Xiaomi ត្រៀមប្រកាសចេញស្មាតហ្វូនហ្គេមឆ្លាមខ្មៅជំនាន់ថ្មីរបស់ខ្លួនគឺ Black Shark 4S Pro នៅរាត្រីថ្ងៃនេះហើយ។ ឆ្លាមខ្មៅជំនាន់ថ្មីរបស់ Xiaomi ក៏មានព័ត៌មានលេចធ្លាយជាច្រើនផងដែរនៅមុនថ្ងៃបង្ហាញវត្តមានផ្លូវការណ៍ ដូច្នេះខាងក្រោមនេះគឺជាគុសម្បត្តិបឋមមួយចំនួនដែលប្រភពបានទម្លាយនាពេលកន្លងមក។
បើតាមប្រភពព័ត៌មានចចាមអារាមបាននិយាយថា Black Shark 4S Pro គឺបំពាក់នូវកំពូលឈីបនាគរាជជំនាន់ថ្មីចុងក្រោយគឺ Snapdragon 888+ ព្រមទាំងមានការបង្កើនផលិតភាពលើប្រព័ន្ធផ្ទុកទិន្នន័យកាន់តែលឿនរហ័សថែមទៀតផង។ ប្រភពបានបញ្ជាក់បន្ថែមទៀតថា ឆ្លាមខ្មៅជំនាន់ថ្មី គឺនឹងបំពាក់នូវប្រព័ន្ធផ្ទុកទិន្នន័យថ្មីជំនាន់ 2.0 Dual Disk Array System ដែលមានល្បឿន read/write ទិន្នន័យលឿនរហ័សបំផុត ដែលប្រព័ន្ធថ្មីនេះ គឺនឹងធ្វើការបានល្អប្រសើរជាងប្រព័ន្ធផ្ទុកទិន្នន័យ RAID System ដែលប្រើនៅលើជំនាន់ Black Shark 4។ Black Shark 4S Pro នឹងមានជម្រើសរ៉េមទំហំធំផុតដល់ 16GB និងម៉េមូរីធំបំផុតដល់ 512GB។
ហើយអ្វីដែលពិសេសជាងនេះទៅទៀតនោះ Black Shark 4S Pro ត្រូវបានគេដឹងថានឹងគាំទ្របច្ចេកវិទ្យាសាកភ្លើងល្បឿនលឿនកំលាំង 120W ជាមួយថ្មទំហំ 4,500mAh ដូចជំនាន់មុនរបស់វាដែរ។ ជាមួយបច្ចេកវិទ្យាសាកភ្លើងល្បឿនលឿនដូចរន្ទះនេះ គឺអាចសាកភ្លើងឲ្យថ្មទំហំ 4,500mAh ពីចំនុច 0% ទៅពេញ 100% ប្រើពេលប្រមាណតែ 15 នាទី និងសាកពី 0% ទៅ 50% ប្រើពេលប្រមាណ 5 នាទីប៉ុណ្ណោះ។ ជាងនេះទៅទៀតក្រុមហ៊ុន Black Shark ក៏បានបញ្ជាក់ថា ឆ្លាមខ្មៅជំនាន់ថ្មីរបស់ខ្លួនក៏បានពង្រឹងទៅលើប្រព័ន្ធសំឡេងកាន់តែមានគុណភាពខ្ពស់ជាងជំនាន់មុនថែមទៀតផង។
សម្រាប់អេក្រង់វិញ Black Shark 4S Pro នឹងបំពាក់មកជាមួយបន្ទះអេក្រង់ E4-AMOLED Display មានល្បឿន refresh rate 144Hz គាំទ្រ Touch sampling rate 720Hz ជាមួយល្បឿន Latency ទាបត្រឹម 8.3ms ដែលល្អបំផុតសម្រាប់ការបញ្ជាជាមួយនឹងប៊ូតុង Shoulder Triggers។
នៅក្នុងព្រឹត្តិការណ៍ថ្ងៃនេះ Xiaomi ក៏នឹងបង្ហាញចេញកាស True wireless Headset ដែលបំពាក់ឈីបថ្មីជាមួយកម្រិតល្បឿន Latency ទាបត្រឹម 30ms ដែលល្អបំផុតសម្រាប់ការភ្ជាប់ក្នុងការលេងហ្គេមផងដែរ៕
