កាលពីដើមឆ្នាំនេះ ក្រុមហ៊ុន Samsung បាននិយាយថា ខ្លួនបានផ្អាកការផលិតចេញនូវស្មាតហ្វូន Galaxy Note មួយជំនាន់សិន ដោយបានបញ្ជាក់ថានឹងបង្ហាញស្មាតហ្វូនជំនាន់ថ្មីពីគ្រួសារប្រើប៊ិកនេះវិញនៅឆ្នាំក្រោយ។ ប៉ុន្តែបើយោងតាមរបាយការណ៍ចុងក្រោយ ដែលលេចចេញមកពីប្រទេសកូរ៉េខាងត្បូង គឺបានបញ្ជាក់ពីហេតុផលផ្សេងគ្នា ដែលខុសពីការលើកឡើងនេះ។
បើយើងមើលទៅលើតារាងផលិតផលរបស់ក្រុមហ៊ុន Samsung ដែលបានបែកធ្លាយកន្លងទៅថ្មីៗនេះ បានបង្ហាញថា ក្រុមហ៊ុនផលិតស្មាតហ្វូនរបស់ប្រទេសកូរ៉េខាងត្បូងមួយនេះ គឺទំនងជាបានដកចេញនូវស៊េរី Note ទាំងស្រុង ពីគម្រោងផលិតផលរបស់ខ្លួនសម្រាប់ឆ្នាំ 2022 ហើយ ដោយបានងាកមកផ្តោតចម្បងទៅលើការផលិតសម្រាប់ស្មាតហ្វូនដែលអាចបត់បានជំនួសវិញ។
សូមជំរាបថា នៅក្នុងឆ្នាំ 2019 កន្លងទៅនេះ ស្មាតហ្វូនត្រកូល Galaxy Note10 ត្រូវបានលក់ចេញក្នុងរង្វង់ 12.7 លានគ្រឿង ខណៈដែលការលក់ស្មាតហ្វូន Galaxy Note20 នៅក្នុងឆ្នាំ 2020 កន្លងទៅ គឺបានចំនួនត្រឹមតែ 9.7 លានគ្រឿងប៉ុណ្ណោះ ហើយបើមើលទៅលើ Galaxy Z Fold គឺអាចលក់បានកើនឡើងដល់ 13 លាន ឯណោះ។
ដូច្នេះប្រសិនបើ Samsung មើលឃើញនិន្នាការកើនឡើងនៃការបញ្ជាទិញទូរស័ព្ទដែលអាចបត់បាន ហើយនិងការថយចុះនៃការលក់ Note នោះ ក្រុមហ៊ុននេះ ប្រាកដជាបង្កើនការផលិតស្មាតហ្វូនដែលអាចបត់បានដូចជា Z Flip និង Z Fold ជំនួសអោយស្មាតហ្វូនត្រកូល Note មែនហើយ។ លើសពីនេះ ក៏មានរបាយការណ៍ផ្សេងទៀត បាននិយាយដែរថា Samsung គឺពិតជា បញ្ឈប់ការផលិត Galaxy Note20 និង Note20 Ultra នៅឆ្នាំ 2022 មែនហើយ ប៉ុន្តែអ្នកតាមដានឧស្សាហកម្មនេះ នៅតែរំពឹងថា ម៉ូដែល Galaxy Note Series នឹងមានបង្ហាញខ្លួននៅពេលណាមួយជាក់ជាមិនខាន។