នាយកប្រតិបត្តិ TikTok លោក Shou Zi Chew ត្រូវបានព្រមានដោយស្នងការសហភាពអឺរ៉ុបលោក Thierry Breton តាមរយះជំនូបតាមរយះវីដេអូនាពេលថ្មីៗនេះ។ ស្នងការរូបនោះបានបញ្ជាក់យ៉ាងច្បាស់ថា សហភាពអឺរ៉ុប (EU) នឹងប្រើប្រាស់គ្រប់មធ្យោបាយដែលអាចធ្វើទៅបានដើម្បីការពារភាពឯកជនរបស់ពលរដ្ឋរបស់ខ្លួន ហើយប្រសិនបើចាំបាច់ នឹងហាមឃាត់ប្រតិបត្តិការកម្មវិធី TikTok ពីសហភាពអឺរ៉ុប។ EU ចង់ឱ្យ TikTok បង្កើនសកម្មភាពរបស់ខ្លួន និងអនុលោមតាមច្បាប់ រួមនិងបទប្បញ្ញត្តិទាំងអស់ដែលមានចែងក្នុងច្បាប់សេវាកម្មឌីជីថល (DSA)។
ច្បាប់ DSA ដែលបានចូលជាធរមានកាលពីខែវិច្ឆិកា ឆ្នាំ 2022 ត្រូវបានចាត់ទុកថាជា ស្តង់ដារមាសសម្រាប់ការគ្រប់គ្រងមាតិកា និងវេទិកាលើប្រព័ន្ធអ៊ីនធឺណិត។ ច្បាប់ថ្មីនេះផ្តល់នូវការដាក់ទណ្ឌកម្ម ការរារាំងជាច្រើន រួមទាំងការហាមប្រាមនៅក្នុងសហភាពអឺរ៉ុបសម្រាប់ការបំពានម្តងហើយម្តងទៀតដែលមិនអនុឡោមតាមច្បាប់នេះ ដែលអាចជាការគំរាមកំហែងដល់អាយុជីវិត និងសុវត្ថិភាពរបស់ពលរដ្ឋនៅសហភាពអឺរ៉ុប។ ការមិនអនុលោមតាម DSA អាចនាំឱ្យមានការផាកពិន័យយ៉ាងខ្លាំងរហូតដល់ 6% នៃប្រាក់ចំណូលប្រចាំឆ្នាំរបស់ក្រុមហ៊ុនទូទាំងពិភពលោក។
បទប្បញ្ញត្តិជាច្រើននៃដែលបានចែងនៅក្នុងច្បាប់ DSA ត្រូវបានអនុវត្តចំពោះវេទិកាដែលមានអ្នកប្រើប្រាស់ច្រើនជាង 45 លាននាក់នៅក្នុងសហភាពអឺរ៉ុបប៉ុណ្ណោះ។ ទោះជាយ៉ាងណាក៏ដោយ កម្រិតនេះនាំមកជូននូវវេទិកាល្បីៗដូចជា YouTube, Twitter, Facebook និង TikTok ក្រោមការឃ្លាំមើលយ៉ាងយកចិត្តទុកដាក់ពីច្បាប់ថ្មី។ TikTok កំពុងពិភាក្សារួចហើយអំពីគោលនយោបាយស្តីពីសុវត្ថិភាពទិន្នន័យ ព័ត៌មានមិនពិត និងការអនុលោមតាម DSA ជាមួយ EU។ ការប្រជុំជាច្រើនជាមួយក្រុមហ៊ុនកំពូលដែលមានប្រធានបទពិភាក្សាដូចជា សុវត្ថិភាពកុមារ ពត៌មានមិនពិតរបស់ប្រទេសរុស្ស៊ី តម្លាភាពនៃខ្លឹមសារនយោបាយដែលបានបង់ប្រាក់ និង GDPR (ច្បាប់ការពារទិន្នន័យទូទៅ)។
នៅក្នុងជំនូបតាមវីដេអូចុងក្រោយនេះ ស្នងការលោក Breton បានប្រាប់ CEO ក្រុមហ៊ុន TikTok លោក Chew ថា "យើងនឹងមិនស្ទាក់ស្ទើរក្នុងការអនុម័តវិសាលភាពពេញលេញនៃទណ្ឌកម្មដើម្បីការពារប្រជាពលរដ្ឋរបស់យើង ប្រសិនបើសវនកម្មមិនបង្ហាញពីការអនុលោមពេញលេញ"។ លោកបានបន្តថា៖ «ការទទួលខុសត្រូវកាន់តែខ្លាំងជាមួយទស្សនិកជនដែលមានវ័យក្មេង វាមិនអាចទទួលយកបានទេដែលនៅពីក្រោយមុខងារដែលមើលទៅហាក់ដូចជាសប្បាយ និងគ្មានគ្រោះថ្នាក់ អ្នកប្រើប្រាស់ត្រូវចំណាយពេលប៉ុន្មានវិនាទីដើម្បីចូលមើលមាតិកាដែលបង្កប់ខ្លឹមសារបង្កគ្រោះថ្នាក់ ហើយជួនកាលថែមទាំងគំរាមកំហែងដល់អាយុជីវិតទៀតផង”។
ជាមួយនឹងការទាញយកច្រើនជាង 3 ពាន់លានដងកម្មវិធី TikTok គឺជាកម្មវិធីលំដាប់លេខមួយក្នុងពិភពលោក និងល្បីល្បាញបំផុតក្នុងចំណោមយុវវ័យ។ ប៉ុន្តែ ដោយសារតែ TikTok មានប្រភពកំណើតកើតចេញពីក្រុមហ៊ុនបច្ចេកវិទ្យាក្នុងប្រទេសចិនជាហេតុធ្វើឲ្យមានការព្រួយបារម្ភជាច្រើន ជាពិសេសនៅក្នុងភាពឯកជន និងសុវត្ថិភាពទិន្នន័យតែម្តង។ TikTok គឺជាកម្មសិទ្ធិរបស់ក្រុមហ៊ុនចិន ByteDance ត្រូវបានចោទប្រកាន់ពីបទប្រមូលទិន្នន័យ និងរាយការណ៍ត្រឡប់ទៅកាន់អាជ្ញាធរចិនវិញតាមរយៈក្រុមហ៊ុនមេរបស់ខ្លួន។ បញ្ហាផ្សេងទៀតរួមមាន កង្វល់ពីការញៀន ពត៌មានមិនពិត ការត្រួតពិនិត្យខ្លឹមសារ ចារកម្ម ការគំរាមកំហែងតាមអ៊ីនធឺណិត។ល។
កម្មវិធីនេះត្រូវបានហាមឃាត់រួចហើយនៅក្នុងប្រទេសអាស៊ីដូចជា ឥណ្ឌា ប៉ាគីស្ថាន បង់ក្លាដែស និងអាហ្សែបៃហ្សង់។ នៅសហរដ្ឋអាមេរិក រដ្ឋជាង 20 ត្រូវបានហាមឃាត់ក្នុងនោះមានមន្ត្រី យោធា និងសមាជិករដ្ឋាភិបាលត្រូវបានបានហាមឃាត់ការប្រើកម្មវិធី TikTok នៅឧបករណ៍ដែលចេញដោយរដ្ឋាភិបាល។ ការហាមឃាត់ដ៏មានសក្តានុពលនៅក្នុងសហភាពអឺរ៉ុបអាចជាមហន្តរាយដ៏ធំធេងបំផុតសម្រាប់កម្មវិធីកម្សាន្តអនឡាញមួយនេះ។ លោកស្រី Caroline Greer នាយក TikTok Brussels នៃគោលនយោបាយសាធារណៈ និងទំនាក់ទំនងរដ្ឋាភិបាលនាពេលថ្មីៗនេះបានបង្ហាញសារនៅលើ tweet ក្នុងគណនី Twitter លោកស្រីថា វាគឺជាការផ្លាស់ប្តូរដ៏ល្អសម្រាប់កិច្ចការសន្ទនារវាង CEO TikTok លោក Chew និងមន្ត្រីស្នងការសហភាពអឺរ៉ុប “Eu Commissioner”។ អ្នក នាងបាននិយាយថាសុវត្ថិភាពរបស់អ្នកប្រើ គឺរឿងសំខាន់បំផុតសម្រាប់ TikTok ដែលត្រូវយកចិត្តទុកដាក់៕
