់មកជាមួយកំពូលឈីប Snapdragon 888 ដូចម៉ូដែល Mi 11 Pro ខណៈម៉ូដែល 11T ប្រើប្រាស់បន្ទះឈីប MediaTek Dimensity 1200។ ស្មាតហ្វូនជំនាន់ថ្មីបំពាក់មកជាមួយអេក្រង់ទំហំ 6.67 អ៊ីញប្រភេទ Flat AMOLED Display កម្រិត 120Hz ជាមួយ touch sampling rate 240Hz និងគាំទ្រកម្រិតបង្ហាញ FHD+ លើខ្នាត aspect ratio 20:9 ដូចគ្នា។

បន្ទះអេក្រង់របស់ Xiaomi 11T និង 11T Pro គាំទ្របច្ចេកវិទ្យា HDR10+ ជាមួយកម្រិតពន្លឺ 1,000nits។ Xiaomi 11T និង 11T Pro បំពាក់បច្ចេកវិទ្យាការពារទឹក និងធូលីកម្រិត IP53។ 

សម្រាប់ប្រព័ន្ធកាមេរ៉ាដែលតំឡើងនៅលើម៉ូដែល Xiaomi 11T និង 11T Pro គឺមានចំនួន 3 គ្រាប់ប្រើប្រាស់នូវសែនស័រគោលទំហំ 108MP (f/1.8) ប្រើប្រាស់មុខងារ 9-in-1 binning ជាមួយសែនស័រ Ultra-wide 120 ដឺក្រេទំហំ 8MP (f/2.2) និងសែនស័រ Telephoto/Macro ទំហំ 5MP (f/2.4)។ ចំនែកកាមេរ៉ាសែលហ្វីវិញគឺមានទំហំ 16MP ជាលែនទំលុះថ្ងាសអេក្រង់។ ទៅលើប្រព័ន្ធសុវត្ថិភាពវិញស្មាតហ្វូនជំនាន់ថ្មីទាំងពីរម៉ូដែលនេះប្រើប្រាស់នូវសែនស័រស្កែនក្រយ៉ៅម្រាមដៃស្ថិតនៅជាមួយប៊ូតុងបិទបើកនៅលើស៊ុមខាងស្តាំដៃ មិនប្រើបច្ចេកវិទ្យាស្កែនលើក្រយ៉ៅម្រាមដៃលើអេក្រង់នោះទេ។

Xiaomi 11T Pro និង 11T មានថ្មទំហំ 5,000mAh ដូចគ្នា គ្រាន់តែម៉ូដែល Pro គាំទ្របច្ចេកវិទ្យាសាកភ្លើងល្បឿនលឿនកំលាំង 120Hz HyperCharge  ដែលសាកថ្មពេញម្តងប្រើពេលត្រឹមតែ 17 នាទី និងសាកពី 0% ឡើងដល់ 72% ប្រើពេលតែ 10 នាទីប៉ុណ្ណោះ។ Xiaomi បានបញ្ជាក់ថាការសាកភ្លើងចំនួន 800 ដងនៅរក្សាគុណភាពថ្មបាន 80% ដូច្នេះគឺអាចធានាដល់អាយុកាលប្រើប្រាស់ថ្មបានរហូតដល់ទៅជាង 2 ឆ្នាំឯណោះ។

ចំនែកម៉ូដែល Xiaomi 11T គាំទ្របច្ចេកវិទ្យាសាកភ្លើងល្បឿនលឿន 67W ដែលមានលទ្ធភាពអាចសាកបំពេញថាមពលថ្មពេញ 100% ប្រើពេលតែ 36 នាទី។ ប៉ុន្តែ ស្មាតហ្វូនជំនាន់ថ្មីទាំងនេះមិនគាំទ្រការសាកភ្លើងតាមរយះ Wireless Charge នោះទេ។

ស្មាតហ្វូនជំនាន់ថ្មីទាំងពីរម៉ូដែលនេះមានរ៉េមទំហំ 8GB និង 12GB ជាមួយម៉េមូរីផ្ទុកក្នុងម៉ាស៊ីនទំហំចាប់ពី 128GB ដល់ 256GB ជាប្រភេទ UFS3.1។ Xiaomi 11T និង 11T Pro ប្រតិបត្តិការដោយ MIUI12.5 ដែលគាំទ្រដោយ Android 11 ចេញពីប្រអប់ស្រាប់។ ហើយអ្វីដែលពិសេសបំផុតនោះគឺ Xiaomi សន្យាថានឹងផ្តល់ឲ្យការធ្វើបច្ចុប្បន្នភាពប្រតិបត្តិការ Android បានរហូតដល់ទៅ 3 ជំនាន់ និងប្រព័ន្ធសុវត្ថិភាព (Security patch) បានរយះពេលដល់ទៅ 4 ឆ្នាំឯណោះ។ សម្រាប់តម្លៃវិញម៉ូដែល Xiaomi 11T Pro មានតម្លៃខ្ទង់ចាប់ពី $827 ដល់ $886។ ចំនែកម៉ូដែល Xiaomi 11T មានតម្លៃខ្ទង់ $590 ដល់ $650 (តម្លៃលក់នៅទីផ្សារខាងប៉ែកអឺរ៉ុប)៕