ជាមួយ Apple Watch Series 7 ដែលចេញក្នុងឆ្នាំ 2021 នេះឃើញថាមានការផ្លាស់ប្តូរការឌីស្សាញច្រើនគួរសមបើធៀបនឹងជំនាន់ Watch Series 6 ដែលចេញក្នុងឆ្នាំ 2020។ ដូចជាវាមានអេក្រង់ធំលាតពេញគែមជាងមុន និងមានទំហំខ្លួនធំជាងមុន 1mm ជាដើម។ យ៉ាងណាមិញ Apple Watch Series 7 គឺត្រូវបានពន្យាពេលក្នុងការចេញលក់ដោយសារតែបញ្ហាប្រឈមមួយចំនួនដូចជាកង្វះសមាសធាតុផលិត និងការផលិតក៏មានផលពិបាកជាងមុនបន្តិចផងដែរ។ បើតាមប្រភពរបាយការណ៍ដែលចេញផ្សាយថ្មីៗនេះបានបញ្ជាក់ថា Apple Watch Series 7 គឺត្រូវបានពន្យាចេញលក់រហូតដល់ខែវិច្ឆិកាខែមុខនេះ។
ស្របពេលដែល Watch Series 7 មិនទាន់បានធ្លាក់ដល់ដៃអតិថិជនផង ស្រាប់តែមានលេចលឺព័ត៌មានរស៊ើបនិយាយពីនាឡិកាឆ្លាតជំនាន់ថ្មី Apple Watch Series 8 ទៅហើយ។ បើតាមប្រភពចេញពីឧស្សាហកម្មផលិត និងតាមរយះនាយកប្រតិបត្តិនៃស្ថាប័ន Display Supply Chain Consultant លោក Ross Young បានលើកឡើងប្រហាក់ប្រហែលគ្នាថា Apple បាននឹងកំពុងរៀបចំគម្រោងផលិតនាឡិកាដៃឆ្លាតវៃជំនាន់ថ្មីរបស់ខ្លួនដែលមានអេក្រង់ធំជាងមុននៅក្នុងឆ្នាំ 2022។ ប្រភពដដែលបានបញ្ជាក់បន្ថែម ថា Apple អាចនឹងប្រកាសចេញនាឡិកាជំនាន់ថ្មីរបស់ខ្លួនចំនួន 3 ស៊េរីផ្សេងគ្នាក្នុងឆ្នាំ 2022។
សម្រាប់ Apple Watch Series 7 ដែលទើបចេញកាលពីអំឡុងខែកញ្ញាកន្លងទៅគឺមានជម្រើសពីរស៊េរីគឺ 41mm និង 45mm កើនទំហំពី 40mm និង 44mm នៅលើ Watch Series 6។ ដូច្នេះគឺអាចទៅរួចដែល Apple Watch Series 8 នឹងមានស៊េរីទំហំធំជាង 45mm។ បើតាមលោក Ming-Chi Kou ធ្លាប់បានលើកឡើងថា Apple Watch Series 8 នឹងមានភ្ជាប់មកជាមួយមុខងារតាមដានសុខភាពថ្មី New Health management ដែលមានសមត្ថភាពក្នុងការតាមដានបម្រែបម្រួលសីតុណ្ហភាពរាងកាយរបស់យើងបានជាក់លាក់ថែមទៀតផង៕
