កាលពីដើមខែមករាក្នុងព្រឹត្តិការណ៍ CES2023 ក្រុមហ៊ុន Asus បានប្រកាសចេញម៉ាស៊ីន ROG Strix Series ជំនាន់ថ្មីចុងក្រោយបំផុតប៉ុន្តែ មិនទាន់មកទល់នឹងពេលនេះ Asus មិនទាន់បានប្រកាចេញលក់នៅលើទីផ្សារនៅឡើយទេ។ ប៉ុន្តែ មុននឹងការចេញលក់ម៉ាស៊ីន ROG Strix ជំនាន់ថ្មីឆ្នាំ 2023 ក្រុមហ៊ុន ក៏បានប្រកាសចេញលក់ ROG Strix ជំនាន់ឆ្នាំ 2021 ដែលត្រូវបានធ្វើការ Custom ថ្មីជាមួយការបំពាក់រ៉េម និងទំហំផ្ទុកទិន្នន័យផុតលេខ។
ចំពោះម៉ាស៊ីន ASUS ROG Strix Scar 15 ដែលបានធ្វើការ Upgraded ថ្មីនេះមានលេខកូដសំគាល់ម៉ូដែល G533QS-DS98 ដែលត្រូវបានធ្វើការប្រកាសចេញដំបូងក្នុងឆ្នាំ 2021 ហើយនៅពេលនេះត្រូវបានប្រកាសចេញលក់នៅលើបណ្តាញលក់ទំនិញ Amazon ក្នុងតម្លៃខ្ទង់ $8,658។ ម៉ាស៊ីន Asus ROG Strix Scar 15 ដែលមានតម្លៃខ្ទង់ជិត 1 ម៉ឺនដុល្លារនេះ គឺបានបំពាក់ AMD Ryzen 9-5900HX និងប្រើក្រាហ្វិចកាតស៊េរី NVIDIA GeForce RTX3080 ភ្ជាប់ដោយរ៉េមទំហំ 64GB DDR4 និងអង្គផ្ទុកទិន្នន័យទំហំ 8TB PCIe SSD។ ម៉ាស៊ីន ROG Strix Scar 15 មួយនេះត្រូវបានធ្វើការរៀបចំបង្កើតឡើងដោយ GreatPriceTech ដែលមានការធានារយះពេល 1 ឆ្នាំចេញពីក្រុមហ៊ុនផ្ទាល់។
ASUS ROG Strix Scar 15 មានអេក្រង់ទំហំ 15.6 អ៊ីញ កម្រិតបង្ហាញ 2K ជាមួយល្បឿន 165Hz និងគាំទ្រដំណើរការដោយ Windows 11-64bit។ ជាមួយការជាវម៉ាស៊ីនមួយនេះ ក៏មានថែមមកជាមួយ TUF Gaming M3 Mouse និង TUG Gaming P3 Mouse pad។ ក្រៅពីនេះ GreatPriceTech ក៏ផ្តល់នូវជម្រើសម៉ូដែលមួយចំនួនទៀត ដូចជា Asus ROG Strix Scar 15 ដែលមានរ៉េមទំហំ 32GB ជាមួយថាសរឹងទំហំ 8TB មានតម្លៃខ្ទង់ $8,088, ម៉ូដែលមានរ៉េម 64GB ជាមួយថាសរឹងទំហំ 2x4TB មានតម្លៃខ្ទង់ $5,368, ម៉ូដែលប្រើរ៉េមទំហំ 64GB ជាមួយថាសរឹងទំហំ 2x2TB មានតម្លៃខ្ទង់ $4,568 និងម៉ូដែលមានរ៉េមទំហំ 32GB ជាមួយថាសរឹង 2x2TB មានតម្លៃខ្ទង់ $4,088៕