ដូចអ្វីដែលបានបញ្ជាក់កាលពីដើមអញ្ចឹង ព្រឹត្តិការណ៌ Samsung Galaxy Unpacked 2023 គឺនឹងធ្វើឡើងនៅថ្ងៃទី 1 ខែកុម្ភៈនេះហើយ ស្របពេលជាមួយគ្នានេះ មានរបាយការណ៌ជាច្រើនបាននិយាយថា ស្មាតហ្វូនជំនាន់ថ្មី Samsung Galaxy S23 Series គឺនឹងប្រើប្រាស់នូវបន្ទះឈីបជំនាន់ថ្មីរបស់ Qualcomm គ្រប់ម៉ូដែលតែម្តង។ កន្លងមានការបញ្ជាក់ច្បាស់ថា បន្ទះឈីប Snapdragon 8 Gen 2 គឺនឹងមានប្រើប្រាស់នៅលើស្មាតហ្វូន Samsung Galaxy S23 គ្រប់ម៉ូដែលមែន ប៉ុន្តែមិនទាន់មានការបញ្ជាក់ថា បន្ទះឈីបនេះ ផលិតដោយក្រុមហ៊ុនណាមួយនោះទេ មិនដឹងថា Samsung ឬ Qualcomm ឬមួយក៏ធ្វើការរួមគ្នាឬយ៉ាងណានៅឡើយទេ។
បន្ថែមពីនេះក៏មានការបញ្ជាក់ថា ជារៀងរាល់ឆ្នាំ ក្រុមហ៊ុន Samsung តែងតែប្រើប្រាស់បន្ទះឈីបនេះ 2 ជម្រើសផ្សេងគ្នា ផ្អែកទៅលើទីផ្សារផ្សេងៗគ្នា។ សម្រាប់ការចេញលក់នៅលើទីផ្សារប្រទេសកូរ៉េខាងត្បូង និងទីផ្សារអឺរ៉ុប គឺខុសគេបន្តិច ដោយនៅទីនោះ ក្រុមហ៊ុន Samsung សម្រេចប្រើប្រាស់នូវបន្ទះឈីប Exynos ជាជាងប្រើប្រាស់បន្ទះឈីប Snapdragon ដែលជាទូទៅគឺត្រូវបានប្រើប្រាស់នៅលើទីផ្សារសហរដ្ឋអាមេរិក និងទីផ្សារជាច្រើនទៀតនៅលើពិភពលោក។
ទាក់ទងជាមួយព័ត៌មាននេះ បើតាមការបញ្ជាក់ជាថ្មីពី 9to5Google នោះគឺបាននិយាយថា បន្ទះឈីបដែលប្រើនៅលើស្មាតហ្វូននេះ គឺនឹងមានការផលិតដោយរោងចក្រដែលនៅក្នុងប្រទេសកូរ៉េខាងត្បូងនេះតែម្តង ដោយបន្ទះឈីបនេះ គឺជាម៉ូដែលពិសេសមួយនៅក្នុង Snapdragon 8 Gen 2។ បើតាមប្រភពនៃអ្នកផ្គត់ផ្គង់ គឺបានបញ្ជាក់ថា បន្ទះឈីបនេះ គឺមានការប្រើប្រាស់សមាសភាគពិសេសមួយ ហើយឈីបនេះ គឺអាចនឹងមានឈ្មោះថា “Qualcomm Snapdragon 8 Gen 2 Mobile Platform for Galaxy,”។ បន្ទះឈីបនេះ អាចនឹងមានល្បឿន 3.36GHz ដែលខ្លាំងជាងឈីបស្តង់ដារត់បាន 3.2 GHz ប៉ុណ្ណោះ។
