Apple ត្រៀមរៀបចំព្រឹត្តិការណ៍ពិសេសថ្មីមួយទៀតហៅថា “Unleashed Event) នៅថ្ងៃទី 18 ខែតុលា សប្តាហ៍ក្រោយនេះ

ក្រុមហ៊ុន Apple បានចេញលិខិតអញ្ជើញសម្រាប់ព្រឹត្តិការណ៍ទីពីរប្រចាំឆ្នាំ 2021 របស់ខ្លួនដែលត្រៀមប្រារព្ធធ្វើឡើងនៅថ្ងៃច័ន្ទ ទី 18 ខែតុលាសប្តាហ៍ក្រោយនេះនៅវេលាម៉ោង 10 ព្រឹក ដែលត្រូវនឹងម៉ោង 12 យប់ឈានចូលថ្ងៃទី 19 នៅប្រទេសកម្ពុជាយើង។ ជាធម្មតារបស់ Apple ទៅហើយដោយនៅលើលិខិតអញ្ជើញរបស់គេគឺមិនបានបញ្ជាក់ពីផលិតផល ឬប្រធានបត់ដែលត្រូវបង្ហាញក្នុងព្រឹត្តិការណ៍នោះទេ។

ទោះជាយ៉ាងណានៅក្នុងព្រឹត្តិការណ៍ថ្ងៃទី 18 ដើមសប្តាហ៍ក្រោយនេះ គេដឹងយ៉ាងច្បាស់ថា Apple នឹងដាក់បង្ហាញចេញផលិតផលកុំព្យូទ័រយួរដៃ Mac Series ជំនាន់ថ្មីរបស់ខ្លួនដែលបំពាក់នូវកំលាំងម៉ាស៊ីនថ្មី ប្រើប្រព័ន្ធបច្ចេកវិទ្យា ARM។ ម៉ាស៊ីនកុំព្យូទ័រ Mac Series ជំនាន់ថ្មីនេះត្រូវបានគេដឹងថាគឺមានពីរម៉ូដែលដោយមួយមានអេក្រង់ទំហំ 14 អ៊ីញ និងមួយទៀតមានអេក្រង់ទំហំ 16 អ៊ីញ។ ហើយ Mac ជំនាន់ថ្មីឆ្នាំ 2021 ទាំងពីរនឹងបំពាក់នូវកំលាំងម៉ាស៊ីនថ្មីអូសដោយ Apple M1X Processor ដែលនឹងមានសមត្ថភាពកាន់តែប្រសើរជាងជំនាន់ M1 ហើយក៏នឹងបំពាក់បន្ទះអេក្រង់ mini-LED Display ដូចនឹង iPad Pro 12.9 អ៊ីញដែរ។

ហើយក្រៅតែពីដាក់បង្ហាញចេញម៉ាស៊ីន Mac ជំនាន់ថ្មីទៅ Apple ក៏អាចនឹងដាក់បង្ហាញចេញនូវកាសស្តាប់ឥតខ្សែជំនាន់ថ្មីគឺ AirPods Pro ជំនាន់ទី 3 បន្ថែមទៀតផងដែរ។ ទោះជាយ៉ាងណានេះគ្រាន់តែជាការសន្និដ្ឋានជំហ៊ានដំបូងប៉ុណ្ណោះ អ្វីដែលជាការពិត គឺយើងនឹងបានដឹងច្បាស់នៅដើមសប្តាហ៍ក្រោយនេះហើយ៕