vivo X70 Pro+ នឹងចេញលក់នៅចិនខែក្រោយនេះ ដែលមានតម្លៃ $850 សម្រាប់រ៉េមទំហំ 8GB និង $1,038 សម្រាប់រ៉េមទំហំ 12GB

ថ្មីៗនេះ ក្រុមហ៊ុន vivo បានដាក់សម្ភោធចេញនូវកំពូលស្មាតហ្វូនជំនាន់ថ្មីគ្រួសារ vivo X70 Series ជាផ្លូវការណ៍ដែលមានម៉ូដែល X70, X70 Pro និងបងធំ X70 Pro+ នេះឯង។ សម្រាប់ម៉ូដែល X70 Pro+ ដែលទើបចេញមកនេះ ឃើញថាមានការបង្កើននូវសមត្ថភាពពិសេសមួយចំនួនពីលើជំនាន់ X60 Pro+ ដែលចេញកាលពីដើមឆ្នាំ។ ដោយក្នុងនោះយើងឃើញមានដូចជាការប្រើនូវកំលាំងម៉ាស៊ីនថ្មីខ្លាំងកប់ស៊េរី អេក្រង់ថ្មីធំមានគុណភាពបង្ហាញចេញខ្ពស់ជាងមុន និងពង្រឹងទៅលើប្រព័ន្ធកាមេរ៉ាថតរូបកាន់តែខ្លាំងជាងមុនជាដើម។

បើយើងពិនិត្យទៅលើការឌីស្សាញរូបរាងខាងក្រៅរបស់ X70 Pro+ ហាក់មកសូវជាខុសពីជំនាន់ X60 Pro+ ដែលចេញកាលពីខែមករាឆ្នាំ 2021 ប៉ុន្មានទេ ដូចជាអេក្រង់រាងកោងបន្តិចរំលេចជាមួយលែនទំលុះចំកណ្តាលថ្ងាសមួយគ្រាប់ ប៉ុន្តែ ចំនុចដែលកាន់តែទាក់ភ្នែកជាងជំនាន់មុនគឺ នៅលើផ្ទៃខ្នងខាងក្រោយ ដោយពេលនេះ X70 Pro+ ទទួលបានការបន្ថែមទៅលើការឌីស្សាញផ្នែកកញ្ចប់លែនកាមេរ៉ាបែបថ្មីមានផ្ទៃទាល់ធំមើលទៅកាច និងទាក់ទាញជាងមុនព្រមទាំងមានរំលេចជាមួយស្នាមដូចកញ្ចក់ខាងឆ្វេងកញ្ចប់លែនដែលបន្ថែមសម្រស់កាន់តែមានលក្ខណៈបែប Flagship ខ្លាំងជាងមុន។ X70 Pro+ មានកម្រាស់ស្តើងជាងជំនាន់មុនបន្តិចត្រឹមតែ 8.9mm ប៉ុន្តែ ទំងន់រាងកើនជាងមុនបន្តិចវិញដល់ 209 ក្រាម។

vivo X70 Pro+ មានទំហំអេក្រង់ធំជាងជំនាន់ X60 Pro+ គឺឡើងដល់ទំហំ 6.78 អ៊ីញ បើធៀបនឹងទំហំ 6.56 អ៊ីញនៅលើ X60 Pro+ ដែលនេះជាមូលហេតុដែល X70 Pro+ ឡើងទំងន់ជាងមុន។ បន្ថែមពីនេះអេកេ្រង់របស់ X70 Pro+ ក៏កើនកម្រិតរីសូលូហ្ស៊ិនឡើងខ្ពស់ជាងមុនផងដែរគឺដល់ Quad-HD+ (1,440 x 3,200px)។ បន្ទះអេក្រង់របស់ X70 Pro+ គឺជាប្រភេទបន្ទះអេក្រង់ជំនាន់ថ្មីរបស់ Samsung ស៊េរី E5 ប្រភេទ LTPO-AMOLED Display កម្រិត 120Hz មានកម្រិតពន្លឺជះបានខ្លាំងបំផុតដល់ 1500nits ជាមួយកម្រិតដង់ស៊ីតេភាពច្បាស់ 517ppi គាំទ្របច្ចេកវិទ្យា HDR10+ និងបច្ចេកវិទ្យាស្កែនក្រយ៉ៅម្រាមដៃដោះសោរសុវត្ថិភាពផងដែរ។ ហើយអេក្រង់ E5 ជំនាន់ថ្មីនេះក៏សន្សំសំចៃការប្រើប្រាស់ថាមពលថ្មបានប្រសើរជាងមុខដល់ 25% ថែមទៀតផងបើធៀបនឹងជំនាន់ E4 ដែលប្រើនៅលើ X60 Pro+។ ចំនុចពិសេសមួយទៀតរបស់ vivo X70 Pro+ គឺមានបច្ចេកវិទ្យាការពារទឹក និងធូលីបានពេញលេញកម្រិត IP68 ដែលធន់ជាមួយទឹកបានជម្រៅ 1.5 ម៉ែត្រក្នុងរយះ 30 នាទី ដូច្នេះយើងអស់បារម្មណ៍រឿងធ្លាក់ចូលទឹក ឬដើរកាត់ភ្លៀងដូចមុនទៀតឡើយ។

សម្រាប់ប្រព័ន្ធកាមេរ៉ាដែលដំឡើងនៅលើ vivo X70 Pro+ គឺមានចំនួន 4 គ្រាប់នៅលើប្រព័ន្ធកាមេរ៉ាក្រោយជាកញ្ចប់លែន ZEISS និង 1 គ្រាប់នៅលើកាមេរ៉ាខាងមុខជាលែនទំលុះអេក្រង់មានទំហំ 32MP។ ប្រព័ន្ធកាមេរ៉ា 4 គ្រាប់ខាងក្រោយ គឺយើងទទួលបានលែនដើមទំហំ 50MP មាន aperture f/1.6 មានលទ្ធភាពផលិតវីដេអូបានដល់កម្រិត 8K@30fps, 48MP aperture f/2.2  ជាលែន Ultra-wide 114 ដឺក្រេខ្នាត 14mm, 8MP aperture f/3.4 ខ្នាត 125mm ជាលែន Periscope 5X Optical-zoom និងចុងក្រោយជាលែន Telephoto 2X Optical-zoom ទំហំ 12MP aperture f/1.6។ ហើយលែនទាំង 4 គ្រាប់របស់ X70 Pro+ គឺគាំទ្រនូវមុខងារ OIS ជាមួយ gimbal stabilization ដូចៗគ្នា ព្រមទាំងមានអំពូល LED Flash មួយគ្រាប់សម្រាប់ជំនួយពន្លឺថតនៅពេលរាត្រី។ 

vivo X70 Pro+ បំពាក់មកជាមួយកំពូលឈីប 5G របស់ Qualcomm ជំនាន់ចុងក្រោយស៊េរី Snapdragon 888+ អមមកជាមួយឈីប V1-ISP របស់ vivo ផ្ទាល់ដើម្បីជំនួយដល់ប្រព័ន្ធកាមេរ៉ាថតរូប និងវីដេអូឲ្យកាន់តែខ្លាំងជាងមុន។ កំលាំងអូសរបស់ឈីប Snapdragon 888+ ជាមួយ vivo V1-ISP គឺគាំទ្រដោយរ៉េម LPDDR5 ទំហំ 8GB ដល់ 12GB ជាមួយអង្គផ្ទុកទិន្នន័យល្បឿនលឿន UFS3.1 ទំហំ 256GB ដល់ 512GB។ កំពូលស្មាតហ្វូនជំនាន់ថ្មីនេះប្រតិបត្តិការដោយ OriginOS1.0 (China Version)ដែលគាំទ្រដោយ Android 11 ចេញពីប្រអប់។  X70 Pro+ មានថ្មទំហំ 4,500mAh គាំទ្របច្ចេកវិទ្យាសាកភ្លើងល្បឿនលឿនកំលាំង 55W តាមរយះរន្ធចម្លង USB-C និងគាំទ្រការសាកតាម wireless បានលឿនកំលាំង 50W។ vivo X70 Pro+ មានជម្រើសពណ៌ខ្មៅជាពណ៌ស្តង់ដារស្រោបដោយកញ្ចក់រលោង រួមជាមួយពណ៌ខៀវ និងពណ៌ទឹកក្រូចដែលស្រោបដោយស្បែកគុណភាពខ្ពស់ប្រភេទ Vegan Leather។

កំពូលស្មាតហ្វូនជំនាន់ថ្មីនេះនឹងចេញលក់នៅក្នុងទីផ្សារប្រទេសចិននៅខែក្រោយ (តុលា) ដែលមានតម្លៃខ្ទង់ $850 សម្រាប់ម៉ូដែល 8GB/256GB និងខ្ទង់ $1,038 សម្រាប់ម៉ូដែល 12GB/512GB៕