គិតមកដល់ពេលនេះ គឺនៅសល់ពេលតែមួយសប្តាហ៌ទៀតប៉ុណ្ណោះ គឺដល់ពេលនៃការសម្ពោធជាផ្លូវការណ៌នៅកំពូលស្មាតហ្វូនរបស់ក្រុមហ៊ុន
Samsung ម៉ូដែល Galaxy S23 ហើយ ខណៈដែលកន្លងមកលក្ខណៈសម្បត្តិទូទៅរបស់ស្មាតហ្វូនថ្មីនេះ ក៏មានការទម្លាយចេញអស់ជាច្រើនរួចមកហើយ។ នៅថ្ងៃនេះ យោងតាមការចេញផ្សាយនៅលើ sammobile គឺមានការទម្លាយចេញនូវវីដេអូដំបូងបំផុត ដែលថតដោយស្មាតហ្វូនស៊េរីថ្មី Galaxy S23 Ultra នេះហើយ ដែលបង្ហាញចេញច្បាស់បំផុតនូវសមត្ថភាពកាមេរ៉ាដែលប្រើប្រាស់នៅលើស្មាតហ្វូននេះ។
បើមើលទៅលើការបង្ហោះរបស់លោក Edwards Urbina ដែលជាអ្នកចែកចាយគំរូវីដេអូដែលបានថតដោយស្មាតហ្វូន Galaxy S23 Ultra គឺទើបតែថតបានកាលពីប៉ុន្មានថ្ងៃមុននេះ គឺបានបង្ហាញថា គុណភាពវីដេអូនេះ គឺពិតជាខ្ពស់ខ្លាំងមែនទែន ដោយវីដេអូទីមួយរបស់លោក គឺមានគុណភាពកម្រិត 8K@30fps ដែលជាការផ្តិតចេញពីកាមេរ៉ាទំហំ 200MP និងវីដេអូទីពីរគឺមានកម្រិត 4K@60fps ដែលបានផ្តិតដោយកាមេរ៉ាក្រោយដែលប្រើប្រាស់នូវសិនស័រ ISOCELL HP2 នេះដូចគ្នា។
ជាមួយនិងការបង្ហោះវីដេអូនេះ បើទោះបីជា Twitter បានធ្វើការទម្លាក់នូវគុណភាពយ៉ាងណាក៏ដោយ ក៏វីដេអូខាងលើនេះ នៅតែមានគុណភាពខ្ពស់ដដែល ដោយមើលទៅ គឺមានភាពរលូនជាង 8K@24fps ដែលធ្លាប់បានប្រើប្រាស់នៅលើ Galaxy S22 Ultra។ បន្ថែមពីនេះ ទាំង dynamic range និងគុណភាពសម្លេងបានល្អជាងមុនថែមទៀត។ បើមើលទៅលើវីដេអូ 4K@60fps វិញ ក៏មានការបញ្ជាក់នូវកម្រិតពណ៌ ហើយនិង dynamic range បានល្អដូចគ្នា។
