ថ្មីៗនេះ មានការទម្លាយថា ស្មាតហ្វូនស៊េរីថ្មី Xiaomi 11 Lite 5G NE (New Edition) អាចនឹងបង្ហាញខ្លួនឆាប់ៗនេះហើយ ខណៈពេលដែលក្រុមហ៊ុនផលិតគ្រឿងអេឡិចត្រូនិចរបស់ចិននេះ បានបង្ហើបអំពីការត្រៀមខ្លួនក្នុងការប្រកាសចេញស្មាតហ្វូននេះផងដែរ។ បើមើលទៅលើស្មាតហ្វូន 11T Series នេះ ក្រុមហ៊ុន Xiaomi នឹងបង្ហាញនូវថេប្លេត Mi Pad 5 នៅក្នុងព្រឹត្តិការណ៍មួយរបស់ខ្លួននៅចុងខែនេះ។ ស្មាតហ្វូន 11T series នេះ នឹងដាក់លក់សម្រាប់ទីផ្សារសកលផងដែរ។ ក្រុមហ៊ុនបច្ចេកវិទ្យានេះ បានបង្ហាញនូវស្មាតហ្វូន Mi 11 series ចំនួន 4 ម៉ូឌែលរួចហើយដែលក្នុងនោះ មានស្មាតហ្វូន Mi 11, Mi 11 Pro, Mi 11 Ultra និងMi 11 Lite កាលពីដើមឆ្នាំនេះ។
កាលពីពេលមុននេះ មានរបាយការណ៍ជាច្រើនបញ្ចាក់ថា ស្មាតហ្វូន Mi 11 series នឹងមានម៉ូឌែលមួយទៀតដែលមានឈ្មោះហៅថា Xiaomi Mi 11 Lite 5G NE ។ ស្មាតហ្វូន Xiaomi Mi 11 Lite 5G NE នេះក៏ទើបតែទទួលបាននូវវិញ្ញាបនបត្រ NBTC ផងដែរ។ ស្មាតហ្វូនថ្នាក់កណ្តាលនេះអាចនឹងដាក់លក់នៅក្រៅពីទីផ្សាររបស់ចិនផងដែរ។ សម្រាប់ឈ្មោះរបស់ស្មាតហ្វូននេះអាចនឹងគេហៅថា Xiaomi Mi 11 Lite ផងដែរ។
ក្រុមហ៊ុន Xiaomi អាចនឹងបង្ហាញនូវស្មាតហ្វូន 11 Lite 5G NE នេះនៅក្នុងព្រឹត្តិការណ៍មួយនៅថ្ងៃទី 15 ខែកញ្ញានេះ នៅវេលាម៉ោង 8 យប់។ ក្រុមហ៊ុនបច្ចេកវិទ្យាយក្សរបស់ចិននេះ ក៏បង្ហាញនូវវត្តមានរបស់ស្មាតហ្វូននេះនៅលើ Twitter របស់ខ្លួនផងដែរ។ កាលពីដើមសប្តាហ៍នេហ របាយការណ៍មួយចេញពី 91mobiles បានបញ្ជាក់ថា ក្រុមហ៊ុន Xiaomi នឹងនាំយកនូវស្មាតហ្វូន 11 Lite 5G NE ទៅក្នុងទីផ្សាររបស់ប្រទេសឥណ្ឌានៅក្នុងខែនេះ។
ស្មាតហ្វូន 11 Lite 5G NE នឹងមានបន្ទះឈីប Snapdragon 780G ឬ 778G។ បន្ថែមពីនេះទៀតនោះ ស្មាតហ្វូននេះ មានអេក្រង់ទំហំ 6.55 អ៊ីង AMOLED ជាមួយនឹងកម្រិតអេក្រង់ FHD+ 90Hz ផងដែរ។ ស្មាតហ្វូននេះមានកាមេរ៉ា 16MP selfie ។ ស្មាតហ្វូននេះមានកាមេរ៉ាខាងក្រោយទំហំ 64MP កាមេរ៉ា 8MP Ultrawide និងកាមេរ៉ា5MP macro ។ស្មាតហ្វូននេះអាចនឹងមានរ៉េមទំហំ 12GB និងម៉េមូរីទំហំ 256GB។ ស្មាតហ្វូននេះ មានថាមពលថ្មទំហំ 4,250mAh ដែលទ្រទ្រង់នូវបច្ចេកវិទ្យាសាកថ្មលឿន 33W fast charging ផងដែរ។ ស្មាតហ្វូននេះអាចនឹងមានតម្លៃ INR 25,000 នៅក្នុងប្រទេសឥណ្ឌា៕
