Nokia បានប្រកាសចេញទូរស័ព្ទ 5G ស៊េរីថ្មីម៉ូដែល G300 នៅក្នុងទីផ្សារសហរដ្ឋអាមេរិកជាមួយតម្លៃធូរថ្លៃបំផុតត្រឹមតែ $200 ប៉ុណ្ណោះ។ ស្មាតហ្វូន 5G ស៊េរីថ្មីដែលមានតម្លៃធូរថ្លៃរបស់ Nokia មួយនេះត្រូវបានក្រុមហ៊ុនបំពាក់មកជាមួយអេក្រង់ទំហំ 6.52 អ៊ីងកម្រិត HD+ និងជាបន្ទះអេក្រង់មានឆករាងជាអក្សរ V ឬហៅថា “V-Notch” ដែលមានបង្កប់ដោយកាមេរ៉ាសែលហ្វីមួយគ្រាប់ទំហំ 8MP។ Nokia G300 មានទ្រនាប់ស្កែនក្រយ៉ៅម្រាមដៃដោះសោរសុវត្ថិភាពនៅភ្ជាប់ជាមួយប៊ូតុងបិតបើកទូរស័ព្ទនៅលើស៊ុមខាងស្តាំដៃ ហើយក៏អាចស្កែនផ្ទៃមុខដោះសោរបានផងដែរ។
Nokia G300 បំពាក់នូវបន្ទះឈីប Snapdragon 480 5G ភ្ជាប់ដោយរ៉េមទំហំ 4GB និងម៉េមូរីក្នុងម៉ាស៊ីនទំហំ 64GB។ បន្ទះឈីប SD480 5G នេះអូសដោយ CPU 8-core មានល្បឿន 2GHz Cortex-A76 Dual-core និងល្បឿន 1.8GHz Cortex-A55 Six-core ។ ស្មាតហ្វូនស៊េរីថ្មីនេះប្រតិបត្តិការដោយ Android 11 ចេញពីប្រអប់ស្រាប់។ និយាយពីថ្មវិញ Nokia G300 មានថ្មទំហំ 4,470mAh និងគាំទ្របច្ចេកវិទ្យាសាកភ្លើងកំលាំង 18W។
ស្មាតហ្វូន Nokia 5G ស៊េរីដែលមានតម្លៃធូរថ្លៃនេះគឺមានដំឡើងនូវប្រព័ន្ធកាមេរ៉ាក្រោយរាងជារង្វង់នៅចំកណ្តាលដែលមានបង្កប់ដោយលែនកាមេរ៉ាចំនួន 3 គ្រាប់ ភ្ជាប់អមមកជាមួយអំពូល LED Flash មួយគ្រាប់។ សម្រាប់កាមេរ៉ាទាំងបីគ្រាប់នៅលើ Nokia G300 គឺប្រើសែនស័រមេទំហំ 16MP ជាមួយសែនស័រជំនួយទំហំ 5MP និង 2MP។ ប្រព័ន្ធកាមេរ៉ារបស់ Nokia G300 មានគាំទ្រជាមួយមុខងារ Night Mode, EIS, OZO audio surround និង wind noise cancellation ថែមទៀតផង។
Nokia G300 5G នឹងមានដាក់លក់ផ្លូវការណ៍នៅទីផ្សារអាមេរិកចាប់ពីថ្ងៃទី 19 តុលាខាងមុននេះតាមរយះបណ្តាញចែកចាយដៃគូចំនួនពីរគឺ Straight Talk និង TracFone Wireless ជាមួយតម្លៃត្រឹមតែ $200 ប៉ុណ្ណោះ៕