មកដល់ពេលនេះ គឺលែងមានអ្វីជាអាថ៌កំបាំងទៀតហើយសម្រាប់ការមកដល់នៃផលិតផលថ្មីរបស់ Google ដោយសារតែស្មាតហ្វូន Google Pixel 6 និង Pixel 6 Pro ត្រូវបានគេដឹថា នឹងបង្ហាញខ្លួននៅថ្ងៃទី 19 ខែតុលាខាងមុខនេះហើយ។ នៅក្នុងព្រឹត្តិការណ៍នោះ គឺនឹងមានឃើញនូវផលិតផលជាច្រើនទៀតបន្ថែមពីលើស្មាតហ្វូនទាំងនេះ ដូចជាស្មាតវ៉ច ស្មាតហ្វូនដែលអាចបត់បាន និង Smart Speaker ផងដែរ។
កន្លងមកមានពាក្យចចាមអារ៉ាមជាច្រើនបានបញ្ជាក់ថា ក្រុមហ៊ុននេះ អាចនឹងបង្ហាញនូវស្មាតហ្វូនដែលអាចបត់បាន និងស្មាតវ៉ចឆាប់ៗនេះ។ ប៉ុន្តែមកដកល់ពេលនេះ សម្រាប់លក្ខណៈសម្បត្តិរបស់វានៅមិនទាន់បានដឹងនៅឡើយទេ។ យើងបានដឹងថា វានឹងមានការប្រកាសបង្ហាញនូវ Android 12.1 និង Pixel Launcher ថ្មីផងដែរ។
សម្រាប់ស្មាតវ៉ចនោះ គឺនឹងបំពាក់នូវប្រព័ន្ធប្រតិបត្តិការ WearOS ដែលជាការសហការជាមួយនឹងក្រុមហ៊ុន Samsung។ Pixel Watch អាចនឹងមានបន្ទះឈីប 5-nanometer ដែលផ្អែកនៅលើ Exynos W920 ផងដែរ។ អ្វីគ្រប់យ៉ាងនឹងទម្លាយនៅក្នុងពេលមិនដល់ 2 សប្តាហ៍ទៀតនោះទេ។
គួរបញ្ជាក់ផងដែរថា កាលពីពេលមុននេះ មានប្រភពជាច្រើន បានទម្លាយថា ស្មាតហ្វូន Pixel 6 នឹងមានតម្លៃ 649 euros នៅក្នុងទីផ្សារអ៊ឺរ៉ុប ខណៈពេលដែលស្មាតហ្វូន Pixel 6 Pro គឺមានតម្លៃ 899 euros ។ ស្មាតហ្វូនទាំងនេះ នឹងធ្វើការ Pre-order ចាប់ពីថ្ងៃទី 19 ដល់ថ្ងៃទី 27 ខែតុលានេះ។ ស្មាតហ្វូនទាំងនេះនឹងដាក់លក់នៅថ្ងៃទី 28 ខែតុលានេះ៕