បើតាមការចេញផ្សាយព័ត៌មានកន្លងមក គឺបានបញ្ជាក់ថា នៅថ្ងៃទី 30 ខែវិច្ឆិកាខាងមុខនេះ ក្រុមហ៊ុន Qualcomm នឹងបង្ហាញនូវបន្ទះឈីប Flagship Chipset ថ្មីរបស់ខ្លួន ហើយបន្ទាប់ពីការប្រកាសចេញនូវឈីបនេះ ស្មាតហ្វូនដំបូងគេដែលត្រូវបានបំពាក់ជាមួយនឹងឈីបនេះ ក៏នឹងបង្ហាញវត្តមាននៅពេលបន្ទាប់ផងដែរ។ កន្លងមកមានព័ត៌មានថា ទាំងក្រុមហ៊ុន Motorola ទាំងក្រុមហ៊ុន Xiaomi គឺបានប្រជែងគ្នាក្នុងការទិញឈីបនេះអោយបានមុនគេនៅឆ្នាំនេះ ប៉ុន្តែមកដល់ពេលនេះនៅមិនច្បាស់ថាមួយណានឹង "ឈ្នះ" ការប្រកួតប្រជែងមួយនេះទេ។
នៅថ្ងៃនេះ យោងតាមពាក្យចចាមអារ៉ាមចេញពីប្រទេសចិន គឺបានទម្លាយថា កាលបរិច្ឆេទនៃការប្រកាសរបស់ស្មាតហ្វូន Xiaomi 12 ត្រូវបានកំណត់រួចហើយបើទោះបីជាក្រុមហ៊ុននេះ នៅមិនទាន់ត្រូវបានផ្សព្វផ្សាយជាសាធារណៈក៏ដោយ។ ក្រុមហ៊ុននេអាចជ្រើសយកថ្ងៃទី 12 ខែធ្នូហើយ ដើម្បីធ្វើអោយស៊ីគ្នាជាមួយនឹងស្មាតហ្វូនជំនានថ្មីរបស់ខ្លួន ព្រោះថា 12 និង12 គឺស៊ីមេទ្រីគ្នា។ សូមជំរាបថា កន្លងមកគឺមានការបញ្ជាក់ថា ក្រុមហ៊ុននេះ នឹងរៀបចំព្រឹត្តិការណ៍នៅថ្ងៃទី 16 ខែធ្នូ ប៉ុន្តែ មិនមែនទេ គឺជាថ្ងៃទី 12 វិញ។ ដូច្នេះ ប្រសិនបើរឿងនេះកើតឡើង ការបង្ហាញនឹងកើតឡើងនៅថ្ងៃអាទិត្យ ព្រោះថា ថ្ងៃនោះ គឺជាថ្ងៃទី 12 ខែធ្នូ។
ជាមួយគ្នានេះ ពាក្យចចាមអារ៉ាមដដែល ក៏បានអះអាងថា Xiaomi 12X នឹងត្រូវបានប្រកាសរួមជាមួយ Xiaomi 12 នៅក្នុងព្រឹត្តិការណ៍ដូចគ្នា ហើយសម្រាប់ Xiaomi 12 Ultra នឹងបង្ហាញវត្តមាននៅឆ្នាំ 2022 ខាងមុខ។ បន្ថែមពីនេះ Xiaomi 12 ត្រូវបានគេនិយាយថា នឹងមានអេក្រង់កោង និងរន្ធ Punch-Hole នៅចំកណ្តាលអេក្រង់តែម្តង ដែលរន្ធនេះ គឺមានវេចខ្ចប់នូវ កាមេរ៉ា Selfie មួយគ្រាប់។ អេក្រង់នេះ គឺទ្រទ្រង់ជាមួយល្បឿន 120 Hz និងកម្រិតភាពច្បាស់ "2K" និងមានការគាំទ្រដោយបច្ចេកវិទ្យាស្កែនក្រយ៉ៅម្រាមដៃក្រោមអេក្រង់ទៀតផង។ Xiaomi 12 ដំណើរការជាមួយស្បែក MIUI 13។
សម្រាប់ប្រព័ន្ធកាមេរ៉ាខាងក្រោយ គឺនឹងមានកាមេរ៉ាគោលទំហំ 50 MP ដែលអាចជាសែនស័ររបស់ក្រុមហ៊ុន Samsung ឬ Sony។ ស្មាតហ្វូននេះ នឹងមានការទ្រទ្រង់ជាមួយការសាកថ្មលឿនកម្លាំង 120W។