Samsung បាននិយាយថា ខ្លួននឹងចាប់ផ្តើមសង្វាក់ផលិតកម្មទ្រង់ទ្រាយធំសម្រាប់បច្ចេកវិទ្យាអេក្រង់ OLED សម្រាប់ Laptop ដែលមានភ្ជាប់ជាមួយបច្ចេកវិទ្យា Touch Sensor ជាមួយអេក្រង់ផ្ទាល់តែម្តង។ ដោយបច្ចេកវិទ្យាអេក្រង់ OLED Touch Panel ថ្មីនេះត្រូវបានគេរំពឹងថា នឹងប្រើដំបូងនៅលើម៉ាស៊ីន Galaxy Book ដែលចេញនៅសប្តាហ៍ក្រោយនេះ។
បច្ចេកវិទ្យាអេក្រង់ Laptop ថ្មីនេះ គឺប្រើនូវប្រព័ន្ធបច្ចេកវិទ្យា OCTA ឬហៅថា on-cell touch AMOLED technology ដែលធ្វើឲ្យបន្ទះអេក្រង់មានកម្រាស់ស្តើងដើម្បីដោះស្រាយទៅលើស្រទាប់ប៉ះបញ្ជាដាច់ដោយឡែក touchscreen panel film។ Samsung អះអាងថា បច្ចេកវិទ្យាអេក្រង់ OLED ថ្មីនេះ គឺជាបច្ចេកវិទ្យាអេក្រង់កុំព្យូទ័រយួរដៃដំបូងគេរបស់ពិភពលោកដែលមានភ្ជាប់ Sensor Touchscreen រួមបញ្ចូលគ្នានៅលើអេក្រង់ផ្ទាល់តែម្តង។ ដោយបច្ចេកវិទ្យាអេក្រង់នេះ គឺមានប្រើតែនៅលើស្មាតហ្វូន Galaxy S-Series និង iPhone តែប៉ុណ្ណោះ។ បច្ចេកវិទ្យាអេក្រង់ថ្មីនេះ Samsung អាចនឹងធ្វើការផលិតជាមួយទំហំ 13-inch និង 16-inch ជាមួយសមត្ថភាពគាំទ្រកម្រិតបង្ហាញ 3K Solution ជាមួយកម្រិតល្បឿន 120Hz Refresh rate។
យ៉ាងណាមិញ Samsung មិនបានបង្ហើបពីម៉ាក Laptop ណាមួយដែលត្រូវប្រើបច្ចេកវិទ្យាអេក្រង់ថ្មីដំបូងគេនោះទេ ប៉ុន្តែ គេរំពឹងថា Galaxy Book Laptop ជំនាន់ថ្មីនឹងដែលមកដល់នៅថ្ងៃទី 04 ខែ កុម្ភៈ ខាងមុននេះ នឹងប្រើបច្ចេកវិទ្យាអេក្រង់ OLED ជំនាន់ថ្មីនេះ។ ទន្ទឹងនឹងនេះ ក្រុមហ៊ុន Apple ក៏ត្រូវបានគេរាយការណ៍ថា នឹងប្រកាសចេញ MacBook Pro ក៏ដូចជា iPad Pro ឬ Air ដែលបំពាក់អេក្រង់ OLED របស់ Samsung ដំបូងនៅឆ្នាំក្រោយនេះ។ គួររំលឹកដែលថា Apple បានចាប់ផ្តើមប្រើអេក្រង់ OLED នៅលើ iPhone កំពូលរបស់ខ្លួននៅអំឡុងឆ្នាំ 2017 ហើយក្រុមហ៊ុនបិតាបច្ចេកវិទ្យាខ្នាតយក្សរបស់អាមេរិកមួយនេះ បានគ្រោងពង្រីកការប្រើប្រាស់បច្ចេកវិទ្យាអេក្រង់ OLED នៅលើស្រឡាយផលិតផលសំខាន់ៗរបស់ខ្លួនដែលមានដូចជាកុំព្យូទ័រ MacBook និង iPads ចាប់ពីឆ្នាំក្រោយនេះទៅ (2024)៕