OnePlus បានប្រារព្ធព្រឹត្តិការណ៍ប្រកាសចេញស្មាតហ្វូនចំណូលថ្មីម៉ាក OnePlus 9RT កាលពីម្សិលមិញនេះ។ ហើយក្នុងថ្ងៃជាមួយគ្នានេះ OnePlus ក៏បានឆ្លៀតប្រកាសចេញកាសស្តាប់ត្រចៀកឥតខ្សែស៊េរីថ្មីរបស់ខ្លួនម៉ាក OnePlus Buds Z2 ថែមមួយទៀតផងដែរ។ កាសស្តាប់ឥតខ្សែស៊េរីថ្មីនេះមានភ្ជាប់មកជាមួយមុខងារកំចាត់សំឡេងរំខានពីខាងក្រៅ ANC, គាំទ្រប្រព័ន្ធបច្ចេកវិទ្យាសំឡេង Dolby Atmos រួមទាំងមានថ្មកាន់ប្រើបានរហូតដល់ 28 ម៉ោងដោយភ្ជាប់សាកជាមួយប្រអប់របស់វាដោយបិទមុខងារ ANC។
OnePlus Buds Z2 ប្រើប្រាស់ Driver Sound ខ្នាត 11mm ជា Dynamic Driver ជាមួយបច្ចេកវិទ្យាប្លូធូស 5.2។ ជាងនេះទៅទៀតវាក៏គាំទ្រជាមួយមុខងារ AAC និង SBC Bluetooth codecs រួមនិង BLE, SPP, HFP, A2DP ហើយនិង AVRCP Bluetooth transmission protocols ផងដែរ។ សម្រាប់មុខងារកំចាត់សំឡេងរំខាន ANC នៅលើ Buds Z2 គឺអាចទប់ស្កាត់សំឡេងរំខានពីខាងក្រៅបានក្នុងកម្រិត 40dB ដោយមានជំនួយពីរន្ធម៉ិចស័រចំនួន 3 នៅលើគ្រាប់កាសនីមួយៗ។ ហើយនៅលើគ្រាប់កាសទាំងសងខាងរបស់ Buds Z2 គឺមានប្រព័ន្ធការពារទឹកកម្រិត IP55 Splash-proof ខណៈនៅលើប្រអប់កាស គឺប្រើ IPX4 Splash-resistant។
សម្រាប់ថ្មនៅលើគ្រាប់កាសទាំងសងខាងនៅពេលសាកពេញម្តងកាន់ប្រើបាន 7 ម៉ោងដោយបិទមុខងារ ANC និងបាន 5 ម៉ោងដោយបើកមុខងារ ANC។ ជាមួយមុខងារសាកភ្លើង WarpCharge នៅលើគ្រាប់កាសនិមួយៗគឺសាកភ្លើងបានលឿនរហ័សដោយសាកតែ 10 នាទី គឺអាចបន្តការស្តាប់តន្រ្តីកម្សាន្តបានដល់ 5 ម៉ោងបន្ថែមទៀត។ OnePlus Buds Z2 មានជម្រើសពីរពណ៌គឺ ខ្មៅ និងស ហើយតម្លៃចេញលក់នៅប្រទេសចិនគឺប្រហែល $77 ដែលនឹងចាប់ផ្តើមចេញលក់ផ្លូវការណ៍លើកដំបូងនាថ្ងៃទី 19 ខែតុលាខាងមុខនេះទៅ។ យ៉ាងមិញសម្រាប់តម្លៃ និងការនាំចេញទៅប្រកាសចេញលក់នៅទីផ្សារសកល OnePlus មិនប្រាប់ឲ្យដឹងនៅឡើយទេ៕
