យោងតាមរបាយការណ៍ដែលបានចេញផ្សាយក្នុងថ្ងៃនេះ បាននិយាយថា Apple នឹងនាំយករន្ធសាកថ្ម ប្រភេទ USB-Type-C សម្រាប់ទូរស័ព្ទ iOS ជំនាន់ថ្មីឆ្នាំ 2022 គឺ iPhone 14 Series។ ប៉ុន្តែ ក្នុងរបាយការណ៍ បានបញ្ជាក់ច្បាស់ថា សម្រាប់រន្ធ USB-Type-C គឺនឹងមានតែនៅលើម៉ូដែល iPhone 14 Pro Series តែប៉ុណ្ណោះ។
បើតាមប្រភពព័ត៌មានដែលបានចែកចាយដោយបណ្តាញ LeaksApplePro និង iDropNews បានឲ្យដឹងថា ក្រុមហ៊ុនបច្ចេកវិទ្យាខ្នាតយក្សរបស់ Cupertino សហរដ្ឋអាមេរិកមួយនេះ បានសម្រេចចិត្តក្នុងការប្តូរមកប្រើរន្ធ USB-Type-C ជំនួស Lightning Connector ដែលប្រើនូវលើទូរស័ព្ទ iOS របស់ខ្លួនអស់ជាមួយទសវត្សរ៍មកហើយនោះ ដោយសារតែក្រុមហ៊ុនផលិតទូរស័ព្ទ iPhone របស់អាមេរិកមួយនេះកំពុងជាប់បណ្តឹងផ្លូវច្បាប់ដែលបណ្តាលមកពីការមិនប្រើនូវរន្ធ USB-Type-C ជាសកល។
មួយវិញទៀតហើយថ្មីៗនេះ សភាសហភាពអឺរ៉ុប ក៏បានធ្វើការជំរុញឲ្យ Apple ប្រើប្រាស់រន្ធ USB-Type-C ស្របតាមស្តង់ដារថ្មីនៅក្នុងឧបករណ៍ទាំងអស់របស់ខ្លួនផងដែរ បើពុំដូច្នោះទេ ក្រុមហ៊ុននេះនឹងទទួលរកការផាកពិន័យដោយសារតែមិនគោរពតាមគោលការណ៍ស្តង់ដារថ្មីនេះដែលសភាអឺរ៉ុបតម្រូវ។ប្រភពបានបញ្ជាក់ច្បាស់បន្ថែមថា សម្រាប់ iPhone 14 Pro និង 14 Pro Max គឺជាទូរស័ព្ទ iOS ដំបូងរបស់ Apple ដែលត្រូវប្រើរន្ធ USB-Type-C ក្នុងឆ្នាំ 2022 ខណៈដែល iPhone ពីរម៉ូដែលនឹងប្តូរមកប្រើរន្ធសាកថ្មីនេះនៅឆ្នាំ 2023។
សម្រាប់គុណវិបត្តិរបស់រន្ធ Lightning Connector ដែលមាននៅលើទូរស័ព្ទ iPhone បច្ចុប្បន្ន គឺប្រើនូវបច្ចេកវិទ្យាផ្ទេរទិន្នន័យ USB2.0 ដែលមានល្បឿន យឺត ចំនែកឯ iPad Pro ជំនាន់ថ្មីដែលបានប្រើរន្ធ USB-Type-C គឺប្រើនូវបច្ចេកវិទ្យាផ្ទេរទិន្នន័យល្បឿនលឿន USB3.0។ ជាមួយគ្នានេះដែរ ការប្តូរចិត្តរបស់ Apple មកប្រើនូវរន្ធ USB-Type-C ធ្លាប់ត្រូវបានមេរបស់ Apple បញ្ជាក់ថា គឺដើម្បីការពារបរិស្ថាន។ ហើយការប្តូរមកប្រើ USB-Type-C ក៏អាចនឹងជួយកាត់បន្ថយថ្លៃដើមក្នុងការចំណាយបានមួយចំនួនសម្រាប់ផលិតទូរស័ព្ទ iPhone 14 Pro Series ផងដែរ។
ហេតុផលដែលសភាសហភាពអឺរ៉ុប ជម្រុញឲ្យ Apple ងាកមកប្រើស្ដង់ដារ USB-Type-C គឺដើម្បីធ្វើការប្រគូតប្រជែងទីផ្សារខាងផ្នែកបច្ចេកវិទ្យាស្មាត ហ្វូនសកល ព្រមទាំងជួយកាត់បន្ថយកាកសំណល់អេឡិចត្រូនិកផងដែរ។ ទោះជាយ៉ាងណទាំងអស់នេះគ្រាន់តែជាព័ត៌មានមិនទាន់ផ្លូវការនៅឡើយទេ ដូច្នេះយើងរងចាំការធ្វើបច្ចុប្បន្នភាពព័ត៌មានថ្មីៗជាបន្តទៀត ចំពោះការសម្រេចចិត្តប្រើប្រាស់រន្ធ USB-Type-C នៅលើ iPhone ជំនាន់ថ្មីឆ្នាំ 2022៕
